Säämi parlamentaarlii rääđi saavâjođettemvuotâ sirdâšui Suomâ Sämitiggeest Taažâ Sämitiigán

Säämi parlamentaarlâš rääđi (SPR) čokkânij uđđâivemáánu 16. peeivi 2025 Anarist uárnejum tievâsčuákkimân. Čuákkimist SPR saavâjođettemvuotâ sirdâšui Suomâ Sämitiggeest Taažâ Sämitiigán. Tievâsčuákkimist kieđâvuššii Suomâ saavâjođetteijeepaje toimâmuštâlus já savâstâllii tehálijn sämmilijd kyeskee teemain, tego ohtsii väidimorgaanist valjâluvâttâlmij ooleest.

Kove: Sämitigge / Elle Maarit Arttijeff

Säämi parlamentaarlâš rääđi (SPR) čokkânij uđđâivemáánu 16. peeivi 2025 Anarist uárnejum tievâsčuákkimân, mast saavâjođettemvuotâ sirdâšui Suomâ Sämitiggeest Taažâ Sämitiigán čuávuvái 16 mánuppaje ááigán. Suomâ saavâjođetteijeepaje aalgij 20. čohčâmáánu 2024, já toos vaiguttii uđđâ Sämitige ornijdem ive 2024 aalgâst sehe maŋeláá keessiv uárnejum uđđâ sämitiggevaaljah.

Tievâsčuákkim kuávdášliih miärádâsah

Tievâsčuákkimist kieđâvuššui Suomâ saavâjođetteijeepaje toimâmuštâlus já tuhhiittui uđđâ toimâvuávám Taažâ saavâjođetteijeepaje várás. Suomâ saavâjođetteijeepaajeest tiäduttii iärásij juávhust:

  • Säämi parlamentaarlii räädi tooimâ ruttâdem já ornim nanodem, mon uásild vuávájui máhđulii proojeekt olášuttem vâi puávtáččii karttiđ SPR haldâttuv pyeredem muulsâiävtuid. Projektân vuávájui ruttâdem Interreg ohjelm peht.
  • Sämmilij vuoigâdvuođâi nanodem EU:st. Suomâ Sämitigge savâstâlâi Euroop parlamentijn já savâstâlâi konkreetlii kyeimisopâmušâst SPR já Euroop parlament kooskâst. Lasseen kärttejuvvojii eres máhđuliih ruttâdemkäldeeh taan ulmen ovdedem várás.

Taažâ saavâjođetteijeepaje toimâvuáváámist juátkih tai teemai ovdedem.

–Mii tehálâš ohtsâš ulmen lii vuáđudiđ SPR:n jieijâs čäällimkode. Taat nanodičij mii máhđulâšvuođâid ovdediđ sämmilijd ohtsijd prioriteetijd pehtilávt. Sämmilijn láá ennuv naavcah ovdâmerkkân ohtsâštave-eennâmlii politiikân. Čäällimkodde vuáđudem váđáččij Suomâ, Taažâ já Ruotâ staatâin čonâdâttâm fastâ ruttâdmân, iätá SPR jaskee saavâjođetteijee já Suomâ Sämitige saavâjođetteijee Pirita Näkkäläjärvi.

Tievâsčuákkimist savâstâllii meid ohtsii sämmilii väidimorgaan vuáđđudmist valjâluvâttâllâm ooleest. Tievâsčuákkim ovdedij Taažâ, Suomâ já Ruotâ Sämitige juovlâmáánust uárnejum ohtsâš pargočuákkim, mast ellii čoođâ sämitiggevaaljâi tooimâtmân já valjâluvâttâlmij čokkiimân lohtâseijee prosesijd jieškote-uv enâmist. SPR tievâsčuákkim pivdá kuulmâ Sämitige selvâttiđ ohtsii sämmilii väidimorgaan já pyehtiđ ääsi maasâd SPR tievâsčuákkimân.

Nuorâi uásálistem já säminuorâi rääđi rooli

Tievâsčuákkimist tiäduttii nuorâi aktiivlii uásálistem SPR tooimân. Suomâ Sämitige nuorâirääđi jođettij SPR nuorâilävdikode saavâjođetteijeepaje ääigi já oovdânpuovtij kejâstuv toimâstis tievâsčuákkimist. Nuorâilävdikode ulmen lii juátkiđ oovtâstpargo vâi nuorâi vaikuttemmáhđulâšvuođah lasettuvvojeh.

SPR merhâšume sämmilijd

Säämi parlamentaarlâš rääđi tuáimá Taažâ, Ruotâ já Suomâ Sämitige parlamentaarlâš oovtâstpargo-orgaanin, mast meid Ruošâ sämiseervih láá mieldi tárkkojeijen. SPR pargon lii nanodiđ sämiaalmug oovtâstpargo staatâraajij rasta já ovdâstiđ sämmilijd aalmugijkoskâsijn foorumijn. Taat pargo lii eromâš tehálâš, ko kieđâvuššojeh koččâmušah, moh kyeskih sämmilijd ohtân aalmugin.

SPR stiivrâst Suomâ Sämitige ovdâstáin saavâjođetteijee Pirita Näkkäläjärvi já II värisaavâjođetteijee Tuomas Aslak Juuso. Suomâ saavâjođetteijeepaje ääigi olášuttum alguuh juátkojeh já ovdeduvvojeh Taažâ jođettâsâst.

 

Lasetiäđuh

Pirita Näkkäläjärvi (virgeriijâst 20.1.–30.11.2025)
Sämitige saavâjođetteijee
pirita.nakkalajarvi@samediggi.fi
044 7533766

Tuomas Aslak Juuso
tuomas.juuso(at)samediggi.fi
II värisaavâjođetteijee
040 687 3394 / 010 839 3101

Inka Saara Arttijeff
Aalmugijkoskâsij aašij čällee
inka-saara.arttijeff@samediggi.fi
0505747629


Jyevi siijđo ovdâskulij

Eres uđđâseh