Sämitige saavâjođetteijee mieldi Täsivääldi president virgeestalgâttemtilálâšvuođâin
Täsivääldi president virgeestalgâttemtilálâšvuođah uárnejuvvojii 1.3. Ovdâskoddetáálust já Presidentlanneest. Juhletilálâšvuođâin Sämitige ovdâstij saavâjođetteijee Pirita Näkkäläjärvi.
Sämitige saavâjođetteijee čuávui Ovdâskoddetáálust tilálâšvuođâ luptâstuvâst eres puávdejum kuosijguin. Kove: Markku Ulander / Lehtikuva
Suomâ finnij virgálávt uđđâ Täsivääldi president vástuppeeivi 1. njuhčâmáánu, ko Alexander Stubb algâttij virgestis. Virgeestalgâttem juhletilálâšvuođah uárnejuvvojii Ovdâskoddetáálust já Presidentlanneest. Sämitige ovdâsteijen tilálâšvuođáid uásálistij saavâjođetteijee Pirita Näkkäläjärvi.
Meddâl sirdâšuvvee president Sauli Niinistö toolâi Ovdâskoddetáálust ovdâskode olesčuákkimist saavâ ovdâskoodán. Tooimâst algâttâm täsivääldi president Alexander Stubb adelij Suomâ vuáđulaavâst asâttum juhlálii nonnim, mon maŋa Stubb toolâi saavâ ovdâskoodán. Presidentlanneest diplomaateh, staatârääđi, alemui staatâorgaanij ovdâsteijeeh já alemuuh virgeulmuuh celkkii president Niinistön vyelgimtiervuođâid já oovdânpuohtii president Stubbin tiervâttâsâidis.
Sämitige saavâjođetteijee Pirita Näkkäläjärvi čuávui vääldi sirdem luptâstuvâst eres puávdejum kuosijguin já lâi mieldi meid Presidentlane juhletilálâšvuođâst.
– Sämitigge kijttá povdiittâsâst. Lii stuorrâ kunnee ovdâstiđ Suomâ sämmilijd täsivääldi president juhlálijn virgeestalgâttemtilálâšvuođâin. Sämitigge tuáivut president Alexander Stubbin ennuv luho puáttee paargon já lii kiärgus tuárjuđ pargo hiäivulij vuovijguin puátteevuođâst, ciälkká saavâjođetteijee Näkkäläjärvi.
