Sämitigge kijttá puohâid kiäh uásálistii säminuorâi taaiđâtábáhtusân
Säminuorâi taaiđâtábáhtus uárnejui Kärigâsnjaargâ škoovlâst 19.5.2026. Tábáhtus nuurâi oohtân vuáđuškoovlâ já nube tääsi uáppeid, kiäh láá sämimáttááttâsâst. Peeivi ääigi nuorah pessii jyehiđ jieijâd mättim já uápásmuđ nubijdis.
Kärigâsnjaargâ škoovlâ lihâdemsali faalâi šiev raamijd tábáhtusân.
Taaiđâtábáhtus ohjelm siskeldij taan ive mainâstem videoin, sierâlágán jienâmaailmijd, ärbivuáválii sämimuusik já párnái já nuorâi sämituojijn rahtum tyejičáitálduv. Peeivi ääigi mij ooinijm maaŋgâpiälálijd já fiijnâ oovdânpyehtimijd.
Kietâtyejeh lijjii uáinimnáálá jieijâs čáitálduvâst.
Tábáhtus ooleest juohhii tubdâstâsâid sierâ rááiđuin. Tubdâstâsâid finnejii taah:
Mainâstem
- Uvllá ja Biera guolasteamen, Nuorggám gánddat
- Dollagáttis, Iänuduv škovlâ – Gollit
- Saami säkki, Čevetjäävri škovlâ
Jienâmaailm
- GIĐĐADÁLVI, Kärigâsnjaargâ škovlâ
- VÁIGGAS, Vuáču škovlâ
- GIĐĐA, Heta škovlâ – Gollit
Ärbivuáválâš luohti (taan ive iä lamaš livđe tâi leuʹdd -oovdânpyehtimeh)
- Davimusat – Min giđđabálgat (Njuárgám)
- Čearpmahat – Nieiddaid luođit (Vuáčču)
- Giehtaruohttasa nieiddat – Njoammila luohti (Iänudâh)
Tyeji, tuejj, duodji
- Inger Näkkäläjärvi, Heta škovlâ
- Anni-Siviä Länsman, Njuárgám škovlâ
- Unni Kuusela, Vuáču škovlâ
Tyeje uđđâ eellim
- Ánne Káren Magga, Heta škovlâ
- Kiurel Harju, Čevetjäävri škovlâ
- Máhtte Aikio, Paul-Mihkkal Ruotsala já Paulus Rauhala, Aanaar škovlâ
Maainâstmân uásálistii ohtsis 13 videod sierâ škoovlâin.
Taaiđâtábáhtus poster rähtee Elli Kotavuopio Heta škoovlâst palhâšui taaiđâtarbâšijguin. Párnáid já nuorâid hastii ovdil tábáhtus vuáváđ kove tábáhtus posterân. Kotavuopio čepis tyeji väljejui posterân. Kooveest láá sierâlágáneh hervâkovoseh, main šadda ivnáás olesvuotâ päddilágán kovosijn.
Taiđuu já kulttuur sierânâsmätteeh árvuštâllii oovdânpyehtimijd já kietâtuojijd. Sierânâsmätten toimii Mikkâl Morottaja (jienâmaailm já mainâstem), Suvi West (mainâstem), Yrjö Musta (sämityeji), Elle-Máret Helander (sämityeji) já Piera Eira (ärbivuáválâš sämimuusik). Sämitige saavâjođetteijee Pirita Näkkäläjärvi puovtij video peht Sämitige tiervuođâid tábáhtusân. Tábáhtusâst lávdástij Piera Eira já Johan Ivvár Gaup EiGa-duo, mii finnij oles sali tánssáđ já juoigâđ mieldi. Tábáhtusân pääihi oolâ čokkânii suulân 270 uásálisted.
Täsniartistin Johan Ivvár Gaup já Piera Eira ađai EiGa.
Sämitigge kijttá lieggâsávt puoh uásálisteid, stivrejeijeid, máttáátteijeid sehe oovtâstpargokuoimijd luhostum tábáhtus olášutmist. Eromâškijttoseh Kärigâsnjaargâ škoovlân já Ucjuv kieldân tábáhtus orniistâlmijn já kuásutteijeevuođâst.
Čuávuváá ive taaiđâtábáhtus ornimsaje almostittii tábáhtusâst. Puáttee kiiđâ taaiđâtábáhtus viättoo Heta škoovlâst Iänuduvâst.
Taiđuu já kulttuur sierânâsmätteeh čižetpeln: Suvi West, Piera Eira, Elle-Máret Helander já Mikkâl Morottaja. Yrjö Musta váilu kooveest.
Lasetiäđuh:
Minna Lehtola
044 902 9295
minna.lehtola@samediggi.fi
Petra Biret Magga-Vars
040 732 5503
petra.magga@samediggi.fi
Tarja Porsanger
050 569 6065
tarja.porsanger@samediggi.fi
