Bargoburesveadjin ja árgga buorit geavadat váldoáššin sámi árrabajásgeassima ovddidanbeivviin

Sámi árrabajásgeassima ovddidanbeaivvit ordnejuvvojedje Luostos 27.–28.9. Lappi guovlohálddahusdoaimmahaga ja Sámedikki ovttasbargun. Ovddidanbeivviid ulbmiljoavkun lei sámi árrabajásgeassima olles bargoveahka dábálaš bargiin gitta hoavddaid rádjai, sihke eatnigielat árrabajásgeassima ja giellabesiid bealde. Báikki ala čoahkkanedje sullii 20 oasseváldi miehtá Suoma.

Ovddidanbeivviid prográmmas gieđahallojedje earret eará sámi árrabajásgeassima dilli, barggus veadjin ja barggu maŋŋel návccaiduvvan ja maiddái árgga buorit geavadat. Barggus veadjima bargobáji doallat lei bovdejuvvon Leena Fofonoff psykososiála doarjaga ovttadat Uvjjas.

Árgga buriid geavadiid guoski oasi ságastallamiin biddjui deaddu namas mielde árrabajásgeassima árgga buriid geavadiidda ja daid juohkimii sihke áigeguovdilis hástalusaide ja daid burgimii. Dáid ságastallamiid sihke Sámedikki ovddit dokumeanttaid vuođul giellabeassejođiheaddji Niina Aikio-Siltala ráhkada árrabajásgeassinovttadagaid doarjjan beaiváduvvon Árgga geavadiid rávvagiid.

– Sámi árrabajásgeassimis barget smávva ovttadagain nu, ahte árgga ámmátlaš veardásašdoarjja báhcá uhcánažžan ja áigi viidásut pedagogalaš ságastallamiidda lea oppa lohkkái hui uhcán. Ovddidanbeivviide sávve čielgasit eanemus justa buriid geavadiid juohkima ja veardásaččaiguin ságastallamiid, ja dán dárbui mii geahččaleimmet vástidit dán háve nu, ahte várriimet hui olu háleštanáiggi áššedovdilogaldallamiid sadjái. Bargobures-veadjin nubbin stuorra temán lei máhcahaga vuođul maiddái lihkostuvvan válljen. Lean duođaige duđavaš oppalašvuhtii, muitala Aikio-Siltala.

Sámi árrabajásgeassima ovddidanbeaivvit leat ordnejuvvon dálá hámis jagi 2017 rájes álggos kultur- ja giellabeassedoaimma ovddidanbeaivin ja maŋŋá dasto olles sámi árrabajásgeassima bargovehkii ovttasbarggus AVI:in, ja dat lágiduvvojit 1–2 geardde jagis. Ovddidanbeivviid mihttomearrin lea fierpmáiduvvat, juohkit vásáhusaid ja veardásašdoarjaga ja maiddái čoahkkanit áigeguovdilis skuvlenfáttá ollái.

Lassidieđut:

Sámediggi
Niina Aikio-Siltala
Giellabeassejođiheaddji
niina.aikio-siltala(at)samediggi.fi
010 839 3115

Lappi guovlohálddahusdoaimmahat
Satu Pieski
Oahpahusdoaimma allagohcci
satu.pieski(at)avi.fi
0295 017 366