Sääʹmǩiõllsâž mättmateriaaltuâjj viõkkšmââvv – luʹvddkååʹdd saaǥǥjååʹđteei lij tååđvaž, leša vuârdd teäggtõʹsse põõšši pââjõõzz
Sääʹmǩiõllsaž mättmateriaal puutʼttet taʹnni kueiʹtǩeârddsaž budjeeʹttin ääiʹjbu iiʹjjid veʹrddeeʹl. Mättʼtõs-da kulttuurministeria teimma lopprapoort ministeera luõvtam tuâjj-joukk kaaggi õuʹdde sääʹmǩiõllsaž mättmateriaal jõnn vaaʹnid, kook kuârmte jeäʹrben uʹčteeʹlid. Ministeria tuejti määŋgaid pååđčiõlǥtõõzzid sääʹm-mättʼtõõzz vaaʹnin. Õhtt tõin kuõski sääʹmǩiõllsaž mättmateriaal vueʹjj da puõʹtti taarbid.
Eeʹttiǩkåʹdd priimi jooulmannust 500.000 eeuʹr lââzztõõzz sääʹmǩiõllsiʹžže mättmateriaaltuõjju, mii rämmâtt jeäʹrben mättmateriaaltuâj resuursi âânnmõõžžâst mieʹrreei luʹvddkååʹdd saaǥǥjååʹđteei. Sääʹmteeʹǧǧ škooultõs-da mättmateriaal-luʹvddkååʹdd jååʹđteei Tauno Ljetoff lij tååđvaž ministeriain jiõllum saǥstõõllmõõžžid da tõõzz, što mättmateriaaltaarb liâ ååʹn vuõǯǯum vueiʹnnemnalla.
– Teäggtõs õõlǥči kuuitâǥ kaggâd põõššinalla tän eeʹjj tässa. Seämmast še sääʹmǩiõli ougglõsmättʼtõõzz teäggtõs õõlǥči tuõrvvâd põõššinalla. Tõn še miârktõs lij samai vääžnai säʹmmlai dommvuuʹd åålǥbeäʹlnn jälsteei säʹmmlaid.
Mättmateriaaltuõjju lij jooʹtti eeʹǩǩen ââʹnnemnalla miljoon euʹrred. Sääʹmteʹǧǧ ååcc samai ååʹn määŋgaid mättmateriaal projeʹktt-tuâjjlaid. Lââʹssen vaaldšemvuõđlaž da neʹttkääzzkõõzzi ooudâsviikkâmtuâjaid paʹlǩǩeeš eiʹdde vaaldšemvuõđlaž plaaneei. Tuâjast alttad täʹlvvmannu aalǥâst Unni Länsman.
– Tän eeʹjjest ǩiččlõõđât vaʹstteed ǩirrlab taarbid ja õsttâd ääiʹjbu iiʹjjin tieʹǧǧ vääʹn diõtt kõõsk kuâđđjam haʹŋǩǩõõzzid valmmša. Ååʹn tuejjeeʹjid ooccât jeäʹrben sääʹm jieʹnnǩiõli, jânnamteâđ, biologia, da sääʹm veeʹresǩiõllân mättaunnsi materiaaltuõjju, särnn Ljetoff. – Ooccâmnalla lij še aanarsääʹmǩiõllsaž mättmateriaalplaaneei veeʹrjsâjjsažvuõtt Miina Seurujärvi altteen tuâjas saaʹmi tuõđâšvuõtt- da suåvâdvuõttkomissio vuäzzliʹžžen.
– Tuäiv mieʹldd vuäǯǯap jiânnai pueʹrid ooccmõõžžid.
Tobdstõõđ Sääʹmteeʹǧǧ mättmateriaaltuõjju da jeeʹres tåimmjummša:
- Škooultõs da mättmateriaal
- Škooultõs- da mättmateriaal-luʹvddkåʹdd
- Sääʹmǩiõllsaž mättmateriaal
- Sääʹmǩiõli ougglõsmättʼtõs
- Sääʹmteâtt mättʼtõʹsse
Lââʹssteâđ:
Ulla Aikio-Puoskari
škooultõspiisar
tel. 010 839 3112, 040 767 3101
ulla.aikio-puoskari(at)samediggi.fi
Petra Kuuva
mättmateriaalpiisar
tel. 010 839 3119, 040 677 2275
petra.kuuva(at)samediggi.fi
Marita Aikio
mättmateriaalplaaneei
tel. 010 839 3111, 040 662 9018
marita.aikio(at)samediggi.fi
