Sääʹmteeʹǧǧ saaǥǥjååʹđteeʹjj mieʹldd Tääʹssvääʹld presideeʹnt veeʹrjestaltteempooddâst
Tääʹssvääʹld presideeʹnt veeʹrjestaltteempooddid jäʹrjsteš 1.3. Parlameʹnttpõõrtâst da Presideʹnttkue′rncest. Sääʹmteeʹǧǧ juʹhllpooddin eeʹttǩõõʹsti saaǥǥjååʹđteeʹjj Pirita Näkkäläjärvi.
Sääʹmteeʹǧǧ saaǥǥjååʹđteeʹjj seuʹrrji Parlameʹnttpõõrtâst poodd kriiʹlcest jeeʹres koččumkuõʹssivuiʹm. Snimldõk: Markku Ulander / Lehtikuva
Lääʹddjânnam vuäǯǯai veerǥlânji ođđ tääʹssvääʹld presideeʹnt piâtnâc 1. pâʹsslašttâm-mannu, ǥu Alexander Stubb alttii veeʹrjes. Veeʹrjestaltteempooddi juʹhllpooddid jäʹrjsteš Parlameʹnttpõõrtâst da Presideʹnttkue′rncest. Sääʹmteeʹǧǧ eeʹttǩeeʹjen pooddid vuässõõđi saaǥǥjååʹđteeʹjj Pirita Näkkäläjärvi.
Parlameʹnttpõõrtâst cõõjõõʹtti presideʹntt Sauli Niinistö õõʹni parlameeʹnt tiuddsåbbrest parlamentta saaǥǥ. Tååimast alttääm tääʹssvääʹld presideʹntt Alexander Stubb uuʹdi Lääʹddjânnam vuâđđlääʹjjest šiõttuum joohljas ååsktõõzz, koon mâŋŋa Stubb õõʹni saaǥǥ parlamentta. Presideʹnttkue′rncest diplomattkåʹdd, riikksuåvtõs, ââʹlmõs riikkorgaani eeʹttǩeeʹj da pââimõs veʹrǧǧoummu pråʹššjõʹtte presideʹntt Niinistö da puʹhtte tiõrvʼvuõđâs presideʹntt Stubbiiʹje.
Sääʹmteeʹǧǧ saaǥǥjååʹđteeʹjj Pirita Näkkäläjärvi seuʹrrji vääʹldvaajtummuž kriiʹlcest jeeʹres koččumkuõʹssivuiʹm da leäi še mieʹldd Presideʹnttkue′rnec juʹhllvuõđin.
– Sääʹmteʹǧǧ späʹssbââšš kååččast. Leäi jõnn cistt eeʹttkâʹstted Lääʹddjânnam säʹmmlaid tääʹssvääʹld presideeʹnt joohljas veeʹrjestaltteempooddâst. Sääʹmteʹǧǧ ääʹjast presideʹntt Alexander Stubbiiʹje samai jiânnai leekk puõʹtti tuõjju da lij vaalmaš tuärjjeed tuâj suåvlaž naaʹlin pueʹttiääiʹjest, särnn saaǥǥjååʹđteeʹjj Näkkäläjärvi.
