Sämitige valjâlävdikoddeest nubbe kuoddâlem AHR puástumiärádâsâin
Sämitige valjâlävdikodde kuoddâlij 20.08.2019 16 miärádâsâst, moiguin alemus haldâttâhriehti lâi komettâm valjâlävdikode syeinimáánust toohâm jiešvuoigimijd. Ovdebij miärádâsâi maŋa AHR lii adelâm lase jiešvuoigimijd kometteijee miärádâsâid, moid kuáská ovdebijn miärádâsâin merkkum luávkkámij lasseen uđđâ vuoigâlii riehtijotteem luávkkám.
Siämmáánáál ko vuossâmuin 16 miärádâsâin, meid tääl uđđâ kuoddâlem čuosâttâhhân orroo 40 tábáhtusâst AHR lâi čuávdám jiešvuoigimijn tohhum väidimijd vuoigâlii riehtijotteem vuáđuprinsiipijd luávkkáámáin kulâhánnáá ollágin väidim keežild valjâlävdikode tâi sämitige. Ko čuávduseh lijjii tohhum tuše väidee kulâmáin, te toid lijjii pááccám čielgâ feeilah.
AHR 40 uđđâ čuávdusijd hettee lasseen nubelágán vuoigâlii riehtijotteem luávkkám.
AHR president Kari Kuusiniemi adelij 8.8.2019 Ylen sahhiittâllâm, kost sun pahudij, čuujootmáin AHR:st talle kieđâvuššâmnáál orroo jiešvuoigimijn tohhum väidimij väideid, ete ”lii čielgâs, ete taid ulmuid kalga macâttiđ valjâluvâttâlmân”. Celhidijnis president Kuusiniemi munedij tuámustovlistis čuávdim vyerdee väidimaašij kieđâvuššâm loppâpuáttus vuovvijn, mii luávkkái ääši kieđâvuššee juáhus tuámárij jiešráđálâšvuođâ já pelettemesvuođâ tâi kuittâg mielâkove, mii tast šadda äššiomâháid já aalmugân AHR hináin kieđâvuššâđ väidimijd tienuuvt, ete tot kunnijât vuoigâlii riehtijotteem vuáđulijd prinsiipijd.
Lasetiäđuh:
Sämitige valjâlävdikode saavâjođetteijee Janne Näkkäläjärvi, p. 010 839 3190, janne.nakkalajarvi(at)samediggi.fi
