Sámegielat deaivvadeamit skuvllas, mátkki alde ja astoáigge – Sámegielaid gáiddusoahpahusprošeakta bovde buohkaid fárrui Sámegielaid vahku rabas oahppadiimmuide
Sámegielaid vahkku dollojuvvo 21.–27.10.2024. Sámegielaid gáiddusoahpahusprošeakta ordne vahku gudnin rabas oahppadiimmuid, maidda sáhttá searvat gii beare. Sámegielaid vahkku lea ordnejuvvon vuosttas háve jagi 2019, ja gáiddusoahpahusprošeakta lea leamaš fárus álggu rájes.
Oahppadiimmuid temá lea Deaivvadeamit, mii lea maiddái gáiddusoahpahusprošeavtta skuvlajagi 2024–2025 temá. Anárašgiela diimmus čohkkát skuvllas bulbeahta luh´, nuortalašgiela diimmus mátkkoštit ja davvisámegiela diimmus leat astoáigge doaimmas.
Oahppadiimmuid dárkkuhussan lea lasihit dieđuid sámegielat ja seammá háve maiddái sámekultuvrras. Oahppadiimmuid ulbmiljoavkun leat ovda- ja vuođđooahpahusa oahppit ja nuppi dási studeanttat, muhto oahppadiimmuide ožžot oassálastit buohkat, geat leat beroštuvvan sámegielain. Diimmuide sáhttá oassálastit guđege oahppi iehčanasat dahje olles luohkká sáhttá searvat oktasaš reaiddu bokte. Jos háliida, sáhttá oassálastit vaikke buot oahppadiimmuide, iige daidda leat sierra almmuheapmi.
Oahppadiimmut dollojit gáiddusoktavuođa bokte Microsoft Teamsis. Diimmut leat oktiibuot golbma, okta juohke Suomas hállon sámegielas, elege davvisáme-, anáraš- ja nuortalašgielas.
Diimmuid áigetávvalat:
Maŋŋebárga 22.10. dmu 9-9.45
Deaivvadeamit skuvllas
Oahpaheaddjin Anna Askala ja Laura Ylinampa
Ulbmiljoavku: Badjeskuvla ja nubbi dássi
Giella: Anárašgiella
Searvanliŋka: Searvva čoahkkimii spoahkkalemiin dás
Gaskavahkku 23.10. dmu 9–9.45
Deaivvadeamit mátkki alde
Oahpaheaddjin Sirkka Sanila ja Kia Olin
Ulbmiljoavku: 0.–3. luohkát
Giella: Nuortalašgiella
Searvanliŋka: Searvva čoahkkimii spoahkkalemiin dás
Duorastat 24.10. dmu 9–9.45
Deaivvadeamit astoáigge
Oahpaheaddjin Máren-Elle Länsman ja Máret Ingá Länsman
Ulbmiljoavku: 4.–6. luohkát
Giella: Davvisámegiella
Searvanliŋka: Searvva čoahkkimii spoahkkalemiin dás
Diimmuin lea vejolašvuohta jearrat gažaldagaid ja ságastallat chat bokte. Diimmuide ii dárbbaš almmuhit ovddalgihtii. Oahppadiimmut eai báddejuvvo.
Dárkilut rávvagiid diimmuide oassálastimii gávnnat dáppe.
Oktavuođaolbmot:
Hanna Helander
prošeaktahoavda
hanna.helander@edu.utsjoki.fi
040 701 2094
Anne Olli
prošeaktakoordináhtor
anne.olli@samediggi.fi
040 687 5989
Lassedieđut Sámegielaid gáiddusoahpahusprošeavtta birra:
Sámegielaid gáiddusoahpahusa pilohttaprošeavtta jođiha Ohcejoga gielda ja koordinere Sámediggi. Prošeavtta mihttomearrin lea fállat sámegielaid gáiddusoahpahusa vuođđoskuvlla ohppiide ja nuppi dási studeanttaide sámeguovllu gielddaid olggobeallái guokte vahkkodiimmu ja ovddidit sámegieloahpahusa pedagogihka. Gáiddusoahpahusprošeavtta oahpahus lea reálaáiggi oahpahus (nu gohčoduvvon synkronalaš oahpahus), mas oahpaheaddji ja oahppit oassálastet oahppodiibmui seamma áigge iežaset dihtoriiguin iešguđet guovllus.
https://www.saamenetaopetus.com/
Lassedieđut sámi giellavahku birra:
Giellavahku ulbmilin lea buoridit sámegielaid stáhtusa, ja buoridit máhtu sámi giela ja kultuvrra birra olles servodagas. Juste dán vahkus galget sámegielat gullot ja oidnot juohke sajis.
Giellavahkku lea veahkkálasbargu čalmmustahttit sámegielaid ja loktet máhtu daid birra olles servodagas. Priváhta ja almmolaš ásahusat, ealáhuseallin, organisašuvnnat ja eará aktevrrat bovdejuvvojit oainnusmahttit sámegielaid juste dán vahkus. Ovttas váldit mii stuorábuš ovddasvástádusa sámegielaid gullomis, oidnomis ja geavaheames buot servodatsurggiin.
Sámediggi Norgga beale mearridii álggahit Giellavahku dalle go almmuhii Giellaloktema.
