Anarâšaašij ráđádâllâmkode saavâjođetteijen Anu Avaskari já värisaavâjođetteijen Inka Musta
Anarâšaašij ráđádâllâmkodde valjij čuákkimistis kuovâmáánu 26. peeivi 2025 ráđádâllâmkode saavâjođetteijen Anu Avaskari já värisaavâjođetteijen Inka Musta. Ráđádâllâmkodde meridij kieđâvuššâđ jesânij pajedem aašijd fáddáubâlâšvuottân puáttee čuákkimijn.
Kove: Ville Fofonoff
Ornijdume lasseen ráđádâllâmkodde savâstâlâi aašijn já teemain, maid sij áiguh kieđâvuššâd puáttee čuákkimijn. Jesaneh puohtii oovdân ei. Piälppáájäävri kirho tile, kaava- já kiäinuaašijd, Aanaarjäävri aldakuávlu kyeskee aašijd, kielâaašijd jieškote-uv sektorijn sehe eenikielâlij palvâlusâi turvim.
– Mun lam tuđâvâš, ete mij uážžup anarâšaašij ráđádâllâmkode pargo joton taan vaaljâpajan, iätá ráđádâllâmkode saavâjođetteijee Anu Avaskari.
Sämitige čuákkim asâttij 23.9.2024 anarâšaašij ráđádâllâmkode toimâpajan 1.9.2024-31.12.2027. Ráđádâllâmkoodán nomâttui (värijeessân taavgij siste): Anu Avaskari (Pasi Aikio), Leo Aikio (Heikki Nikula), Inka Musta (Marjukka Helander), Aslak Pekkala (Sinikka Mäkinen), Petter Morottaja (Henna Aikio), Marko Tervaniemi (Yrjö Musta) já Anni Koivisto (Varpu Falck).
Ráđádâllâmkode pargon lii adeliđ ciälkkámušâid Sämitige stiivrân já lävdikuddijd anarâššáid kyeskee aašijn, čuávvuđ anarâššáid kyeskee aašij ovdánem, toimâđ äššitobden anarâššáid kyeskee aašijn já toohâđ iävtuttâsâid anarâššáid kyeskee koččâmušâin. Lasseen Sämitigge teikâ Sämitige stivrâ puáhtá miärádâssáin čujottiđ meid eres, eromâšávt anarâššáid kyeskee pargo ráđádâllâmkode hoittámnáál.
Ráđádâllâmkode pevdikirjeh almostittojeh Sämitige dokumentpaaŋkist.
Lasetiäđuh:
Anu Avaskari
Ráđádâllâmkode saavâjođetteijee
040 564 0053
Pia Ruotsala-Kangasniemi
Haldâttâhhovda
040 726 2688
pia.ruotsala@samediggi.fi
