Sámedikki dievasčoahkkin duohtavuođa- ja soabadankommišuvnna ođđa komissáraid válljema várás lágiduvvo 9.8.2022
Sámediggi ordne badjelmearálaš dievasčoahkkima gáiddusoktavuođaid bokte maŋŋebárgga 9.8.2022 dmu 9-16 duohtavuođa- ja soabadankommišuvnna ođđa komissáraid válljema várás.
Sámedikki stivra evttoha Sámedikki čoahkkimii, ahte dievasčoahkkin nammada guokte ođđa komissára, geain nubbi ovddasta anárašgiela giellajoavkku ja nubbi davvisámegiela giellajoavkku.
Sámediggi bivdá, ahte sápmelaččat váldet oktavuođa Sámedikki lahtuide dahje ságajođiheaddjiide, juos sis leat evttohusat komissáraevttohassan.
Sámedikki luohttámušolbmuid oktavuođadieđut gávdnojit Sámedikki neahttasiidduin čujuhusas: https://samediggi.fi/luottamushenkilot/.
Sámiid duohtavuođa- ja soabadankommišuvdna
Sámiid duohtavuođa- ja soabadanproseassa mihttomearrin lea earuhit ja árvvoštallat historjjálaš ja dálá olggušteami, mielde logadettiin maiddái stáhta suddadanpolitihka, sihke vuoigatvuođaid loavkidemiid, ja čielggadit mo dát váikkuhit sápmelaččaide ja sin servošii dálá dilis ja evttohit mo sáhtášii ovddidit oktavuođa sámiid ja Suoma stáhta gaskkas ja sámiid gaskavuođas.
Duohtavuođa- ja soabadankommišuvnna lahtut leat olbmot, geat návddašit viiddis luohttámuša sápmelaš ja suopmelaš servodagas. Lahtut leat sorjjasmeahttumat eaige ovddas dan beali, mii sin lea evttohan dahje válljen. Kommišuvnna nammadeamis váldojit vuhtii sierra sámegielaid joavkkut ovttaveardásaččat. Kommišuvnna nammadeamis figgojuvvo dasa, ahte fuopmášuvvo sohkabeliid ovttaveardásaš ovddasteapmi.
Stáhtaráđđi ásahii Sámiid duohtavuođa- ja soabadankommišuvnna golggotmánu 28 beaivve 2021 ja kommišuvnna álggahii barggu viđa komissára čoahkkáibijuin. Sámedikki evttohusa vuođul nammaduvvojedje guokte komissára, okta Nuortalaččaid siidačoahkkima evttohusas ja guokte Suoma stáhta evttohusas. Kommišuvnna váldočálli álggahii barggu 1.2.2022 ja njukča-cuoŋománus 2022 kommišuvnna čállingottis álggahedje lassin golbma plánejeaddji.
Miessemánus 2022 guktot Sámedikki evttohan komissárat bivddiiga earu komissára barggus. Stáhtaráđđi mieđihii earu Miina Seurujärvii ja Heikki J. Hyvärisii komissára barggus 25.5.2022 rájes. Kommišuvnna váldočálli almmuhii stáhtaráđi kansliijai geahččalanáiggi burgimis Sámiid duohtavuođa- ja soabadankommišuvnna váldočálli virggis 22.5.2022 rájes. Geassemánus 2022 maiddái okta kommišuvnna čállingotti plánejeaddjiin lea almmuhan geahččalanáigge burgimis kommišuvnna čállingotti plánejeaddji virggis.
Duohtavuođa- ja soabadankommišuvnna ásahan oassebealit, nappo Sámediggi, Nuortalaččaid siidačoahkkin ja Stáhtaráđi kansliija miesse-geassemánus leat ráđđádallan kommišuvnna barggu joatkima birra. Sámedikki čoahkkin gieđahalai duohtavuođa- ja soabadankommišuvnna dili čoahkkimis 23.6.2022, ja gulai kommišuvnna barggus čoahkkima oktavuođas komissára Hannele Pokka, Kari Mäkinen sihke Irja Jefremoff, sihke komissára barggu guođđán Miina Seurujärvi sekä Heikki J. Hyvärinen. Lassin čoahkkin gulai kommišuvnna čállingotti plánejeaddji Aslak Uula Länsman ja maiddái duohtavuođa- ja soabadanproseassa doarjjan vuođđuduvvon sámiid psykososiálalaš doarjaga ovttadaga hoavdda Heidi Eriksen.
Sámedikki čoahkkin mearridii doarjut sámiid duohtavuođa- ja soabadankommišuvnna joatkima ja válljet guokte komissára badjelmearálaš dievasčoahkkimis, mii dollojuvvo borgemánus.
Loga duohtavuođa- ja soabadankommišuvnna mandáhta dáppe.
Lassidieđut:
Ságajođiheaddji
Tuomas Aslak Juuso
040 687 3394
tuomas.juuso@samediggi.fi
