Sämikielâliih kuáhtáámeh škoovlâst, määđhist já astoääigi – Sämikielâi káidusmáttááttâshaahâ puávdee puohâid mieldi kielâoho ávus oppâtijmijd
Kielâokko viättoo 21.–27.10.2024. Sämikielâi káidusmáttááttâshaahâ uárnee oho kunnen ávus oppâtiijmijd, moid puáhtá servâđ kii peri. Kielâokko lii uárnejum vuossâmuu tove ive 2019, já káidusmáttááttâshaahâ lii lamaš mieldi aalgâ rääjist.
Oppâtiijmij teeman lii Kuáhtáámeh, mii lii meid káidusmáttááttâshaavâ luuhâmive 2024–2025 teema. Anarâškielâ tijmeest čokkáp škoovlâst pulbet paaldâst, nuorttâlâškielâ tijmeest mađhâšep já tavesämikielâ tijmeest lep viettiimin astoääigi.
Oppâtiijmij ulmen lii lasettiđ tiäđu sämikielâin já siämmást sämikulttuurist. Oppâtiijmij čuosâttâhjuávkkun láá ovdâ- já vuáđumáttááttâs uáppeeh já nube tääsi uáppeeh, mutâ oppâtijmijd uážžuh uásálistiđ puohah, kiäid sämikielah kiäsutteh. Tijmijd puáhtá uásálistiđ jieškote-uv uáppee jiešráđálávt teikâ oles luokka puáhtá uásálistiđ ohtsijn rustigáin. Haalijddijn puáhtá uásálistiđ veikâ jyehi oppâtiijmán, ige toid lah sierâ almottâttâm.
Oppâtiijmeh tuállojeh káidusohtâvuođâiguin Microsoft Teamsist. Tiijmeh láá ohtsis kulmâ, ohtâ jyehi sämikielâst, mon Suomâst sárnuh, ađai tavesämi-, anarâš- já nuorttâlâškielâst.
Tiijmij äigitaavluh:
Majebargâ 22.10. tijme 9–9.45
Kuáhtáámeh škoovlâst
Máttáátteijen Anna Askala já Laura Ylinampa
Čuosâttâhjuávkku: Paješkovlâ já nubbe tääsi
Kielâ: Anarâškielâ
Servâmliŋkkâ: Seervâ čuákkimân spokkâlmáin täst
Koskokko 23.10. tijme 9–9.45
Kuáhtáámeh määđhist
Máttáátteijen Sirkka Sanila já Kia Olin
Čuosâttâhjuávkku: 0.–3. luokah
Kielâ: Nuorttâlâškielâ
Servâmliŋkkâ: Seervâ čuákkimân spokkâlmáin täst
Tuorâstâh 24.10. tijme 9–9.45
Kuáhtáámeh astoääigi
Máttáátteijen Máren-Elle Länsman já Máret Ingá Länsman
Čuosâttâhjuávkku: 4.–6. luokah
Kielâ: Tavesämikielâ
Servâmliŋkkâ: Seervâ čuákkimân spokkâlmáin täst
Tiijmij ääigi lii máhđulâš koijâdiđ já savâstâllâđ chatist. Tijmijd ij taarbâš almottâttâđ muuneeld. Oppâtiijmeh iä vyerkkejuu.
Tärhibijd ravvuid tijmijd uásálistmân tun kaavnah tääbbin.
Ohtâvuotâulmuuh:
Hanna Helander
proojeekthovdâ
hanna.helander@edu.utsjoki.fi
040 701 2094
Anne Olli
proojeektkoordinaattor
anne.olli@samediggi.fi
040 687 5989
Lasetiäđuh Sämikielâi káidusmáttááttâshaavâst:
Sämikielâi káidusmáttááttâs piiloothaahâ lii Ucjuv kieldâ jođettem já Sämitige koordinistem haahâ. Haavâ ruttâd máttááttâs- já kulttuurministeriö. Haavâ ulmen lii faallâđ sämikielâ káidusmáttááttâs vuáđuškoovlâ já nube tääsi uáppeid sämikuávlu kieldâi ulguubel kyehti okkotiijme verd já ovdediđ sämikielâi káidusmáttááttâs pedagogiik. Káidusmáttááttâshaavâ máttááttâs lii reaaláigásâš (synkroonlâš) máttááttâs. Talle máttáátteijee já uáppeeh uásálisteh siämmáá ääigi oppâtijmijd jieijâs piergâsijguin, mutâ fyysilávt sierâ paaihijn.
https://www.saamenetaopetus.com/
Lasetiäđuh sämikielâi ohhoost:
Kielâoho ulmen lii pyerediđ sämikielâi sajattuv, já pyerediđ sämikielâi já sämikulttuur tubdâm ubâ ohtsâškoddeest. Eidu taan ohhoost kalgeh sämikielah kullojeh já uáinojeh jyehi saajeest.
Kielâokko lii ohtsâšhaahâ, main mij pyehtip oovdân sämikielâid já lasettep tai tubdâm oles ohtsâškoddeest. Priivaat já almos lájádâsah, finnoduvah, seervih já jieškote-uvlágán uásálisteeh puávdejuvvojeh pyehtiđ oovdân sämikielâid eidu taan ohhoost. Oovtâst mij väldip stuárráb ovdâsvástádâs sämikielâi kulluumist, oinuumist já kevttimist puoh siärvádâhsuorgijn.
Taažâ Sämitigge lii algâttâm Kielâoho já tot lii uási sii algâttem Kielâluptim (Giellalokten) kielâstrategia.
