Sämitigge almoot uuccâmnáál pargoviehâhoovdâ meriáigásii pargo

Pargo álgáččij 3.10.2022 já pištáččij 31.3.2023 räi. Sämitigge almoot taan meriáigásii virgekoskâvuođâ ääigi pargoviehâhoovdâ fastâ virge uuccâmnáál njuhčâmáánust 2023, te pargoost perustum ulmuid meriáigásâš pargo ličij pyeri máhđulâšvuotâ ucâluđ fastâ viirgán.

Sämitigge lii suulân 75 pargee ornijdume, mon pargeeh tuáimih maaŋgâpiälálávt sierâlágán pargoin já jieškote-uv ovdâsvástádâssuorgijn. Sämitigge lii ohtâ merhâšittee pargoadeleijee sämikuávlust. Sämitige pargei váldutoimâpäikki lii Säämi kulttuurkuávdáš Sajos, Anarist, mutâ pargeeh pargeh vijđáht pirrâ Suomâ já sämikuávlu.

Pargoviehâhoovdâ pargon lii västidiđ Sämitige puoh pargoviehâhaldâttuv prosesijn palvâlemkoskâvuođâ ääigi ain rekrytistmist kidâ pargokoskâvuođâ nuuhâm räi. Pargoviehâhovdâ tuárju oles pargovievâ puoh aašijn, moh kyeskih palvâlemkoskâvuotân já pyereestvajemân, sun västid pargoviehâstrategia já -ravvui sehe miärádâsâi tohâmist já olášutmist. Pargoviehâhovdâ tuáimá ovdâulmui pargopaarrân já suu ovdâsvástádâsâst láá eromâšávt pargoviehâhaldâttâhân, pargopyereestvajemân já pargoadeleijeepolitiikân lohtâseijee ääših. Lasseen pargoviehâhovdâ tuáimá pälkkihaldâttuv já pargotiervâsvuođâhuolâttâs ohtâvuotâolmožin. Pargoviehâhovdâ tuáimá almos toimâttuvâst haldâttâhhoovdâ vuálásâžžân.

Tohálâšvuotâiähtun lii pargo vaattâm hiäivulâš aaleeb ollâškovlâtođhos já sämikielâ táiđu (asâttâs 1727/95). Pargo miänástuvvee hoittáámist iššeed vijđes sämikulttuur tubdâm, pargohárjánem pargoviehâhaldâttuv já pargopyereestvaijeem oovdedmist, tiätu keevâtlijn palvâluskoskâvuotâaašijn, eromâšávt virgeolmoošlaavâ já staatâ virgeiähtusopâmuš heiviitmist sehe šiev ráđádâllâm-, tiimipargo- já viestâdemtááiđuh. Lasseen hiättun annoo ovdedeijee já čuávdusáid viggee pargovyehi sehe naavcah kieđâvuššâđ maaŋgâid sierâlágán pargoid ovdâsvástádâslávt korrâ-uv streesi vyelni.

Pargoviehâhoovdâ pälkki meriduvvoo Sämitige pälkkivuáháduv vátávâšvuotâtääsi IV/I mield (vuáđupälkki 2885,14 €). Vuáđupäälhi lasseen pargoost máksojeh 24 % sämikuávlu lase sämikuávlust porgâdijn sehe pargohárjánem mield meridum hárjánemlaseh. Pargoost lii kuulmâ mánuppaje keččâlemäigi.

Ucâmušâid lahtosijguin kalga toimâttiđ Sämitige čäällimkoodán 28.9.2022 räi https://www.sympahr.net/public/pq.aspx?ec6badc1

Lasetiäđuid pargoost addel haldâttâhhovdâ Pia Ruotsala-Kangasniemi puh. 040-7262688 tâi pia.ruotsala@samediggi.fi

Sämitige tooimân puáhtá uápásmuđ nettičujottâsâst www.samediggi.fi.

Anarist 7.9.2022
Sämitigge