Sámi parlamentáralaš ráđi ságadoallivuohta sirdásii Suoma Sámedikkis Norgga Sámediggái
Sámi parlamentáralaš ráđđi (SPR) čoahkkanii ođđajagemánu 16. b. 2025 dievasčoahkkimii, mii dollojuvvui Anáris. Čoahkkimis SPR:a jođiheapmi sirdásii Suoma Sámedikkis Norgga Sámediggái. Dievasčoahkkimis gieđahallojuvvui Suoma ságadoalliáigodaga doaibmamuitalus ja ságastallojuvvui sápmelaččaide guoskevaš dehálaš temáin, dego válgalogahallamiidda gullevaš oktasaš váidinorgána vuođđudeamis.

Sámi parlamentáralaš ráđđi (SPR) čoahkkanii ođđajagimánu 16. b. 2021-2025 Anáris dievasčoahkkimii, mas jođiheapmi sirdásii Suoma Sámedikkis Norgga Sámediggái čuovvovaš 16 mánnui. Suoma ságadoalliáigodat álggii čakčamánu 20. beaivve 2023, ja dasa váikkuhedje ođđa sámedikki ortniiduvvan jagi 2024 álggus sihke maŋŋelis geasset lágiduvvon ođaduvvon sámediggeválggat.
Dievasčoahkkima guovddáš mearrádusat
Dievasčoahkkimismis gieđahallojuvvui Suoma ságadoalliáigodaga doaibmamuitalus ja dohkkehuvvui ođđa doaibmaplána Norgga ságadoalliáigodaga várás. Suoma ságadoalliáigodagas deattuhuvvui earret eará:
- Sámi parlamentáralaš ráđi doaimma ruhtadeami ja organiserema nannen, man oasil plánejuvvui vejolaš prošeavtta ollašuhttin SPR:a hálddahusa buorideami molssaeavttuid kártemis. Prošektii plánejuvvui ruhtadeapmi Interreg-prográmma bokte.
- Sápmelaččaid vuoigatvuođaid nannen EU:s. Suoma Sámediggi ságastalai Eurohpa parlameanttain ja ságastalai konkrehtalaš guoibmevuođašiehtadusas SPR:a ja Eurohpa parlameantta gaskkas. Dasa lassin kártejuvvojedje eará vejolaš ruhtadangáldut dán áigumuša várás.
Norgga jođihanáigodaga doaibmaplánas jotkojuvvo dáid fáttáid ovddideapmi.
– Min dehálaš oktasaš ulbmil lea ahte SPR:ai vuođđuduvvo iežas čállingoddi. Dat nanosmahtášii min vejolašvuođaid ovddidit sámiide oktasaš vuoruhemiid beaktilit ja váikkuhahtti vugiin. Sámiin lea ollu addit ovdamearkka dihte davviriikkaid oktasaš politihkkii. Čálligotti ásaheapmi gáibida Suoma, Norgga ja Ruoŧa stáhtain čatnašumi fásta ruhtadeapmái, dadjá SPR ságadoalli, guhte báhcá doaimmas eret ja Suoma Sámedikki ságadoalli Pirita Näkkäläjärvi.
Dievasčoahkkimis digaštallojuvvui maiddái vejolašvuođas ásahit oktasaš sámi váidinorgána válgalogahallamiid várás. Ovdal dievasčoahkkima ordnejuvvui Norgga, Suoma ja Ruoŧa sámedikki oktasaš bargočoahkkin, mas sámedikkit manne čađa sámediggeválggaid doaimmaheapmái ja válgalogahallama čohkkemii guoskevaš proseassaid iešguhtege riikkas. SPR dievasčoahkkin bivdá golmma Sámedikki čielggadit oktasaš sámi váidinorgána vejolašvuođaid ja buktit ášši ruovttoluotta SPR:a dievasčoahkkimii.
Nuoraid oassálastin ja sámenuoraid ráđi rolla
Dievasčoahkkimis deattuhuvvui nuoraid aktiivvalaš oassálastin SPR:a bargui. Suoma Sámedikki nuoraidráđđi jođihii SPR:a nuoraidlávdegotti ságadoallibaji áigge ja ovdanbuvttii geahčastaga doaimmas dievasčoahkkimis. Nuoraidlávdegotti ulbmilin lea joatkit ovttasbarggu nuoraid váikkuhanvejolašvuođaid lasiheami várás.
SPR:a mearkkašupmi sámiide
Sámi parlamentáralaš ráđđi doaibmá Norgga, Ruoŧa ja Suoma Sámedikkiid parlamentáralaš ovttasbargoorgánan, mas maiddái Ruošša beale sámi organisašuvnnat leat mielde dárkojeaddjin. SPR:a bargun lea nannet sámi álbmoga ovttasbarggu riikkarájiid rastá ja ovddastit sápmelaččaid riikkaidgaskasaš forumis. Dát bargu lea erenoamáš deaŧalaš dalle go gieđahallojuvvojit áššit mat gusket sámiide oktan álbmogin.
SPR:a stivrras Suoma Sámedikki ovddasteigga ságajođiheaddji Pirita Näkkäläjärvi ja II várreságajođiheaddji Tuomas Aslak Juuso. Suoma ságadoalliáigodaga áigge ollašuhtton álgagat jotkojuvvojit ja ovddiduvvojit Norgga jođihemis.
Lassidieđut
Pirita Näkkäläjärvi (virgefriddjas 20.1.-30.11.2025)
Sámedikki ságajođiheaddji
pirita.nakkalajarvi@samediggi.fi
044 7533766
Tuomas Aslak Juuso
II várreságadoalli
tuomas.juuso@samediggi.fi
0406873394 / 0108393101
Inka Saara Arttijeff
riikkaidgaskasašáššiid čálli
inka-saara.arttijeff@samediggi.fi
0505747629