Sig-Britt Persson ja Pekka Sammallahti oažžuba Gollegiella bálkkašumi 2024

Árvvoštallanlávdegoddi lea válljen juohkit bálkkašumi guovtti evttohassii čalmmustahttin dihte rádjerasttideaddji giellabarggu, mii lea sihke riikkarájiid ja iešguđetge sámegielaid rasttildeaddji ovttasbargu. Bálkkašumi vuoitit leaba iežaska bargguin ovddidan sámegiela máŋgga láhkái.

Sig-Britt Persson oažžu Davviriikkaid sámi giellabálkkašumi – Gollegiella 2024 iežas čielga jiena ja iežas movttiidahtti giellaovddidanbarggu ovddas. Persson lea bargan sihke njuolga ja eahpenjuolga lullisámegiela ovddidemiin olles su bargoeallima. Son lea earret eará bargan jorgaleaddjin, bagadallin, journalistan ja giellakonsuleantan. Muitaluvvo ahte son lea áŋgir iežas doaimmas sámi servodagas ja lea maid earáide veahkkin ja dorvun.

Pekka Sammallahti oažžu Davviriikkaid sámi giellabálkkašumi – Gollegiella 2024 iežas mávssolaš ja guhkes áiggi barggu ovddas sámegielaid ovddidemiin. Son lea háhkan alla máhtu gielaid birra, man lea earáiguin árvasit juogadan, sihke oahppogirjjiid bokte ja dan olis movt son lea čáppagirjjálašvuođa buktán olámuddui, ja iežas akademalaš barggu ja dan ovddas go lea juogadan iežas máhtu iešguđet oktavuođain. Giellaveahkki man son fállá, lea stuora veahkkin ollugiidda miehtá sámi servodaga, máŋggaid buolvvaide.

Guokte árvvolaš vuoiti

– Lea stuora illu ja gudni geiget bálkkašumi dán guovtti vuoitái. Sig-Britt Persson ja Pekka Sammallahti ovddideaba máŋga beali sámi giellabarggus – dáiddalaš ja čáppagirjjálaš beali rájes gitta akademalaš ja gielladiehtaga dássái. Goappašagat leaba guhkes áiggi leamaš njunnošis ovddideame sámegielaid, lohká gielda- ja guovloministtar Erling Sande (Gb).

Geigejuvvo oktanuppelogát geardde

Norga lea 2024 verdderiikkan geiget Davviriikkaid sámi giellabálkkašumi  – Gollegiella. Bálkkašupmi geigejuvvui davviriikkaid ministariid ja sámediggepresideanttaid čoahkkimis Oslos golggotmánu 22. beaivvi.

Bálkkašumi supmi lea 15 000 euro ja das juhkkojuvvo bealli goabbáige.

Davviriikkaid sámi giellabálkkašupmi 2024 geigejuvvo oktanuppelogát geardde. Giellabálkkašumi leat ásahan Norgga, Ruoŧa ja Suoma ministarat, geain leat ovddasvástádus sámi áššiin, ja dáid riikkaid sámediggepresideanttat. Bálkkašupmi geigejuvvo juohke nuppi jagi ovttaskas olbmuide, organisašuvnnaide dahje ásahusaide mat leat árjjalaččat bargan sámegielaid ovddidemiin.

Árvvoštallanlávdegottis 2024 leat leamaš Helén Storelv-Rabone (jođiheaddji), Aili Keskitalo, Leena Niittyvuopio-Jämsä, Tauno Ljetoff ja Per-Martin Israelsson.

Davviriikkalaš čoahkkin

Suoma, Ruoŧa ja Norgga beale sámediggepresideanttain ja ministariin, geain lea ovddasvástádus sámi áššiin, lea jagi 2000 rájes leamaš joatkevaš ovttasbargu, ja sii gávnnadit juohke nuppi jagi ságastallat ja gieđahallat oktasaš sámi áššiid. Jagis 2024 leat fáddán earret eará teknologiija, rekrutteren ja bargu duohtavuođaguorahallamiid ja soabadeami oktavuođas.

Preassadieđáhus Norgga ráđđehusa neahttasiidduin