Luuhâp - looǥǥât - lohkat - luetaan - Rabas oahppodiimmut sámegielaid vahkus
Sámegielaid vahkku dollojuvvo 19.-25.10.2026. Sámi neahttavuđot oahpahus lágida vahku gudnin árbevierrun šaddan rabas oahppodiimmuid. Oahppodiimmuid temán lea lohkan. Lohkan lea maiddái oahpahusa lohkanjagi temá, mii oidno miehtá lohkanjagi oahpahusas ja rabas doaimmas, man mii ordnet.
Sámegielaid vahku temán lea gielaid ealáskahttin ja ovdan loktanit erenomážit anáraš-, nuortalaš-, bihtán- ja ubmisámegielat. Erenomážit iežas eatnigiela dahje unnitlogugiela lohkan sáhttá nannet oktavuođa gillii ja kultuvrii. Gielaid oahpahus lea okta dehálamos vugiin ealáskahttit gielaid ja Sámi neahttavuđot oahpahus leage dehálaš doaibmi sámiid ruovttuguovllu olggobealde.
Oahppodiimmuid ulbmiljoavkun leat ovda- ja vuođđooahpahusa oahppit ja nuppi dási stuđeanttat, muhto oahppodiimmut leat rabas buohkaide geat leat beroštuvvan sámegielain. Sámegiela ii dárbbaš máhttit ovddežis vai sáhttá oassálastit oahpahussii. Diimmuide sáhttá searvat guđege oahppi iehčanasat dahje olles luohkká oktasaš rusttegiin. Oahppodiimmuide ii dárbbaš almmuhit iežas ovddalgihtii ja jos háliida, sáhttá oassálastit buot oahppodiimmuide. Diimmuin sáhttá maiddái jearrat ja ságastallat chat bokte. Oahppodiimmut eai báddejuvvo.
Oahppodiimmuid mihttomearrin lea lasihit sámegielaid oinnolašvuođa ja gulloma. Oahppodiimmut dollojit gáiddusoktavuođa bokte Microsoft Teamsas. Juohke Suomas ealli sámegillii, dahjege davvisámegillii, anárašgillii ja nuortalašgillii leat iežaset oahppodiimmut ja iežas oassálastinliŋka.
Anárašgiella
Maŋŋebárga 20.10. dii. 9–9.45
Oahpaheaddjin Tiina Jäppinen
Ulbmiljoavku 0.–3. luohkát
Searvva čoahkkimii deaddilemiin dás
Nuortalašgiella
Gaskavahkku 21.10. dii. 9–9.45
Oahpaheaddjin Kia Olin
Ulbmiljoavku 4.–6. luohkát
Searvva čoahkkimii deaddilemiin dás
Davvisámegiella
Duorastat 22.10. dii. 9–9.45
Oahpaheaddjin Joni Saijets
Ulbmiljoavku badjeskuvla ja nubbi dássi
Searvva čoahkkimii deaddilemiin dás
Lassidieđut
Laura Njunnas
Hoavda, Ohcejoga gielda
laura.njunnas@edu.utsjoki.fi
040 701 2094
Anni-Sofia Niittyvuopio
Koordináhtor, Sámediggi
anni-sofia.niittyvuopio@samediggi.fi
040 687 5989
Sámi neahttavuđot oahpahus
Sámi neahttavuđot oahpahus fállá anáraš-, nuortalaš ja davvisámegiela neahttavuđot oahpahusa ovdaoahpahusa ja vuođđoskuvlla oahppiide ja maid nuppi dási stuđeanttaide sámiid ruovttuguovllu olggobealde.
Oahpahusa mihttomearrin lea buoridit sámegielaid oahpahusa juvssahahttivuođa ja stáđásmahttit neahttavuđot oahpahusa erenomážit doppe, gos lagasoahpahusa lágideapmái eai leat eavttut.
Prošeavtta hálddaša Ohcejoga gielda, koordinere Sámediggi ja ruhtada oahpahus- ja kulturministeriija. Dál oahpahusas stuđere 198 oahppi 117 skuvllas ja 46 gielddas.
Sámegielaid vahkku
Sámegielaid vahku mihttomearrin lea oažžut sámegielaide fuomášumi, čalmmustahttit daid ja oažžut daid gullot buot servodaga oassesurggiin Suomas, Ruoŧas ja Norggas. Sámegielat leat dehálaččat ovttaskas giellageavaheaddjái, sámi álbmogii ja maiddái suopmelaš servodahkii. Sámegielat doibmet gulahallama gaskaoapmin ja dat leat oassin identitehtas, kulturárbbis ja oktiigullevašvuođas.
Giela oidnon árgabeaivvis lea dehálaš, ii dušše sámegielaid geavaheaddjiide, muhto maiddái sámegielaid sajádahkii ja oktiigullevašvuođa dovdui. Sámegielaid oidnon čujuha maiddái ahte giella lea dohkkehuvvon servodagas. Sámediggi ollašuhttá Sámegielaid vahku ovttasbarggus Ruoŧa ja Norgga Sámedikkiin ja bovde priváhta ja almmolaš organisašuvnnaid, fitnodagaid ja eará doibmiid buktit ovdan ja geavahit sámegielaid. Dainna lágiin suopmelaš servodat oahppá eanet ja buorebut áddet sámegielaid, sámekultuvrra ja sámi servodateallima.
