Almoot uáppee sämikielâi káidusmáttááttâsân luuhâmihán 2025-2026!
Almottâttâm Sämikielâi káidusmáttááttâs piiloothaavâ máttááttâsân luuhâmihán 2025–2026 lii áávus 1.-31.3.2025. Almottâttâm kuáská sehe uđđâ uáppeid já sijjân, kiäh juátkih máttááttâsâst. Almoot uáppee máttááttâsân Hellewi-almottâttâmvuáháduvâst.
Mii máttááttâsâid já kiäs?
Káidusmáttááttâshaahâ fáálá sämikielâ (anarâš-, nuorttâlâš- tâi tavesämikielâ) vuáđumáttááttâs tâi luvâttâhmáttááttâs tievâsmittee sämikielâ máttááttâs 2 okkotiijme. Meid ovdâmáttááttâs uáppeeh pyehtih uásálistiđ haavâ máttááttâsân. Máttááttâs lii uáivildum sämiuáppeid, kiäh ääsih sämmilij päikkikuávlu kieldâi ulguubeln já kiäi perruu tâi suuvâ kielâ lii miinii Suomâst sarnum sämikielâin (anarâškielâ, nuorttâlâškielâ tâi tavesämikielâ). Sämikielâ ij taarbâš jo mättiđ vâi puáhtá uásálistiđ máttááttâsân. Haahâ ij faalâ máttááttâs rävisulmuid.
Kii puáhtá almottiđ?
Almottâttâm puáhtá toohâđ máttááttâs uárnejeijee, rehtor tâi huolâtteijee. Ko huolâtteijee taha almottâttâm, te mij tuáivup, ete sun lii ohtâvuođâst uáppee škoovlân já muštâl uáppee haalust já máhđulâšvuođâst uásálistiđ sämikielâi káidusmáttááttâsân.
Almottâttâm maŋa?
Almotteijee finnee nonnimviestâ šleđgâpoostân. Máttááttâsân uásálistmist suáppoo uáppee päikkikieldáin, ko almottâttâmäigi lii nuuhâm. Tast maŋa mij vuávááškyettip máttááttâsjuávhuid já sämikielâ máttááttâs luuhâmoornig oovtâstpargoost škovlâiguin. Máttááttâsjuávhuh hämmejuvvojeh jyehi sämikielân sierâ väldimáin uáppei ahe- já kielâtääsi, luuhâmoornig já škovlâsáátuid huámmášumán nuuvt pyereest ko máhđulâš. Máttááttâs uárnejuvvoo kielâin já juávhuin, main láá ucemustáá kyehti uáppee.
Vääldi huámmášumán, ete motomeh kaavpugeh (ei. Oulu já Ruávinjargâ) uárnejeh tavesämikielâ máttááttâs meid aldamáttááttâssân. Jis tun halijdah máttááttâsân, te vääldi ohtâvuođâ jieijâd škoovlâ rehtorân tâi kaavpug škovlâvirgádâhân!
Sämikielâi luuhâmive pištee škovliittâsâid já sierâ tääsi uánihis škovliittâsâid uárnee Säämi máttááttâskuávdáš, mii fáálá áinoo áámmátlâš oppâlájádâssân sämikielâi já -kulttuur škovlim Suomâst. Uáppáásm oppâlájádâs škovlimfalâldâhân! Lasseen aalmuglâšopâttuvah láá ain eenâb orniiškuáttám sämikielâi kuursâid.
Puáttee tábáhtusah sijjân, kiäh láá perustum sämikielâi káidusmáttááttâsâst
Infotilálâšvuotâ vaanhimáid, kiäh láá perustum káidusmáttááttâsâst
Tuorâstuv 13.3.2025 tme 18.00–19.00
Servâmliŋkkâ: https://tinyurl.com/etasaameinfo
Luvâttâhuáppei eehid uáppeid já sii huolâtteijeid
Koskoho 19.3.2025 tme 18.00–19.00
Servâmliŋkkâ: https://tinyurl.com/lukioilta
Tiervâpuáttim mieldi sämikielâi káidusmáttááttâsân!
Lasetiäđuh:
Hanna Helander, hahâhovdâ
Ucjuv kieldâ
hanna.helander@edu.utsjoki.fi
040 701 2094
Anne Olli, hahâkoordinaattor
Sämitigge
anne.olli@samediggi.fi
040 687 5989
