Anára gielda ja Sámediggi ovttas boahttevuođa energiijačovdosiidda oahpásmuvvamin
Sámedikki, Anára gieldda ja Anára gieldda energiijafitnodaga Inergia Oy njunnošat oahpásmuvve ovttas ođasmuvvi energiija čovdosiidda galledemiin Helen Oy industriijalaš mihttoláva beaivvášpárkkas, mii gárvvásmuvvá Lohjai jagi 2024 áigge.
Anára gielda ja Sámediggi oahpásmuvvamin beaivvášpárkii, mii gárvána Lohja Kirkniemii. Govas gurut bealde Sámedikki I várreságajođiheaddji Leo Aikio, Inergia Oy fitnodatjođiheaddji Tommi Koskinen, Sámedikki ságajođiheaddji Pirita Näkkäläjärvi, Helena prošeaktahoavda Jesse Talasjoki, Sámedikki vs. ealáhusčálli Maria Valkeapää, Anára gielddastivrra ságajođiheaddji Jari Huotari, Helena vásttolašvuođa- ja servodatjođiheaddji Maiju Westergren, Helena bieggafápmojođiheaddji Pekka Tolonen, Anára gielddahoavda Tommi Kasurinen, Sámedikki II várreságajođiheaddji Tuomas Aslak Juuso ja Sámedikki ságajođiheaddji veahkkebargi Niina Siivikko.
Anára gieldda ja Sámedikki ovddasteaddjit oahpásmuvve vuossárgga 27.5.2024 Lohja Kirkniemii jagi 2024 áigge gárvvásmuvvi elrávdnjefitnodat Helen Oy beaivvášpárkii, mii atná ávkin ođđasamos teknologiija. Beaivvášenergiija dievasmáhttá elrávnnji buvttadančoakkáldaga ja lea dehálaš suvdilis energiijavuogádahkii. Bargo- ja ealáhusministeriija (TEM) lea mieđihan Lohja beaivvášpárkii 1,58 miljovnna euro RRF-doarjaga Eurohpá uniovnna doarjjaprográmmas, mainna ruhtaduvvojit energiijainfrastruktuvrra fitnut ja ođđa energiijateknologiija fitnut. Daiguin geahpedit Suoma šaddovistegássaluoittuid ja doarjut Suoma čitnaneutrálavuođa ulbmiliid.
– Mii mearrideimmet Sámedikki njunnošiiguin ovttas dahkat oahpásmuvvanmátkki Helen Oy beaivvášenergiija rádjamii, vai sáhttit ovttas hábmet oaiviliid ja áddejumiid boahttevuođa energiijačovdosiin Anára gieldda guovllus, muitala Anára gielddahoavda Tommi Kasurinen.
– Lea dehálaš oahpásmuvvat beaivvášfápmui, dan teknologiijaide ja eanaviidodagaide, maid dat gáibida, vai mii dovdat ášši buorebut, dallego ášši boahtá áigeguovdilin áibbas dáppe davvinge, dadjá Sámedikki ságajođiheaddji Pirita Näkkäläjärvi.
Mátki sisttisdoalai maiddái ovttas Sámedikkiin deaivvadeami Meahciráđđehusa váldohoavda Juha S. Niemeläin. Deaivvadeamis gieđahallojuvvojedje guovllu áigeguovdilis áššit buori vuoiŋŋas.
Meahciráđđehusain buori vuoiŋŋas Anára guovllu áigeguovdilis áššiin ságastallamin. Govas gurut bealde Anára gielddahoavda Tommi Kasurinen, Sámedikki v. ealáhusčálli Maria Valkeapää, Sámedikki I várreságajođiheaddji Leo Aikio, Sámedikki ságajođiheaddji Pirita Näkkäläjärvi, Meahciráđđehusa oaivehoavda Juha S. Niemelä, Sámedikki II várreságajođiheaddji Tuomas Aslak Juuso, Meahciráđđehus Metsätalous Oy fitnodatjođiheaddji Jussi Kumpula ja Anára gielddastivrra ságajođiheaddji Jari Huotari.
– Boahttevuođa suvdilis energiijačovdosiid gártema lassin mis leat oanehis áiggi hástalusat energiija (energiijamuora) oažžumis Anára gieldda guovllus ja lea lunddolaš deaivvadit Meahciráđđehusain ja ovttas suokkardallat ášši, dadjá Anára gielddahoavda Tommi Kasurinen.
– Lean duđavaš min mátkái, mii gullá Anára gieldda ja Sámedikki juo mannan bajis álgán oktasaš ovdogohcimii. Mis leat ollu oktasaš ovddidanmunit ja min jietna gullo buorebut, go mii ovddidit áššiid ovttas, gávnnaha Sámedikki ságajođiheaddji Pirita Näkkäläjärvi.
Mátkái oassálaste Anára gielddaráđđehusa ságajođiheaddji Jari Huotari, gielddahoavda Tommi Kasurinen, Inergia Oy fitnodatjođiheaddji Tommi Koskinen ja maid Sámedikkis ságajođiheaddji Pirita Näkkäläjärvi, I várreságajođiheaddji Leo Aikio, II várreságajođiheaddji Tuomas Aslak Juuso, vs. ealáhusčálli Maria Valkeapää ja ságajođiheaddji veahkkebargi Niina Siivikko.
Lassedieđut
Anára gielda
Tommi Kasurinen
Gielddahoavda
050 548 4123
tommi.kasurinen@inari.fi
Sámediggi
Pirita Näkkäläjärvi
Ságajođiheaddji
044 753 3766
pirita.nakkalajarvi@samediggi.fi
