Suopma ja Sámediggi geassádit Barents euroárktalaš ráđis – Sámediggi geahččagoahtá EU guvlui
Vuosttaš Barents guovllu eamiálbmogiid allačoahkkin, The Sámi Summit, ordnejuvvui Brysselis njukčamánus 2023. Allačoahkkima lágidedje Suoma sámediggi ja Suoma Barents euroárktalaš ráđi ságajođiheaddjit ovttasbarggus Eurohpá parlameanttain. Govva: European Union 2023 – Source : EP
Suopma geassáda Barents euroárktalaš ráđis ja maiddái Suoma Sámediggi geassáda ovttasbarggus.
Olgoministtar Elina Valtonen (kok.) dadjá olgoministeriija dieđáhusas, ahte ovttasbargu ii šat vástit otná beaivvi dárbbuide, baicce hukse badjálaš struktuvrraid. Valtosa mielde Barents-ovttasbargu lei doaibmi kanála davviguovllu ovttasbargui ovdal go Ruošša fallehii Ukrainai.
Sámedikki lahttu Janne Hirvasvuopio doaibmá ságadoallin Barents euroárktalaš ráđi eamiálbmotbargojoavkkus, mas lea leamaš earenoamáš rájiid rasttildeaddji rolla Davviriikkaid ja Ruošša eamiálbmogiid gaskkas.
– Lea váidalahtti, ahte Suoma dálá ráđđehus ii oainne Árktalaš guovllu ja eamiálbmogiid fállan vejolašvuođaid dehálažžan. Sápmelaččain lea olu maid fállat biebmodorvui, biodiversitehttii ja dálkkádatrievdamii laktáseaddji gažaldagain. Sápmelaččat galget dál geahččagoahtit eanet Eurohpá váibmosii, Hirvasvuopio dadjá.
Ráđi eamiálbmotbargojoavku lea bargan barggu, mii lea buktán bohtosiid
Barents euroárktalaš ráđi eamiálbmotbargojoavku lea bargan jahkelogiid áigge eamiálbmogiid ovdii barggu, mii lea buktán bohtosiid.
Earenomaš váikkuheaddji rahčamuš dahkkojuvvui mannan bajis Barents euroárktalaš ráđi bargojoavkku ovddit ságadoalli ja dálá várrelahttu Anni Koivisto láidestemiin. Njukčamánus 2023 ordnejuvvui vuosttaš Barents guovllu eamiálbmogiid allačoahkkin, The Sámi Summit, Brysselis ovttasbarggus Eurohpá parlameanttain. Dáhpáhusa rabai Eurohpá parlameantta ságadoalli Roberta Metsola.
– Dilálašvuohta attii midjiide vejolašvuođa doalvut sápmelaččaide dehálaš áššiid, nugo dálkkádatrievdama váikkuhusat, njuolga Eurohpá uniovnna mearrádusdahkama váibmosii. Livččii dehálaš, ahte dál dahkkon mearrádusas fuolakeahttá Suopma ja eará Davviriikkat doarjjole boahttevuođasge sullasaš dilálašvuođaid ja dagale vejolažžan eamiálbmogiid jiena gulloma viidát diein bevddiin, main mearridit min guoski áššiin, Koivisto dadjá.
Váidalahtti Ruošša fallehansoađi geažil Barents euroárktalaš ráđi rolla lea geahppánan.
EU-áššit Sámedikki riikkaidgaskasaš doaimma njunnošii
Suoma Sámedikki ságadoalli Pirita Näkkäjärvi dadjá, ahte Sámediggi lea lokten EU-áššiid riikkaidgaskasaš áššiid njunuštemán doaibmaprográmmastis 2024–27.
– Oktan ulbmilin lea dahkat sápmelaččaid ja Eurohpá parlameantta gaskasaš ovttasbargosoahpamuša, mii iežas oasil nannešii sápmelaččaid oasálašvuođa EU-mearrádusdahkamii Brysselis ja maiddái Suomas, Näkkäläjärvi dadjá.
Lassin Suoma Sámediggi joatká davviiriikkalaš ovttasbarggu sápmelaččaid jo leahkimen leahkki bargoorgánaid bokte, dego Suoma, Norgga ja Ruoŧa Sámedikkiid oktasaš parlamentáralaš ráđis.
Duogáš:
Sámediggi čađahii sámediggelága 9 §:a mielde ráđđádallamiid olgoministeriijain. Ráđđádallamiin ii gávdnon čoavddus, mas Suoma Sámediggi sáhtášii joatkit ovttasbarggu Barents euroárktalaš ráđi eamiálbmotbargojoavkkus go ruhtadeapmi nohká.
Barents euroárktalaš ráđi eamiálbmotbargojoavku joatká doaimmas dábálaččat jagi 2025 lohppii, man maŋŋá Suoma Sámediggi earrána bargojoavkkus.
Lassedieđut:
Janne Hirvasvuopio
Sámedikki lahttu
Barents euroárktalaš ráđi eamiálbmotbargojoavkku ságadoalli
janne.k.hirvasvuopio@gmail.com
050 533 7016
Anni Koivisto
Sámedikki lahttu
Barents euroárktalaš ráđi eamiálbmotbargojoavkku várrelahttu
koivisto.anni@gmail.com
Pirita Näkkäläjärvi
Sámedikki ságadoalli
pirita.nakkalajarvi@samediggi.fi
044 7533766
