Sámedikki ságajođiheaddji lei mielde Dásseválddi presideanta virgáiálgindilálašvuođain
Dásseválddi presideanta virgáiálgindilálašvuođat lágiduvvojedje 1.3. Riikkabeaiviesus ja Presideantašloahtas. Sámedikki ávvudilálašvuođain ovddastii ságajođiheaddji Pirita Näkkäläjärvi.
Sámedikki ságajođiheaddji čuovui dilálašvuođa Riikkabeaiviesus álbmotlovttas eará bovdejuvvon gussiiguin. Govva: Markku Ulander / Lehtikuva
Suopma oaččui virggálaččat ođđa dásseválddi presideanta bearjadaga njukčamánu 1. beaivve, go Alexander Stubb álggii virgái. Virgáiálgima ávvudilálašvuođat lágiduvvojedje Riikkabeaiviesus ja Presideantašloahtas. Sámedikki ovddasteaddjin dilálašvuođaide oassálasttii ságajođiheaddji Pirita Näkkäläjärvi.
Eret sirdašuvvi Presideanta Sauli Niinistö doalai Riikabeaiviesus riikkabeivviid dievasčoahkkimis riikkabeivviide sáhkavuoru. Doaimmas álggahan dásseválddi presideantta Alexander Stubb attii Suoma vuođđolágas ásahuvvon allaárvvot nannema, man maŋŋá Stubb doalai sáhkavuoru riikkabeivviide. Presideantašloahtas diplomáhtat, stáhtaráđđi, bajimus stáhtaorgánaid ovddasteaddjit ja alimus virgeolbmot celke presideantta Niinistöi vuolgindearvvuođaid ja ovdanbukte dearvvahusaidis presideanta Stubbii.
Sámedikki ságajođiheaddji Pirita Näkkäläjärvi čuovui válddimolsuma álbmotlovttas eará bovdejuvvon gussiiguin ja lei mielde maiddái Presideantašloahta ávvudilálašvuođain.
– Sámediggi giitá bovdehusas. Lea stuorra gudni ovddastit Suoma sápmelaččaid dásseválddi presideanta allaárvvot virgáiálgindilálašvuođain. Sámediggi sávvá presideanta Alexander Stubbii olu lihku boahttevaš bargui ja lea gearggus doarjut barggu heivvolaš vugiiguin boahttevuođas, dadjá ságajođiheaddji Näkkäläjärvi.
