Eeʹjj 2024 Gollegiella-ǩiõllpäʹlǩǩõõzz vuäǯǯjen Pekka Sammallahti da Sig-Britt Persson
Pekka Sammallahti da Sig-Britt Persson.
Eeʹjj 2024 tâʹvvjânnmallaš sääʹm ǩiõllpäʹlǩǩõõzz Kåʹllǩiõll (Gollegiella) lie vuäǯǯam sääʹmǩiõl emeritusprofessor Pekka Sammallahti da saujjsääʹm ǩiõlltuâjjlaž Sig-Britt Persson suänai miârkteei tuâjast sääʹmǩiõli õuʹdde.
Päʹlǩǩõsluʹvddkåʹdd tuʹmmii jueʹǩǩed paʹlǩǩõõzz kuõiʹt ooumže rââst raaʹji vuällai ǩiõlltuâj ciʹsttjem diõtt, mii lij nuʹtt riikk raaʹji rââst vuällai ǥu jeeʹres sääʹmǩiõli kõskksaž õhttsažtuâjj. Paʹlǩǩõõzz vuäǯǯai lie tuâjaineez õõuʹdääm sääʹmǩiõlid määŋg nalla.
Sig-Britt Persson vuäǯǯ Gollegiella-päʹlǩǩõõzz älšsmõʹtti tuâjstes sääʹmǩiõli õõuʹdeem diõtt. Persson lij toiʹmmjam čõõđ tuâjj-jieʹllmes sääʹmǩiõli õõuʹdeem pueʹrren. Son lij toiʹmmjam jeeʹrab mieʹldd jåårǥlõʹttjen, ohjjeeʹjen, tooimteeʹjen da ǩiõllkonsulttân.
Pekka Sammallahti vuäǯǯ Gollegiella-päʹlǩǩõõzz miârkteei da kuʹǩesäiggsaž tuâjstes sääʹmǩiõli õõuʹdeem diõtt. Son lij haʹŋǩǩääm veiddsõs silttummuž ǩiõlin da lij juâkkam silttummšes äävǩiõđi mättǩiiʹrji, mooččâdǩeerjlažvuõđ, akateemlaž tuâjas mieʹldd da jueʹjjeeʹl silttummšes jeeʹres vuâlain. Suu taʹrjjeem ǩiõllveäʹǩǩ lij leämmaž jõnn vieʹǩǩen sääʹmõutstõõzzâst määŋg puõlvvõʹǩǩe.
Päʹlǩǩõõzz juõʹǩǩeš 11. vuâra
Taarrjânnam toiʹmmji eeʹžžedjânnmen taʹnni, ǥu Gollegiella-ǩiõllpäʹlǩǩõõzz juõʹǩǩeš 11. vuâra. Päʹlǩǩõsjueʹǩǩempoodd jäʹrjsteš Oslost 22.10.2024 tuõʹllʼjum sääʹmaaʹššiministeeʹri da Sääʹmtiiʹǧǧi saaǥǥjååʹđteeʹji såbbar õhttvuõđâst.
– Lij jõnn kuärgg da cistt jueʹǩǩed päʹlǩǩõõzz suännaid. Sig-Britt Persson da Pekka Sammallahti õõuʹdee määŋgaid pieʹlid ǩiõlltuâjast sääʹmǩiõli pueʹrren, čeäppõõzzlaž da mooččâdǩeerjlaž peäʹlest sa akateemlaž da ǩiõlltiõđlaž peälla. Kuhttu lie jiiʹjjes nalla leämmaž kuuʹǩǩ ääiʹj sääʹmǩiõli õõuʹdeemtuâj njonnsest, särnn Taarr kåʹdd- da vuʹvddminister Erling Sande.
Päʹlǩǩõs-summ lij 15 000 euʹrred da tõn jueʹjjet päʹlǩǩõsvuäǯǯji kõõsk.
Päʹlǩǩõsluʹvddkådda kuʹlle Helén Storelv-Rabone, Aili Keskitalo, Leena Niittyvuopio-Jämsä, Tauno Ljetoff da Per-Martin Israelsson.
Päʹlǩǩõõzz lie aalǥtam Taarr, Lääʹdd da Ruõcc sääʹmaaʹššin vaʹstteei ministeeʹr da täi jânnmi sääʹmtiiʹǧǧi saaǥǥjååʹđteei. Päʹlǩǩõõzz juõʹǩǩeš vuõss vuâra eeʹjjest 2004 da tõn jueʹjjet juõʹǩǩ nuuʹbb eeʹjj. Päʹlǩǩõõzz miõđât privattoummid leʹbe õõutstõõzzid, kookk lie låånstam pääiʹǩes toiʹmmjeeʹl miârkteei nalla sääʹmǩiõl õõuʹdeem, õõudâsviikkâm da seillmõõžž õuʹdde.
Lââʹssteâđ
