Sääʹm parlamentaarlaž suåvtõõzz (SPS) saaǥǥjååʹđtemvuõtt serddji Lääʹdd Sääʹmteeʹǧǧest Taarr Sääʹmtegga
Sääʹm parlamentaarlaž suåvtõs (SPS) noorõõđi ođđeeʹjjmannu 16. peeiʹv 2025 Aanrest jäʹrjstum tiuddsåbbra. Såbbrest SPS saaǥǥjååđtummuš serddji Lääʹdd Sääʹmteeʹǧǧest Taarr Sääʹmtegga. Tiuddsåbbrest ǩiõttʼtõʹlleš Lääʹdd saaǥǥjååʹđtempââʹj tåimmčiõlǥtõõzz da saǥstõʹlleš pââimõs säʹmmlaid kuõskki teeʹmi pirr, mâʹte vaal-loǥstõõǥǥid kuulli õhttsaž läittamorgaanâst.

Sääʹm parlamentaarlaž suåvtõs (SPN) noorõõđi ođđeeʹjjmannu 16. peeiʹv 2025 Aanrest jäʹrjstum tiuddsåbbra, koʹst saaǥǥjååđtummuš serddji Lääʹdd Sääʹmteeʹǧǧest Taarr Sääʹmtegga pueʹtti 16 määnpââjas. Lääʹdd saaǥǥjååʹđtempââʹjj aaʹlji čõhččmannu 20. peeiʹv 2023 da tõõzz vaaikte ođđ Sääʹmteeʹǧǧ riâššõõttmõš eeʹjj 2024 aalǥâst di mâʹŋŋlõbân ǩeässa jäʹrjstum oođuum sääʹmteʹǧǧvaal.
Tiuddsåbbar kõskksâjjsaž tuʹmmstõõǥǥ
Tiuddsåbbrest ǩiõttʼtõʹlleš Lääʹdd saaǥǥjååʹđtempââʹj tåimmčiõlǥtõõzz da priʹmmeš ođđ tåimmplaan Taarr saaǥǥjååʹđtempââʹj vääras. Lääʹdd saaǥǥjååʹđtempââʹjest teädd leäi jeeʹrab mieʹldd:
- Sääʹm parlamentaarlaž suåvtõõzz toiʹmmjem teäggtõõzz da organisâsttmõõžž nâânummuš, koonn kuõskeeʹl plaaneš vueiʹtlvaž projeeʹkt čõõđ viikkmõõžž SPS vaaldâšm pueʹreem vaaitõsmääinai kaartʼtem diõtt. Projektta plaaneeš teäggtõõzz Interreg-prograamm pääiʹǩ.
- Säʹmmlai vuõiggâdvuõđi nâânummuš EU:st. Lääʹdd Sääʹmteeʹǧǧest leäi vuârrsaǥstõõllmõš Euroopp parlameeʹntin da saakkân lei konkreettlaž kueiʹmmvuõttsuåppmõš SPS da Euroopp parlameeʹnt kõõsk. Lââʹssen kaartʼteš jeeʹres vueiʹtlvaž teäggtõskääivaid tän tääʹvtõõzz õõuʹdeem vääras.
Taarr saaǥǥjååʹđtempââʹj tåimmplaanâst jueʹtǩet täi teeʹmi õõudâsviikkmõõžž.
–Meeʹst õhttsaž tääʹvtõsân lij vuäǯǯad vuâđđuum SPS vääras jiiʹjjes-i piisarkåʹdd. Tät nââneʹče vueiʹttemvuõđeen õõuʹdeed säʹmmlaid õhttsaž prioriteeʹttid viõusâld da vaaikteeʹjeld. Säʹmmlain lij jiânnai uʹvdded õuddmiârkkân õhttsažtâʹvvjânnmallaš politiʹǩǩe. Piisarkååʹdd vuâđđummuš kaiʹbbjeʹče Lääʹdd, Taarr da Ruõcc riikkin čõnnõõttmõõžž põõšši teäggtõʹsse, särnn SPS cõjjlõõtti saaǥǥjååʹđteei da Lääʹdd sääʹmteeʹǧǧ saaǥǥjååʹđteei Pirita Näkkäläjärvi.
Tiuddsåbbrest saǥstõʹlleš še õhttsaž sääʹm läittamorgaan vuâđđummšest kuõskeeʹl vaal-loǥstõõǥǥid. Õuʹddel tiuddsåbbar lij jäʹrjstum jooulmannust Taarr, Lääʹdd da Ruõcc Sääʹmtiiǧǧi õhttsaž tuâjjsååbbar, koʹst čõõđteš sääʹmteʹǧǧvaali tooiʹmtummša da vaal-loǥstõõǥǥi noorrmõʹšše kuulli proseeʹssid täin jânnmin. SPS tiuddsååbbar tätt koolm Sääʹmteeǧǧ seʹlvvted sääʹm õhttsaž läittamorgaan da puʹhtted ääʹšš mååust SPS tiuddsåbbra.
Nuõri vuässõõttmõš da sääʹmnuõri suåvtõõzz rooll
Tiuddsåbbrest kaʹǧǧeš nuõri aktiivlaž vuässõõttmõõžž SPS toiʹmmjummša. Lääʹdd Sääʹmteeʹǧǧ nuõrisuåvtõs jååʹđti SPS nuõriluʹvddkååʹdd saaǥǥjååʹđtempââʹj äiʹǧǧen da uuʹdi ǩičldõõǥǥ tååimaines tiuddsåbbrest. Nuõriluʹvddkåʹdd tääʹvtõsân lij juäʹtǩǩed õhttsažtuâj nuõri vaaiktemvueiʹttemvuõđi lââʹzztem õuʹdde.
SPS miârktõs säʹmmlaid
Sääʹm parlamentaarlaž suåvtõs toiʹmmai Taarr, Ruõcc da Lääʹdd Sääʹmtiiʹǧǧi parlamentaarlaž õhttsažtuâjjorgaanân, koʹst še Ruõšš sääʹmsieʹbr lie mieʹldd taʹrǩǩõõllʼjen. SPS tuâjjan lij nââneed saaʹmi õhttsažtuâj rââst riikki raaji da eeʹttkâʹstted säʹmmlaid meeraikõskksaž foorumin. Tät tuâjj lij samai tärkeää täʹrǩǩ, ǥu ǩiõttʼtõõlât kõõččmõõžžid, kookk kuõskte säʹmmlaid õhttân meeran.
SPS halltõõzzâst Lääʹdd Sääʹmteeʹǧǧ eeʹttkõʹstte saaǥǥjååʹđteei Pirita Näkkäläjärvi da II väärrsaaǥǥjååʹđteei Tuomas Aslak Juuso. Lääʹdd saaǥǥjååʹđtempââʹj ääiʹj čõõđ vikkum alttõõzzid jueʹtǩet da viiǥǥât õõudårra Taarr jååʹđteʹmen
Lââʹssteâđ
Pirita Näkkäläjärvi (veʹrǧǧluõvâsvuõtt 20.1.–30.11.2025)
Sääʹmteeʹǧǧ saaǥǥjååʹđteei
pirita.nakkalajarvi@samediggi.fi
044 7533766
Tuomas Aslak Juuso
tuomas.juuso@samediggi.fi
II väärrsaaǥǥjååʹđteei
040 687 3394 / 010 839 3101
Inka Saara Arttijeff
meeraikõskksaž aaʹšši piisar
inka-saara.arttijeff@samediggi.fi
0505747629