Aanaar kieldâ já Sämitigge oovtâst puátteevuođâ energiačuávdusáid uáppáásmin
Sämitige, Aanaar kieldâ sehe Aanaar kieldâ energiafinnodâh Inergia Oy njunošeh uápásmii oovtâst uđâsmuvvee energia čuávdusáid, ko sij kolliistâllii Helen Oy rááhtuslii mittokaava piäivášpaarkân, mii huksejuvvoo Lohjan ive 2024.
Aanaar kieldâ já Sämitigge uáppáásmin piäivášpaarkân, mii huksejuvvoo Lohja Kirkniemin. Kooveest čižetpeln Sämitige I värisaavâjođetteijee Leo Aikio, Inergia Oy toimâttâshovdâ Tommi Koskinen, Sämitige saavâjođetteijee Pirita Näkkäläjärvi, Helen proojeekthovdâ Jesse Talasjoki, Sämitige vs. iäláttâsčällee Maria Valkeapää, Aanaar kieldâstiivrâ saavâjođetteijee Jari Huotari, Helen ovdâsvástádâslâšvuotâ- já siärvádâhjođetteijee Maiju Westergren, Helen pieggâvyeimijođetteijee Pekka Tolonen, Aanaar kieldâhovdâ Tommi Kasurinen, Sämitige II värisaavâjođetteijee Tuomas Aslak Juuso já Sämitige saavâjođetteijee išedeijee Niina Siivikko.
Aanaar kieldâ já Sämitige ovdâsteijeeh uápásmii vuossaargâ 27.5.2024 šleđgâfinnodâh Helen Oy piäivâšpaarkân, mii kiävttá uđđâsumos teknologia já valmâštuvá Lohja Kirkniemin ive 2024 ääigi. Piäivâšenergia tievâsmit šleeđgâ pyevtittâsvaljiittâs já lii tehálâš uási kilelis energiasysteemist. Pargo- já iäláttâsministeriö (TEM) lii mieđettâm Lohja piäivášpaarkân 1,58 miljovn eurod RRF torjuu Euroop union toorjâohjelmist, moin ruttâduvvojeh energiainfrastruktuurhaavah já uđđâ energiateknologia haavah, moiguin kepiduvvojeh Suomâ šaddovisteluoštuuh já tuárjojeh Suomâ čiđđâneutraalvuotâulmeh.
– Mij meridijm Sämitige njunošijguin toohâđ uápásmemmääđhi Helen Oy piäivášenergia vuorkkiimân, vâi mij pyehtip oovtâst hammiđ ibárdâs já uáinu puátteevuođâ energiačuávdusijn Aanaar kieldâ kuávlun, muštâl Aanaar kieldâhovdâ Tommi Kasurinen.
– Lii tehálâš uápásmuđ piäivášvuáimán, ton teknologiaid já ton vaattâm eennâmvijđoduvváid, vâi mij tubdâp ääši pyerebeht ko äšši sadda äigikyevdilin aaibâs tavveen-uv, iätá Sämitige saavâjođetteijee Pirita Näkkäläjärvi.
Meccihaldâttâssáin savâstâlmin pyeri vuoiŋâst Aanaar kuávlu äigikyevdilijn aašijn. Kooveest čižetpeln Aanaar kieldâhovdâ Tommi Kasurinen, Sämitige vs. iäláttâsčällee Maria Valkeapää, Sämitige I värisaavâjođetteijee Leo Aikio, Sämitige saavâjođetteijee Pirita Näkkäläjärvi, Meccihaldâttâs uáivihovdâ Juha S. Niemelä, Sämitige II värisaavâjođetteijee Tuomas Aslak Juuso, Meccihaldâttâs Metsätalous Oy toimâttâsjođetteijee Jussi Kumpula já Aanaar kieldâstiivrâ saavâjođetteijee Jari Huotari.
Määđhi ääigi lâi meid Sämitiggijn ohtsâš teivâdem Meccihaldâttâs uáivihovdâ Juha S. Niemeläin. Teivâdmist kieđâvušâim kuávlu äigikyevdilijd aašijd pyeri vuoiŋâst.
– Puátteevuođâ kilelis energiačuávdusij karttim lasseen mist láá uánihis áigáduv hástuseh energia (energiamuorâ) finniimist Aanaar kieldâ kuávlust já lii luándulâš teivâdiđ Meccihaldâttâssáin já oovtâst suogârdiđ ääši, iätá Aanaar kieldâhovdâ Tommi Kasurinen.
– Mun lam tuđâvâš mii máátkán, mii lii uási Aanaar kieldâ ja Sämitige jo moonnâm paajeest algâttum ohtsii hiäđukocemist. Mist láá ennuv ohtsiih ääših ovdedemnáál já mii jienâ kulloo pyerebeht, ko mij tuálvup aasijd ovdâskulij oovtâst, paahud Sämitige saavâjođetteijee Pirita Näkkäläjärvi.
Máátkán servii Aanaar kieldâstiivrâ saavâjođetteijee Jari Huotari, kieldâhovdâ Tommi Kasurinen, Inergia Oy toimâttâshovdâ Tommi Koskinen sehe Sämitiggeest saavâjođetteijee Pirita Näkkäläjärvi, I värisaavâjođetteijee Leo Aikio, II värisaavâjođetteijee Tuomas Aslak Juuso, vs. iäláttâsčällee Maria Valkeapää sehe saavâjođetteijee išedeijee Niina Siivikko.
Lasetiäđuh
Aanaar kieldâ
Tommi Kasurinen
Kieldâhovdâ
050 548 4123
tommi.kasurinen@inari.fi
Sämitigge
Pirita Näkkäläjärvi
Saavâjođetteijee
044 753 3766
pirita.nakkalajarvi@samediggi.fi
