Aanar kåʹdd da Sääʹmteʹǧǧ õõutsââʹjest pueʹttiääiʹj energiaräʹtǩǩummšid tobdstõõttmen
Sääʹmteeʹǧǧ, Aanar kååʹdd di Aanar kååʹdd energiaõhttõs Inergia Võ njoonaš tobdstõʹtte õõutsââʹjest ođđsmõõvvi energia räʹtǩǩummšid kuõʹssjeeʹl Helen Võ Lohjaaʹje eeʹjj 2024 poodd raajsmõõvvi fabriikklaž mettkääʹv peiʹvvǩeâdda.
Aanar kåʹdd da Sääʹmteʹǧǧ tobdstõõttmen Lohja Kirkniemi päikka raajsmõõvvi peiʹvvǩeâdda. Snimldõõǥǥâst čiʹǯsbeäʹlnn Sääʹmteeʹǧǧ I väärrsaaǥǥjååʹđteeʹjj Leo Aikio, Inergia Võ tååimtemjååʹđteeʹjj Tommi Koskinen, Sääʹmteeʹǧǧ saaǥǥjååʹđteeʹjj Pirita Näkkäläjärvi, Helen projeʹkttšurr Jesse Talasjoki, Sääʹmteeʹǧǧ vs. jieʹllemvueʹǩǩpiisar Maria Valkeapää, Aanar kåʹddhalltõõzz saaǥǥjååʹđteeʹjj Jari Huotari, Helen vasttõõzzlažvuõtt- da õhttsažkåʹddjååʹđteeʹjj Maiju Westergren, Helen piõggviõkkjååʹđteeʹjj Pekka Tolonen, Aanar kåʹddjååʹđteeʹjj Tommi Kasurinen, Sääʹmteeʹǧǧ II väärrsaaǥǥjååʹđteeʹjj Tuomas Aslak Juuso da Sääʹmteeʹǧǧ saaǥǥjååʹđteeʹj vieʹǩǩteeʹjj Niina Siivikko.
Aanar kååʹdd da Sääʹmteeʹǧǧ eeʹttǩeeʹj tobdstõʹtte vuõssarggân 27.5.2024 Lohja Kirkniemi päikka eeʹjj 2024 poodd valmštõõvvi liâdggõhttõs Helen Võ ođđsõmâs teknologia äuʹǩǩeei peiʹvvǩeâdda. Peiʹvvenergia tiuddad liâđǥ puuʹtʼtõspaleeʹtt da lij samai vääžnai pieʹǩǩ ǩeâllʼjeei energiariâžldõõǥǥ. Tuâjj- da jieʹllemvueʹǩǩministeria (TEM) lij miõttâm Lohja peiʹvvǩeâdda 1,58 miljoon euʹrred RRF-tuärjjõõzz Euroopp unioon tuärjjeemprograammâst, koin teäggtet energiainfrastruktuurhaʹŋǩǩõõzzid da ođđ energiateknologia haʹŋǩǩõõzzid, koin ǩieʹppeet Lääʹdd šâddeempõrttgaasspiâsttjid ja tuärjjeet Lääʹdd illneutraalvuõtt-täävtõõzzid.
– Tuʹmmjiim Sääʹmteeʹǧǧ njonnšin tueʹjjeed tobdstõõttâm-määʹtǩ Helen Võ peiʹvvenergia ruõkkâmvälddmõʹšše, što vueiʹttep õõutveäkka raajjâd fiʹttjõõzz da vuäinalm pueʹttiääiʹj energiaräʹtǩǩummšin Aanar kååʹdd voudda, särnn Aanar kåʹddjååʹđteeʹjj Tommi Kasurinen.
– Lij samai vääžnai tobdstõõttâd peiʹvv-viõʹǩǩe, tõn teknologiaid da tõn õõlǥtem mäddsuõʹrjid, što tobddâp ääʹšš pueʹrben, ǥu äʹšš šâdd ääiʹjpoddsiʹžžen še aivv tâʹvvbeäʹlnn, särnn Sääʹmteeʹǧǧ saaǥǥjååʹđteeʹjj Pirita Näkkäläjärvi.
Meäʹcchalltõõzzin seämma miõlin Aanar vuuʹd ääiʹjpoddsaž aaʹššin saǥstõõllmen. Snimldõõǥǥâst čiʹǯsbeäʹlnn Aanar kåʹddjååʹđteeʹjj Tommi Kasurinen, Sääʹmteeʹǧǧ vs. jieʹllemvueʹǩǩpiisar Maria Valkeapää, Sääʹmteeʹǧǧ I väärrsaaǥǥjååʹđteeʹjj Leo Aikio, Sääʹmteeʹǧǧ saaǥǥjååʹđteeʹjj Pirita Näkkäläjärvi, meäʹcchalltõõzz väʹlddjååʹđteeʹjj Juha S. Niemelä, Sääʹmteeʹǧǧ II väärrsaaǥǥjååʹđteeʹjj Tuomas Aslak Juuso, Meäʹcchalltõs Meäʹcctällõs Võ tååimtemjååʹđteeʹjj Jussi Kumpula da Aanar kåʹddhalltõõzz saaǥǥjååʹđteeʹj Jari Huotari.
Mäʹtǩǩ õõʹni seʹst še Sääʹmtiiʹǧǧin õhttsaž vuõinnlõõttmõõžž Meäʹcchalltõõzz väʹlddjååʹđteeʹjj Juha S. Niemeläin. Vuõinnlõõttmõõžžâst ǩiõttʼtõlleš vuuʹd ääiʹjpoddsaž aaʹššin seämma pueʹrr jurddjivuiʹm.
– Pueʹttiääiʹj ǩeâllʼjeei energiaräʹtǩǩummši kaartʼtummuž lââʹssen meeʹst liâ vuäʹnkõs plaanummuž vaʹǯǯtõõzz energia (energiamuõr) vuäǯǯmõõžžâst Aanar kååʹdd vuuʹdest da lij luândlaž vuõinnlõõttâd Meäʹcchalltõõzzin da õõutveäkka smiõttâd ääʹšš, särnn Aanar kåʹddjååʹđteeʹjj Tommi Kasurinen.
– Leäm samai tååđvaž mätkka, kååʹtt lij pieʹǩǩ Aanar kååʹdd da Sääʹmteeʹǧǧ juʹn mõõnni pââʹjest älggam õhttsaž ouddõsvuåppmõõžž. Meeʹst liâ jiânnai õhttsaž oouʹdeemnallšem ääʹšš da jiõnnâm kollai pueʹrben, ǥu viikkâp aaʹššid õõutveäkka ooudårra, tuâtt Sääʹmteeʹǧǧ saaǥǥjååʹđteeʹjj Pirita Näkkäläjärvi.
Mätkka vuässõʹtte Aanar kåʹddhalltõõzz saaǥǥjååʹđteeʹjj Jari Huotari, kåʹddjååʹđteeʹjj Tommi Kasurinen, Inergia Võ tååimtemjååʹđteeʹjj Tommi Koskinen di Sääʹmteeʹǧǧest saaǥǥjååʹđteeʹjj Pirita Näkkäläjärvi, I väärrsaaǥǥjååʹđteeʹjj Leo Aikio, II väärrsaaǥǥjååʹđteeʹjj Tuomas Aslak Juuso, vs. jieʹllemvueʹǩǩpiisar Maria Valkeapää di saaǥǥjååʹđteeʹj vieʹǩǩteeʹjj Niina Siivikko.
Lââʹssteâđ:
Aanar kåʹdd
Tommi Kasurinen
Kåʹddjååʹđteeʹjj
050 548 4123
tommi.kasurinen@inari.fi
Sääʹmteʹǧǧ
Pirita Näkkäläjärvi
Saaǥǥjååʹđteeʹjj
044 7533 766
pirita.nakkalajarvi@samediggi.fi
