Sämikielâlâš oppâmateriaalpargo šadda pehtilubbon – lävdikode saavâjođetteijee lii tuđâvâš, mutâ vuárdá ruttâdmân pisováá aledem
Sämikielâlâš oppâmateriaal pyevtittuvvoo taan ive budjetijn, mii lii kyevtkiärdásâš ovdebij iivij háárán. Máttááttâs- já kulttuurministeriö pargojuávkku, mii luovâttij moonnâm ive loppâraportis ministeráid, pajedij oovdân sämikielâlii oppâmateriaal stuorrâ vááijuvvuođâid, moh lasetteh eromâšávt máttáátteijei pargonuáđi. Ministeriö porgâttij maaŋgâid sierânâsčielgiittâsâid sämimáttááttâs vááijuvvuođâin. Ohtâ tain kuoskâi sämikielâlii oppâmateriaal tile já puáttee táárbuid.
Ovdâskodde tuhhiittij juovlâmáánust 500.000 euro lasattâs sämikielâlii oppâmateriaalpaargon, mii ilosmit eromâšávt oppâmateriaalpargo resursij kiävtust merideijee lävdikode saavâjođetteijee. Sämitige škovlim- já oppâmateriaallävdikode jođetteijee Tauno Ljetoff lii tuđâvâš ministeriöin tollum savâstâlmáid já toos, ete láá viijmâg finnim uáinusân oppâmateriaaltáárbuid.
– Ruttâdem kolgâččii kuittâg alediđ pisovávt taan ive táásán. Siämmást meid sämikielâi káidusmáttááttâs ruttâdem kolgâččii turviđ pisovávt. Ton-uv merhâšume lii eromâš tehálâš sämmilij päikkikuávlu ulguubeln ässee sämmiláid.
Oppâmateriaalpaargon láá taan ive kevttimnáál miljovn eurod. Sämitigge ocá eidu tääl maaŋgâid oppâmateriaal proojeektpargeid. Toos lasseen haaldâtláid já nettipalvâlusâi ovdedempargoid pálkkááttui eidu haaldâtlâš vuávájeijee. Tooimâst aalgât kuovâmáánu aalgâst Unni Länsman.
– Taan ive keččâlep västidiđ jotelumos tárboid já finniđ valmâšin ovdebij iivij ääigi ruttâvänivuođâ tiet kooskân pááccám haavâid. Tääl uuccâp rähteid eromâšávt sämikielâ eenikielâ, eennâmtiäđu, biologia já sämikielâ vieres kielâ oppâamnâsij materiaalpaargon, muštâl Ljetoff. – Uuccâmnáál lii meid anarâškielâlii oppâmateriaalvuávájeijee virgesajasâšvuotâ ko Miina Seurujärvi lii porgâškuáttám sämmilij tuotâvuotâ- já sovâdâttâmkomissio jesânin.
– Tuáivu mield mij finnip ennuv šiev ucâmušâid!
Uáppáásm Sämitige oppâmateriaalpaargon já eres tooimân:
- Škovlim já oppâmateriaal
- Škovlim- já oppâmateriaaltoimâttâh
- Škovlim já oppâmateriaallävdikodde
- Sämikielâliih oppâmateriaaleh
- Sämikielâi káidusmáttááttâs
- Sämitiätu máttááttâsân
Lasetiäđuh:
Ulla Aikio-Puoskari
škovlimčällee
tel. 010 839 3112, 040 767 3101
ulla.aikio-puoskari(at)samediggi.fi
Petra Kuuva
oppâmateriaalčällee
tel. 010 839 3119, 040 677 2275
petra.kuuva(at)samediggi.fi
Marita Aikio
oppâmateriaalvuávájeijee
tel. 010 839 3111, 040 662 9018
marita.aikio(at)samediggi.fi
