Suomâ já Sämitigge kiäsádâteh Barents euroarktâsii rääđist – Sämitigge kiäččá EU suundán
Vuossâmuš Barents kuávlu algâaalmugij njunoščuákkim, The Sámi Summit uárnejui Brysselist njuhčâmáánust 2023. Suomâ Sämitigge já Suomâ Barents euroarktâsii rääđi saavâjođetteijeeh oovtâstpargoost Euroop parlamentijn uárnejii njunoščuákkim. Kove: European Union 2023 – Source : EP
Suomâ kiäsádât Barents euroarktâsii rääđist já meid Suomâ Sämitigge kiäsádât oovtâstpargoost.
Olgominister Elina Valtonen (kok.) paahud olgoministeriö tiäđáttâsâst, ete oovtâstpargohäämi ij innig västid taan ääigi táárbun, peic toovât pajaluvâi orroo ráhtusijd. Valtosii mield Barents-oovtâstpargo lâi tuáimee kanava tave vuáruvaikuttâsân ovdil Ruošâ volliittem Ukrainan.
Sämitige jeessân Janne Hirvasvuopio tuáimá saavâjođetteijen Barents euroarktâsii rääđi algâaalmugpargojuávhust, main lii lamaš eromâš raajijd rastaldittee rooli Tave-enâmij já Ruošâ algâaalmugij juávhust.
– Lii vaidâlittee, ete Suomâ táálááš haldâttâs ij ane Arktâsii kuávlu já algâaalmugij faallâm máhđulâšvuođâid tehálâžžân. Sämmilijn láá ennuv, maid faallâđ purrâmuštoorvon, biodiversiteetân já šoŋŋâdâhnubástusân lohtâseijee koččâmušâin. Sämmiliih kalgeh tääl keččâđ eenâb Euroop váimusân, Hirvasvuopio paahud.
Rääđi algâaalmugpargojuávkku porgâm puátusijd pyevtitteijee pargo
Barents euroarktâsii rääđi algâaalmugpargojuávkku lii porgâm iheluuvij ääigi puátusijd pyevtitteijee pargo algâaalmugij oovdân.
Eromâš vaigutteijee pargo porgui moonnâm paajeest Barents euroarktâsii rääđi pargojuávhu oovdeb saavâjođetteijee já tááláá värijeessân Anni Koivisto jođettâsâst. Njuhčâmáánust 2023 uárnejui vuossâmuš Barents kuávlu algâaalmugij njunoščuákkim, The Sámi Summit, Brysselist oovtâstpargoost Euroop parlamentijn. Tábáhtus leehâi Euroop parlament sahâolmooš Roberta Metsola.
– Tilálâšvuotâ adelij mijjân máhđulâšvuođâ tuálvuđ sämmiláid tehálijd aašijd, tego šoŋŋâdâhnubástus vaikuttâsâid, njuolgist Euroop union miärádâstoohâm váimusân. Ličij tehálâš, ete tääl tohhum miärádâsâst peerusthánnáá Suomâ já nubeh tave-enâmeh tuárjuččii puátteevuođâst-uv sullâsijd tilálâšvuođâid já tovâččii máhđulâžžân tom, ete algâaalmugij jienah kulluuččii vijđáht tain peevdijn, kost mijjân kyeskee aašijn merideh, Koivisto iätá.
Vaidâlitteht Ruošâ volliittemsuáđi čuávumuššân Barents euroarktâsii rääđi rooli lii uccom.
EU-ääših Sämitige aalmugijkoskâsii tooimâ njunošulmen
Suomâ Sämitige saavâjođetteijee Pirita Näkkäläjärvi iätá, ete Sämitigge lii pajedâm EU-aašijd aalmugijkoskâsij aašij njunošteeman toimâohjelmstis 2024–27.
– Ohtân ulmen lii toohâđ sämmilij já Euroop parlament koskâsii kyeimivuotâsopâmuš, moin jieijâs uásild nanodiččii sämmilij uásálâšvuođâ EU-miärádâstohâmân Brysselist já meid Suomâst, Näkkäläjärvi iätá.
Toos lasseen Suomâ Sämitigge juátká tave-eennâmlii oovtâstpargo sämmilij jo orroo oovtâstpargo-orgaanij peht, tego Suomâ, Taažâ já Ruotâ Sämitiigij ohtsii parlamentaarlii rääđist.
Tuávááš:
Sämitigge toolâi sämitiggelaavâ 9 § miäldásijd ráđádâlmijd olgoministeriöin. Ráđádâlmijn ij kavnum taggaar čuávdus, mast Suomâ Sämitigge puávtáččij juátkiđ oovtâstpargo Barents euroarktâsii rääđi algâaalmugpargojuávhust, ko ruttâdem nohá.
Barents euroarktâsii rääđi algâaalmugpargojuávkku juátká tooimâs normaallávt ive 2025 loopân, já tast maŋa Suomâ Sämitigge iärrán pargojuávhust.
Lasetiäđuh:
Janne Hirvasvuopio
Sämitige jeessân
Barents euroarktâsii rääđi algâaalmugpargojuávhu saavâjođetteijee
janne.k.hirvasvuopio@gmail.com
050 533 7016
Anni Koivisto
Sämitige jeessân
Barents euroarktâsii rääđi algâaalmugpargojuávhu värijeessân
koivisto.anni@gmail.com
Pirita Näkkäläjärvi
Sämitige saavâjođetteijee
pirita.nakkalajarvi@samediggi.fi
044 7533766
