Ive 2024 Kollekielâ-kielâpalhâšume Pekka Sammallahtin já Sig-Britt Perssonin
Pekka Sammallahti já Sig-Britt Persson.
Ive 2024 tave-eennâmlâš sämikielâ kielâpalhâšume Kollekielâ lii mieđettum sämikielâ emeritusprofessor Pekka Sammallahtin já maadâsämikielâ kielâpargee Sig-Britt Perssonin sunnuu merhâšittee pargoost sämikielâi ovdedem oovdân.
Palhâšumelävdikodde meridij jyehiđ palhâšume kyevti iävtukkâsân já návt adeliđ huámmášume raajijd rastaldittee kielâpaargon, mii lii oovtâstpargo sehe raajij rasta já meid sierâ sämikielâi kooskâ. Palhâšume finnejeijeeh lává jieijâs pargoin ovdedâm maaŋgânáál sämikielâid.
Sig-Britt Persson finnee Kollekielâ-palhâšume movtijdittee pargostis sämikielâ oovdedmân. Persson lii porgâm oles pargoelimis sämikielâ ovdedem oovdân. Sun lii porgâm iärásij lasseen jurgâleijen, stivrejeijen, toimâtteijen já kielâkonsulttin.
Pekka Sammallahti finnee Kollekielâ-palhâšume merhâšittee já kuhesáigásii pargostis sämikielâi ovdedem oovdân. Sun lii haahâm vijđes mättim kielâin já lii juáhám tom oppâkiirjij, čaabâkirjálâšvuođâ já akateemisii pargos peht já meid eres ohtâvuođâin. Suu faallâm kielâiše lii lamaš stuorrâ iššeen maŋgáid suhâpuolváid sämisiärvusist.
Palhâšume juohhui 11. tove
Taažâ tooimâi iššeedenâmin taan ive, ko Kollekielâ palhâšume juohhui 11. tove. Palhâšume jyehimtilálâšvuotâ uárnejui Oslost 22.10.2024 toollum sämiaašij ministerij já Sämitiigij saavâjođetteijei čuákkim ohtâvuođâst.
– Lii stuorrâ ilo já kunnee jyehiđ palhâšume taan kuáhtásân. Sig-Britt Persson já Pekka Sammallahti ovdedává maaŋgâid peelijd kielâpargoost sämikielâi pyerrin, taiđâlii já čaabâkirjálâšvuođâ peeleest ain akateemisii já kielâtieđâlii piälán. Kuohtuuh lává jieijâs naalijn lamaš kuhháá sämikielâi ovdedempargo njunošist, iätá Taažâ kieldâ- já kuávluminister Erling Sande.
Palhâšume lii 15 000 eurod já tot juáhhoo finnejeijei kooskâ.
Palhâšumelävdikoddeest lijjii Helén Storelv-Rabone, Aili Keskitalo, Leena Niittyvuopio-Jämsä, Tauno Ljetoff já Per-Martin Israelsson.
Palhâšume láá vuáđudâm Taažâ, Suomâ ja Ruotâ sämiaašijn västideijee ministereh oovtâst tai enâmij Sämitiigij saavâjođetteijeiguin. Palhâšume juohhui vuossâmuu tove ive 2004 já tot juáhhoo jyehi nube ive. Palhâšume mieđettuvvoo ovtâskâsulmuid tâi siärváduvváid, kiäh láá porgâm ansulávt já merhâšitteht sämikielâ ovdedem já siäiluttem oovdân.
Lasetiäđuh
