Pargopyereestvaijeem já aargâ šiev vuáháduvah kuávdáást sämmilii arâšoddâdem ovdedempeeivijn
Sämmilij arâšoddâdem ovdedempeeivih čoggii sämikielâlii arâšoddâdem áámmátulmuid Luoston.
Sämmilii arâšoddâdem ovdedempeeivih uárnejuvvojii Luostost 27.–28.9. Laapi kuávluhaldâttâhvirgáduv já Sämitige oovtâstpargon. Ovdedempeeivij čuosâttâhjuávkku lâi sämmilii arâšoddâdem oles pargojuávkku kiedist njunoštáásán, nuuvt eenikielâlii arâšoddâdem ko meid kielâpiervâlij peln. Pääihi oolâ čokkânii suulân 20 uásálisted pirrâ Suomâ.
Ovdedempeeivij ohjelmist kieđâvuššii eereeb iärrás sämmilii arâšoddâdem tile, pargoost vaijeem já naavcâi macâttem pargo maŋa sehe aargâ šiev vuáháduvâid. Pargoost vaijeem pargopáájá lâi puávdejum toollâđ Leena Fofonoff psykososiaallii torjuu ohtâdâh Uuvjâst.
Aargâ šiev vuáháduvváid kyeskee uási savâstâlmijn vuoijuu noomâs mield arâšoddâdemaargâ šiev vuáháduvváid já tai jyehimân sehe äigikyevdilis hástusáid já tai čuávdimân. Tai savâstâlmij sehe Sämitige ovdebij dokumentij vuáđuld kielâpiervâlstivrejeijee Niina Aikio-Siltala ráhtá arâšoddâdemohtâduvâi pargo toorjân peividum Aargâ vuáháduvâi raavâkirjáá.
– Sämmilii arâšoddâdmist pargeh uccâ ohtâduvâin, te piäiválâš áámmátlâš viärdásâštoorjâ páácá uccen já äigi vijđásub pedagogisâš savâstâlmáid lii jiešalnees uáli raijâšum. Ovdedempeivijd tuáivuh ain enâmustáá eidu šiev vuáháduvâi jyehim já viärdásâštoorjâsavâstâlmijd, já taan táárbun mij viigâim västidiđ taan tove väärridmáin eromâš ennuv savâstâllâmääigi äššitobdeeluvâldâlmij sajan. Pargopyereestvaijeem nubben stuorrâ teeman lâi macâttâs vuáđuld meid luhostum valjim. Mun lam tuođâi tuđâvâš olesvuotân, iätá Aikio-Siltala.
Sämmilii arâšoddâdem ovdedempeeivih láá uárnejum tááláá häämist ive 2017 rääjist vistig kulttuur- já kielâpiervâltooimâ ovdedempeivin já maŋeláá sämmilii arâšoddâdem oles pargoviehân oovtâstpargoost KVI:áin, já toh uárnejuvvojeh ohtii teikâ kuohtii ivveest. Ovdedempeeivij ulmen lii viärmádâttâđ, jyehiđ vuáttámušâid já viärdásâštorjuu sehe čokkâniđ äigikyevdilis škovlimfáádá piällás.
Lasetiäđuh:
Sämitigge
Niina Aikio-Siltala
Kielâpiervâlstivrejeijee
niina.aikio-siltala(at)samediggi.fi
010 839 3115
Laapi kuávluhaldâttâhvirgádâh
Satu Pieski
Máttááttâstooimâ pajetärhisteijee
satu.pieski(at)avi.fi
0295 017 366
