Sämikielâi káidusmáttááttâs piiloothaavâ toimâmmaali árvuštâllâm lii valmâštum – puátusij almostittemtilálâšvuotâ uárnejuvvoo Ucjuuvâst 18.1.2023
Ucjuv kieldâ já Sämitige ohtsii Sämikielâi káidusmáttááttâs piiloothaavâ toimâmaali árvuštâllâm lii valmâštum, já puátusij almostittemtilálâšvuotâ uárnejuvvoo 18.1.2023 Ucjuuvâst.
Aalmuglâš škovlim árvuštâllâmkuávdáš, Karvi, lii olášuttâm sämikielâi (tavesämi-, anarâš- já nuorttâlâškielâ) máttááttâs káidusmáttááttâspiiloot árvuštâllâm ive 2022. Árvuštâlmist láá selvâttâm porgemáánust 2018 álgám káidusmáttááttâspiiloot toimâm máttááttâs uárnejeijee, škoovlâi, máttáátteijei já uáppei uáinust. Nurrum amnâstuv vuáđuld Karvi lii ráhtám čuákánkiäsuraapoort toimâmmaali juátkim suogârdâlmân.
Puátusij almostittemtilálâšvuotâ uárnejuvvoo Ucjuvnjäälmi škoovlâst koskoho 18.1.2023 tme 16.00–19.00.
- Tilálâšvuotân almottâttâm majemustáá 10.1.2023 https://link.webropolsurveys.com/S/411B1A5230C8A64F.
- Puátusij almostittemtilálâšvuođâ puáhtá čuávvuđ meid káidusohtâvuođáin Teams peht: Seervâ čuákkimân spokkâlmáin täst.
- Almostittemtilálâšvuođâ ohjelm suomâkielân.
Árvuštâllâm várás uárnejii sahhiittâlmijd já kuullâmtilálâšvuođâid algâivveest 2022. Toos lasseen tiäđuid nurrii máttááttâs uárnejeijeid, máttáátteijeid já uáppeid čuosâttum koijâdâlmijguin. Karvi árvuštâllâmvuávám mield káidusmáttááttâshaahân kuleh oovtviärdásâšvuođâ ovdedem, oppâm já mättim lasettem sehe škovlimvuáháduv tooimâ pyeredem fáádáh.
Lasetiäđuh:
Marita Härmälä
Njunoš árvuštâllâmäššitobdee, Karvi
+358 29 533 5560
marita.harmala@karvi.fi
Hanna Helander
Proojeekthovdâ, sämikielâi káidusmáttááttâshaahâ
+358 40 7012 094
hanna.helander@edu.utsjoki.fi
Lasetiäđuh Sämikielâi káidusmáttááttâshaavâst:
Sämikielâi káidusmáttááttâs piiloothaahâ lii Ucjuv kieldâ jođettem já Sämitige koordinistem haahâ. Haavâ ruttâd máttááttâs- já kulttuurministeriö. Haavâ ulmen lii faallâđ sämikielâ káidusmáttááttâs vuáđuškoovlâ já nube tääsi uáppeid sämikuávlu kieldâi ulguubel kyehti okkotiijme verd já ovdediđ sämikielâi káidusmáttááttâs pedagogiik. Káidusmáttááttâshaavâ máttááttâs lii reaaláigásâš (synkroonlâš) máttááttâs. Talle máttáátteijee já uáppeeh uásálisteh siämmáá ääigi oppâtijmijd jieijâs piergâsijguin, mutâ fyysilávt sierâ paaihijn.
