Suáđigil kieldâ já Sämitigge teivâdii jyehi-ivvááš oovtâstpargopeeivi ooleest
Suáđigil kieldâ já Sämitige ovdâsteijeeh teivâdii čohčâmáánu 15. peeivi 2025 ohtsii hiäđukocceem já oovtâstpargo ooleest. Teivâdem ulmen lâi nanodiđ vuárusavâstâllâm já merkkuđ ohtsijd hiäđukocceem táárbuid. Oovtâstpargopeeivijd lii tárguttâs juátkiđ jyehi ive.
Kove: Ville Fofonoff/Sämitigge
Teivâdmist ovdâsteijeeh miärkkojii ohtsii hiäđukocceem tárbun sämikielâlii arâšoddâdem já máttááttâs ruttâdem turvim. Lasseen sij savâstâllii maaŋgâin Suáđigil kieldân já Sämitiigán tehálijn já äigikyevdilijn aašijn, tego:
- šiev aalmugkoskâvuođâi ovdedem,
- sämmilii párnáikulttuurkuávdáš Mánnu toimâm,
- eennâmkevttimân já iäláttâssáid lohtâseijee koččâmušah, já
- sämikieláid, škovliimân, pyereestvajemân já nuoráid lohtâseijee teemah.
Sämitige saavâjođetteijee sajasâš Tuomas Aslak Juuso tiäddut oovtâstpargopeeivij merhâšume.
–Sämmilij päikkikuávlu kieldâiguin uárnejum oovtâstpargopeeivih láá čaittâšum lemin pyeri vyehi savâstâllâđ äigikyevdilijd aašijn já ohtsijn hiäđukocceem táárbuin, iätá Sämitige saavâjođetteijee sajasâš Tuomas Aslak Juuso.
–Mist lâi šiev oovtâstpargoteivâdem Sämitiggijn. Savâstâlmeh lijjii ávus já ovdedeijeeh, já mij kieđâvušâim tehálijn aašijn, tego pyereestvaijeem- já čuovviittâspalvâlusâi ovdedem, eellimvyeimi sehe ohtsijd hiäđuid sämikuávlu kieldâi kooskâ. Taan oovtâstpargo lii tehálâš juátkiđ vâi juksâp mii ohtsijd uulmijd, iätá Suáđigil kieldâhovdâ Jari Rantapelkonen.
Taan ive teivâdem uárnejui káidusohtâvuođâiguin. Čuákkimân uásálistijn Suáđigil kieldâst kieldâhovdâ Jari Rantapelkonen já pyereestvaijeem- já čuovviittâshovdâ Antti Palomaa. Sämitiggeest čuákkimân uásálistii saavâjođetteijee sajasâš Tuomas Aslak Juuso já haldâttâhhovdâ Pia Ruotsala-Kangasniemi sehe sierâ toimâsuorgij virgeulmuin škovlimčällee Bigga-Helena Magga, kielâtorvočällee Anne Kirste Aikio, kielâpiervâlstivrejeijee Niina Aikio-Siltala, sämmilii párnáikulttuurkuávdáá toimâstivrejeijee Petra Biret Magga-Vars, lahâčällee Kalle Varis, iäláttâs- já pirâslahâčällee Sarita Kämäräinen, vs. pirâsčällee Leena Niska, iäláttâsčällee Laura Olsén-Ljetoff, vs. sosiaal- já tiervâsvuotâčällee Anni Koivisto, vs. nuorâičällee Saana Aikio já viestâdemčällee Johanna Alatorvinen.
Sämitige já Suáđigil kieldâ oovtâstpargoteivâdem lii uási jyehi-ivvááš kieldâoovtâstpargoteivâdmijn. Siämmáálágán teivâdmeh Ucjuv já Aanaar kieldâiguin láá jo uárnejum taan ive ääigi. Iänuduv kieldáin teivâdem lii jo vuávám vyelni.
Lasetiäđuh:
Tuomas Aslak Juuso
Saavâjođetteijee sajasâš
040 687 3394
tuomas.juuso@samediggi.fi
Jari Rantapelkonen
Suáđigil kieldâhovdâ
040 615 9880
jari.rantapelkonen@sodankyla.fi
