President Alexander Stubb já Sämitige teivâdmist lijjii lieggâ tubdâmušah Anaris
Suomâ täsivääldi president Alexander Stubb teivâdij Sämitige vástuppeeivi 24.5. Säämi kulttuurkuávdáš Saijoosist Anarist. Pääihi oolâ lijjii puávdejum puoh Sämitige jesâneh já meid motomeh virgeulmuuh.
-Mii teivâdem tubdâmušah lijjii lieggâseh, ovdedeijeeh já positiivliih, iätá Sämitige saavâjođetteijee Pirita Näkkäläjärvi.
Suulân tiijme kukkosii teivâdem ääigi Sämitige stiivrâ jesâneh tollii uánihis vuáđustemsaavâid, moi maŋa lâi ohtsâš savâstâllâm äigikyevdilijn aašijn.
Kove: Ville Fofonoff / Sämitigge
Sämitige sahâvuáruin valdui oovdân puoh kuulmâ Suomâst ellee sämikielâ já puoh ärbivuáválij iäláttâsâi merhâšume sämmilii eellimvuáhán, sämmilij algâaalmugvuoigâdvuođâi vuáđu aalmugijkoskâsijn sopâmušâin já vuáđulaavâst sehe Sämitige tuoivâ väldiđ ovdiist aktiivlub rooli sämikuávlu eellimvyeimi já sämmilij irâtteijeevuođâ oovdedmist.
Sämitige saavâjođetteijee Pirita Näkkäläjärvi puovtij sahâvuárustis oovdân Sämitige EU-mittomeerijd já president Stubb oonij positiivlâžžân Sämitige mittomere huksiđ pisováid ráhtusijd EU-miärádâstohâmân uásálistem várás.
Kove: Ville Fofonoff / Sämitigge
President Stubb koijâdij meid Sämitige perustuumeest vyelgiđ fáárun staatâkolliistâlmáid ovdediđ Suomâ já Säämi intressijd, moos Sämitige saavâjođetteijee Pirita Näkkäläjärvi västidij, ete ana tom positiivlâžžân.
Teivâdem maŋa Stubb povdij oles Sämitige presidentlaanan koskâpeivimálásân.
Lasetiäđuh:
Pirita Näkkäläjärvi
Saavâjođetteijee
044 753 3766
pirita.nakkalajarvi@samediggi.fi
