Luuhâp - looǥǥât - lohkat - luetaan - Ávus oppâtiijmeh kielâohhoost
Kielâokko viättoo 19.-25.10.2026. Säämi nettivuáđusâš máttááttâs uárnee oho kunnen jo ärbivuáválijd ávus oppâtiijmijd. Oppâtiijmij teeman lii luuhâm. Luuhâm lii meid máttááttâs luuhâmive teema, mii uáinoo miätá luuhâmive máttááttâsâst já mii ornim ávus tooimâst.
Kielâoho teeman lii kielâi iäláskittem já oovdân pajaneh eromâšávt anarâš- ja nuorttâlâškielâ sehe pitteem- já umesämikielâ. Eromâšávt jieijâs eenikielâ tâi ucceeblovokielâ luuhâm puáhtá nanodiđ ohtâvuođâ kielân já kulttuurân. Kielâi máttááttâs lii ohtâ tehálumosijn vuovijn iäláskittiđ kielâid já Säämi nettivuáđusâš máttááttâs lii-uv tehálâš tuáimee sämmilij päikkikuávlu ulguubeln.
Oppâtiijmij čuásáttâhjuávkkun láá ovdâ- já vuáđumáttááttâs uáppeeh já nube tääsi uáppeeh, mutâ oppâtiijmeh láá áávus puohháid, kiäid sämikielah kiäsutteh. Sämikielâ ij taarbâš mättiđ ovdiist vâi puáhtá uásálistiđ tijmijd. Tijmijd puáhtá uásálistiđ jieškote-uv uáppee jiečânávt tâi oles luokka ohtsijn rustigijn. Oppâtijmijd ij taarbâš almottâttâđ muuneeld já haalijddijn puáhtá uásálistiđ puoh oppâtijmijd. Tiijmij ääigi lii máhđulâš koijâdiđ já savâstâllâđ chatist. Oppâtiijmeh iä vyerkkejuu.
Oppâtiijmij ulmen lii lasettiđ sämikielâi oinum já kullum. Oppâtiijmeh tuállojeh káidusohtâvuođâiguin Microsoft Teamsist. Jyehi Suomâst ellee sämikielân, ađai tavesämikielân, anarâškielân já nuorttâlâškielân, lii jieijâs oppâtijme já jieijâs uásálistemliŋkkâ.
Anarâškielâ
Majebargâ 20.10. tijme 9–9.45
Máttáátteijen Tiina Jäppinen
Čuásáttâhjuávkku: 0.–3. luokah
Uásálist čuákkimân spokkâlmáin taa
Nuorttâlâškielâ
Koskokko 21.10. tijme 9–9.45
Máttáátteijen Kia Olin
Čuásáttâhjuávkku 4.–6. luokah
Uásálist čuákkimân spokkâlmáin taa
Orjâlâškielâ
Tuorâstâh 22.10. tijme 9–9.45
Máttáátteijen Joni Saijets
Čuásáttâhjuávkku paješkovlâ já nubbe tääsi
Uásálist čuákkimân spokkâlmáin taa
Lasetiäđuh
Laura Njunnas
Hovdâ, Ucjuv kieldâ
laura.njunnas@edu.utsjoki.fi
040 701 2094
Anni-Sofia Niittyvuopio
Koordinaattor, Sämitigge
anni-sofia.niittyvuopio@samediggi.fi
040 687 5989
Säämi nettivuáđusâš máttááttâs
Säämi nettivuáđusâš máttááttâs fáálá anarâš-, nuorttâlâš- já orjâlâškielâ nettivuáđusii máttááttâs ovdâmáttááttâs já vuáđuškoovlâ uáppeid sehe nube tääsi uáppeid sämmilij päikkikuávlu ulguubeln.
Máttááttâs ulmen lii pyerediđ sämikielâi máttááttâs juksâmvuođâ já fastâdittiđ nettivuáđusii máttááttâs eromâšávt tobbeen, kost aldamáttááttâs orniimân iä lah iävtuh.
Haavâ haaldâš Ucjuv kieldâ, koordinist Sämitigge já ruttâd máttááttâs- já kulttuurministeriö. Tääl máttááttâsâst láá 198 uápped 117 škoovlâst já 46 kieldâst.
Säämi nettivuáđusâš máttááttâs
Kielâokko
Kielâoho ulmen lii finniđ sämikieláid huámmášume, oinum já kullum ohtsâškode puoh suorgijn Suomâst, Ruotâst já Taažâst. Sämikielah láá teháliih ovtâskâs kielâkevtteid, sämiaalmugân já meid syemmilii ohtsâškoodán. Sämikielah tuáimih viestâdem niävvun ja toh láá uási identiteetist, kulttuuräärbist já oohtânkulluuvâšvuođâst.
Jieijâs kielâ oinum argâpeeivist lii tehálâš sämikielâi kevtteid, sämikielâi sajattâhân já oohtânkulluuvâšvuođâ toobdon. Sämikielâi oinum čáittá meid kielâ tuhhiittem ohtsâškoddeest. Sämitigge olášut Kielâoho oovtâstpargoost Ruotâ já Taažâ Sämitigijguin já puávdee priivaat já almos ornijduumijd, irâttâsâid já eres tuáimeid pyehtiđ oovdân já kevttiđ sämikielâid. Návt syemmilâš ohtsâškodde uáppá eenâb já pyerebeht iberdiđ sämikielâid, sämmilii kulttuur já sämmilii ohtsâškodde-eellim.
