Sámedikki stivra evttoha juovlaskeaŋkaruđa sámemánáid ja -nuoraid giellabirrasa nannema várás

Sámedikki stivra mearridii čoahkkimis evttohit stáhta bušehttii jahkái 2025 lassimearreruđa, elege nu dadjon juovlaskeaŋkaruđa sámemánáid ja -nuoraid giellabirrasa nannema ja searvvušlašvuođa ovddideami várás.

– Mii válljiimet juovlaskeaŋkaruhtaevttohussan fáttá, mii ovddidivčče Suomas ealli buot golmma sámegiela boahttevuođa olles Suomas.

– Okta konkrehtalaš doaibma sámemánáid ja -nuoraid giellabirrasa ja searvvušlašvuođa nannema várás lea sámenuoraid dáiddadáhpáhusa ovddideapmi, vai nu máŋga sámemáná ja -nuora go vejolaš miehtá Suoma beasašedje oassálastit jahkásaš dáhpáhussii, muitala Sámedikki sátnejođiheaddji Pirita Näkkäläjärvi.

Sámediggi lea maiddái jahkásaččat bargan skábmamánus evttohusa juovlaskeaŋkaruđa oasil.

Jahkái 2024 Sámediggi evttohii juovlaskeaŋkaruđa sámemánáid ja -nuoraid dáiddadáhpáhusa ordnema várás sihke Sámedikki sámemusihkka-, mánáidkultur- ja filbmaguovddážiid doaimmaide, muhto lassimearreruhta ii dalle ožžojuvvon.

Sámediggi fárrui rasismma vuostásaš kampánjii

Sámedikki stivra mearridii, ahte Sámediggi oassálastá stáhtaráđi Mii hállat daguiguin -kampánjii rasismma duostuma ja ovttaveardásašvuođa ovddideami várás.

Rasismma vuostásaš kampánja lea borgemánus 2023 addojuvvon stáhtaráđi ovttaveardásašvuođadieđáhusa oassi.

– Ovttaveardásašvuođadieđáhusas leat fárus ráđđehusa evttohus sámediggelágas sihke duohtavuođa- ja soabadankommišuvnna bargu. Dát leat sámiide positiivvalaš merkejumit. Sámedikki stivra dan lassin doallá dehálažžan oassálastit rasismma vuostásaš kampánjii, muitala sátnejođiheaddji Näkkäläjärvi.

Nammadeamit sierra doaibmaorgánaide

Čoahkkimis Sámedikki stivra nammadii ovddasteaddji Boazodoalu buvttadanmuni ja gánnáhahttivuođa buorideapmi boazodoallovugiid sihke guohtuneatnamiid geavaheami ja dorvvasteami ovddidemiin (Poronhoidon tuottavuuden ja kannattavuuden parantaminen poronhoitomenetelmiä sekä laidunten käyttöä ja turvaamista kehittämällä, Petraus) -prošeavtta stivrenjovkui. Stivra nammadii stivrenjovkui ovddasteaddjin Leo Aikio Anáris ja várreovddasteaddjin Tauno Ljetoff Anáris.

Davvi-Suoma sosiálasuorggi máhttinguovddáža stivrenjovkui ja ráđđádallangoddái Sámedikki ovddasteaddjin stivra nammadii sosiála- ja dearvvasvuođalávdegotti sátnejođiheaddji Leena Niittyvuopio-Jämsä Ohcejogas ja várrelahttun sosiála- ja dearvvasvuođalávdegotti várresátnejođiheaddji Ulla-Maarit Magga Eanodagas.

Deanu guolástansoahpamuša báikkálaš čuovvunjovkui lahttun nammaduvvui Nilla Tapiola Ohcejogas ja várrelahttun Asko Länsman Ohcejogas.

Sámi parlamentáralaš ráđi (SPR) nuoraidráđi lahttun nammaduvvui Rosa-Máren Juuso Eanodagas ja Mihku Näkkäläjärvi Anáris ja sidjiide persovnnalaš várrelahttun Helmi Ljetoff Helssegis ja Hánsa Ravna-Pieski Ohcejogas.

Lassidieđut:

Pirita Näkkäläjärvi
Sátnejođiheaddji
044 753 3766
pirita.nakkalajarvi@samediggi.fi