Mainâseh, kirjeh já kielâhárjuttâsah muttojeh digiháámán – škovlim- já oppâmateriaal toimâttuvâst lii huššâ!
Sämitigge lii pálkkááttâm nelji proojeektpargee taan kiäsán: oovtâ jieškote-uv sämikielân já lasseen digimateriaalpargee. Anarâškielâ- já tavesämikielâpargeeh láá pálkkááttum sämikielâi káidusmáttááttâshaahân já ulmen lii lasettiđ eromâšávt káidusmáttááttâsâst tárbulâš digimateriaal.
Tavesämikielâ oppâmateriaalpargen tuáimá taan keesi Solja Magga, kote ráhtá Gea 2 -kirjeest digitaallâš heiviittâs Cloubi-ohjelmân. Digitaallâš materiaalist lii máhđulâš kuldâliđ puoh kirje pittáid já saanijd jeđe hárjuttâllâđ pitái siskáldâsâid pargopitáiguin. “Keessiv lii tárguttâs finniđ puoh paddiimijd valmâšin”, Solja iätá.
Meiddei anarâškielâ pargee Anne Seipiharju ráhtá paddiimijd. Sun parga Hitruu-kirjij paddiimijguin já eres digimateriaalijguin. Säämi máttááttâskuávdáá medialinje jottáám Anne illood jieijâs syergi kesipargoost já ana jienâstudiost porgâm ávhálâžžân. “Uáppá lase já jienâigijn porgâm šadda ruutiinin.”
Kati Ljetoff parga nuorttâlâškieláin. Sun čáálá puárásub mainâsijd uđđâ čäällimvyevi mield, ovdâmerkkân Jiäʹnnǩiõll -luuhâmkirjijn, mon lasseen sun iälá nurâmin eenikielâlâš sárnoin muádi uánehis mainâsijd, maid sun talle litterist já čáálá putesin. “Taat kesipargo nuorttâlâškieláin lii tuođâi šiev äšši já pyeri máhđulâšvuotâ kevttiđ kielâ já oppâđ ain lase” Säämi máttááttâskuávdáá nuorttâlâškielâ já -kulttuur linjeest taan kiiđâ valmâštum Kati muštâl.
Digimateriaalpargen tuáimee Emilia Nieminen arvâl, ete lii lamaš suotâs máttááttâllâđ Cloubi-ohjelm já uáiniđ taam pele škovlâmaailmist. Sun lii amnâsmáttáátteijee já juuđij moonnâm luuhâmpaajeest anarâškielâ já -kulttuur linje. Keessiv sun sirdá oppâkirjemateriaalijd Cloubin, mon lasseen sun máhđulávt meid jurgâl hárjuttâskirjijd anarâškielân.
