Sämitige almosčuákkim uđđâ komissaarij valjiimân tuotâvuotâ- já sovâdâttâmkomission uárnejuvvoo 9.8.2022
Sämitigge uárnee paijeelmiärálii almosčuákkim káidusohtâvuođâiguin majebaargâ 9.8.2022 tme 9–16 uđđâ komissaarij valjiimân tuotâvuotâ- já sovâdâttâmkomission.
Sämitige stivrâ iävtut Sämitige čuákkimân, ete almosčuákkim noomât kyehti uđđâ komissaar, main nubbe oovdâst anarâškielâ kielâjuávhu já nubbe tavesämikielâ kielâjuávhu.
Sämitigge movtijdit sämmilijd väldiđ ohtâvuođâ Sämitige jesânáid tâi saavâjođetteijeid, jis sist láá iävtuttâsah komissaariävtukkâssân.
Sämitige luáttámušulmui ohtâvuotâtiäđuh láá Sämitige nettisiijđoin čujottâsâst: https://samediggi.fi/luottamushenkilot/.
Sämmilij tuotâvuotâ- já sovâdâttâmkomissio
Sämmilij tuotâvuotâ- já sovâdâttâmproosees ulmen lii tubdâstiđ já árvuštâllâđ historjálii já tááláá olgoštem, mieldi luhâmáin staatâ suddâluttempolitiik, sehe vuoigâdvuođâi luávkkámijd, selvâttiđ maht taah vaigutteh sämmiláid já sii siärvádâhân tááláá tiileest já iävtuttiđ, ete maht puávtáččii ovdediđ ohtâvuođâ sämmilij já Suomâ staatâ kooskâst sehe sämmilij juávhust.
Tuotâvuotâ- já sovâdâttâmkomissio jesâneh láá vijđes luáttámuš navdâšeijee ulmuuh sämmilij já syemmilii ohtsâškoddeest. Jesâneh láá sorjomettum iäge oovdâst tom pele, mii lii sii iävtuttâm tâi sii valjim. Komissio noomâtmist váldojeh täsipiälásávt huámmášumán jieškote-uv sämikielâjuávhuh. Komissio noomâtmist viggeh väldiđ huámmášumán suhâpeelij täsipiälásâš ovdâstus.
Staatârääđi asâttij Sämmilij tuotâvuotâ- já sovâdâttâmkomissio 28. roovvâdmáánu 2021 já komissio algâttij pargos viiđáin komissaarijn. Komissaarijn kyehti nomâttui Sämitige iävtuttâsâst, ohtâ Nuorttâlij sijdâčuákkim iävtuttâsâst já kyehti Suomâ staatâ iävtuttâsâst. Komissio váldučällee algâttij pargos 1.2.2022 já njuhčâ-cuáŋuimáánust 2022 komissio čäällimkoddeest algâttii pargos lasseen kulmâ vuávájeijee.
Vyesimáánust 2022 kuohtuuh Sämitige iävtuttem komissaareh pivdijn luovâsmittem komissaar pargoost. Staatârääđi mieđettij iäru Miina Seurujáávrán já Heikki J. Hyvärisâžân komissaar pargoost 25.5.2022 rääjist. Komissio váldučällee almottij staatârääđi kanslian keččâlemääigi raččomist Sämmilij tuotâvuotâ- já sovâdâttâmkomissio váldučällee virgeest 22.5.2022 rääjist. Kesimáánust 2022 meid ohtâ komissio čäällimkode vuávájeijein lii almottâm keččâlemääigi raččomist komissio čäällimkode vuávájeijee virgeest.
Tuotâvuotâ- já sovâdâttâmkomissio asâttâm peleh, ađai Sämitigge, Nuorttâlij sijdâčuákkim sehe Staatârääđi kanslia láá vyesi-kesimáánust ráđádâllâm komissio pargo juátkim ooleest. Sämitige čuákkim kieđâvušâi tuotâvuotâ- já sovâdâttâmkomissio tile čuákkimistis 23.6.2022, já kuulâi komissio pargoost čuákkim ooleest komissaarijd Hannele Pokka, Kari Mäkinen já Irja Jefremoff, sehe komissaar pargo kuáđđám Miina Seurujäävri sehe Heikki J. Hyvärisii. Lasseen čuákkim kuulâi komissio čäällimkode vuávájeijee Aslak Uula Länsman sehe tuotâvuotâ- já sovâdâttâmproosees toorjân vuáđudum sämmilij psykososiaallii torjuu ohtâduv hoovdâ Heidi Eriksen.
Sämitige čuákkim meridij tuárjuđ sämmilij tuotâvuotâ- já sovâdâttâmkomissio juátkim já valjiđ kyehti komissaar porgemáánust toollâmnáál paijeelmiärálii tievâsčuákkimist.
Luuvâ tuotâvuotâ- já sovâdâttâmkomissio mandaat tääbbin .
Lasetiäđuh:
Saavâjođetteijee
Tuomas Aslak Juuso
040 687 3394
tuomas.juuso@samediggi.fi
