Máttááttâs- já kulttuurministeriö sämimáttááttâs ovdedempargojuávkku porgâškuát Anarist

Máttááttâsminister Li Andersson já tieđâ- já kulttuurminister Hanna Kosonen lává asâttâm sämikielâi já sämikielâlii máttááttâs ovdedempargojuávhu. Pargojuávhu pargon lii tarkkuđ sämikielâlii arâšoddâdem, kulttuur- já kielâpiervâltooimâ, sämimáttááttâs já -škovlim tile ohtân olesvuottân. Pargojuávkku čokkân vuossâmuu tove Anarist njuhčâmáánu 11. peeivi.

Sämitige saavâjođetteijee Tiina Sanila-Aikio ana pargojuávhu asâttem merhâšittee äššin já toos asâttum pargoid tergâdin. – Lii tuođâi tehálâš, ete arâšoddâdem, máttááttâs já škovlim tárkkojeh ohtân väldikodálâš olesvuottân já sämimáttááttâsân rähtiškyettih pissoo vuáđu meid sämmilij päikkikuávlu ulguubeln, iätá Sanila-Aikio.

”Ko sämmilij kielâliih vuoigâdvuođah láá miäruštâllum lahâaasâtmist sämmilij päikkikuávlust já ton ulguubeln sierâ taasijn, te lii tárbu tarkkuđ sämimáttááttâs tile ohtân olesvuottân väldikodálávt já puoh škovlimtaasijn.”, pahuduvvoo asâttemmiärádâsâst.

Pargojuávhu pargon lii toohâđ tárbulijd iävtuttâsâid:

1. Sämikielâi já sämikielâlii máttááttâs já škovlim oovdedmân sehe finnim naanoodmân oles enâmist, já máttááttâspargovievâ finnim naanoodmân;
2. Sämikielâlii arâšoddâdem já sämmilij kulttuur- já kielâpiervâltooimâ oovdedmân já finnim naanoodmân sehe arâšoddâdempargovievâ finnim naanoodmân;
3. Sämikielâlii oppâmateriaal finnim turviimân;
4. Sämikielâi , sämmilij historjá já kulttuur tubdâm lasseetmân eromâšávt škovlâmáttááttâsâst;
5. Tave-eennâmlii škovlâoovtâstpargo naanoodmân sämimáttááttâsâst, já
6. Sämikielâlij sosiaal- já tiervâsvuođâsyergi pargovievâ finnim turviimân já škovlimtáárbui muuneedmân.

Máttááttâs- já kulttuurministeriö lii nomâttâm pargojuávhu saavâjođetteijen jođetteijee Tiina Silander máttááttâs- já kulttuurministeriöst já jesânin čuávuváid ulmuid: máttááttâsneuvos Anna Mikander, proojeektvuávájeijee Erno Hyvönen já sierânâsvuávájeijee Mikko Cortes-Tellez máttááttâs- já kulttuurministeriö, haldâttâsčällee Maija lles riehtiministeriö, máttááttâsneuvos Leena Nissilä Máttááttâshaldâttâs, čuovviittâstooimâ pajetärhisteijee Kari Torikka Laapi kuávluhaldâttâhvirgádâh, škovlimčällee Ulla Aikio-Puoskari já kielâtorvočällee Anne-Kirste Aikio Sämitigge, sierânâsäššitobdee Jarkko Lahtinen Suomâ Kieldâlitto, rehtor Eeva-Liisa Rasmus-Moilanen Säämi máttááttâskuávdáš, Sinikka Labba Iänuduv kieldâ, čuovviittâshovdâ Ilkka Korhonen Aanaar kieldâ, čuovviittâstoimâjođetteijee Anne Onnela Suáđigil kieldâ, čuovviittâstoimâjođetteijee-rehtor Laura Arola Ucjuv kieldâ, peivikiäju jođetteijee Eija Salmi Oulu kaavpug, palvâlemkuávluhovdâ Kai Väistö Ruávinjaargâ kaavpug já ollâopâttuv lehtor Marja-Liisa Olthuis Oulu ollâopâttâh.

Pargojuávhu äššitobdeečällen tuáimih säämi káidusmáttááttâshaavâ koordinaattor Arla Magga já säämi kielâpiervâlstivrejeijee Petra Kuuva Sämitiggeest sehe máttááttâsneuvos Susanna Rajala Máttááttâshaldâttâsâst.

Pargojuávkku čokkân vuossâmuu tove Anarist Sajosist njuhčâmáánu 11. peeivi.

Lasetiäđuh:

Ulla Aikio-Puoskari, ulla.aikio-puoskari(at)samediggi.fi

Ánne-Kirste Aikio, anne-kirste.aikio(at)samediggi.fi

Arla Magga, arla.magga(at)samediggi.fi

Petra Kuuva, petra.kuuva(at)samediggi.fi