Sämitige stivrâ iävtut juovlâskeŋkkâruuđâid sämipárnái já -nuorâi kielâpirrâs naanoodmân

Sämitige stivrâ meridij čuákkimstis iävtuttiđ staatâ budjetân ihán 2025 lasemeriruuđâ, ađai nuuvt kočodum juovlâskeŋkkâruuđâid sämipárnái já -nuorâi kielâpirrâs naanoodmân já siärvuslâšvuođâ oovdedmân.

– Mij valjijm juovlâskeŋkkâruttâiävtuttâssân fáádá, mii ovdedičij puoh kuulmâ Suomâst ellee sämikielâ puátteevuođâ oles Suomâst.

– Ohtâ konkreetlâš toimâ sämipárnái já -nuorâi kielâpirrâs já siärvuslâšvuođâ naanoodmân lii säminuorâi taaiđâtábáhtus ovdedem, vâi nuuvt maŋgâ sämipáárnáš já -nuorâ pirrâ Suomâ, ko máhđulâš, pesâččij uásálistiđ jyehi-ivváá tábáhtusân, iätá Sämitige saavâjođetteijee Pirita Näkkäläjärvi.

Sämitigge lii jyehi ive toohâm skammâmáánust iävtuttâs juovlâskeŋkkâruuđâ uásild.

Ihán 2024 Sämitigge iävtuttij juovlâskeŋkkâruuđâid sämipárnái já -nuorâi taaiđâtábáhtus ornim várás sehe Sämitige sämimuusik-, párnáikulttuur- já elleekovekuávdái tooimân, mutâ talle Sämitigge ij finnim lasemeriruuđâ.

Sämitigge mieldi raasiism vuástásii kampanjan

Sämitige stivrâ meridij, ete Sämitigge uásálist staatârääđi Me puhumme teoin (Mij sárnup tavoiguin) -kampanjan raasiism tuástumân já oovtviärdásâšvuođâ oovdedmân.

Raasiism vuástásâš kampanja lii uási porgemáánust 2023 adelum staatârääđi oovtviärdásâšvuotâtiättunaddelmist.

– Oovtviärdásâšvuotâtiättunaddelmist láá mieldi haldâttâs iävtuttâs sämitiggelaavâst sehe tuotâvuotâ- já sovâdâttâmkomissio pargo. Taah láá sämmiláid positiivliih pajasčälimeh. Toos lasseen Sämitige stivrâ ana tehálâžžân uásálistiđ raasiism vuástásii kampanjan, iätá saavâjođetteijee Näkkäläjärvi.

Noomâtmeh sierâ toimâorgaanáid

Čuákkimstis Sämitige stivrâ nomâttij ovdâsteijee Poronhoidon tuottavuuden ja kannattavuuden parantaminen poronhoitomenetelmiä sekä laidunten käyttöä ja turvaamista kehittämällä (Puásuituálu pyevtitvâšvuođâ já kannatteijeevuođâ pyeredem oovdedmáin puásuituáluvuovvijd sehe kuátuenâmij kevttim já turvim) (Petraus) -haavâ stivrimjuávkun. Stivrâ nomâttij stivrimjuávkun ovdâsteijen Leo Aikio Anarist já väriovdâsteijen Tauno Ljetoff Anarist.

Tave-Suomâ sosiaalsyergi mättimkuávdáá njunošjuávkun já ráđádâllâmkoodán Sämitige ovdâsteijen stivrâ nomâttij sosiaal- já tiervâsvuođâlävdikode saavâjođetteijee Leena Niittyvuopio-Jämsä Ucjuuvâst já värijesânin sosiaal- já tiervâsvuođâlävdikode värisaavâjođetteijee Ulla-Maarit Magga Iänuduvâst.

Tiänu kuálástemsopâmuš páihálii čuávvumjuávkun jesânin nomâttui Nilla Tapiola Ucjuuvâst já värijesânin Asko Länsman Ucjuuvâst.

Säämi parlamentaarlii rääđi (SPR) nuorâirááđán jesânin nomâttui Rosa-Máren Juuso Iänuduvâst já Mihku Näkkäläjärvi Anarist já sunnui persovnlâš värijesânin Helmi Ljetoff Helsigist já Hánsa Ravna-Pieski Ucjuuvâst.

Lasetiäđuh:

Pirita Näkkäläjärvi
Saavâjođetteijee
044 7533 766
pirita.nakkalajarvi@samediggi.fi