Sämitigge ocá meriáigásii proojeektpargee nuorâirääđi De! 2-haahân

Proojeektpargee pargon lii sämikielâlii- já kulttuurmiäldásii nuorâipargo ovdedem sämikuávlu kieldâin hahâvuávám mield oovtâst Sämitige nuorâiraađijn já haavâ stivrimjuávhoin. Proojeektpargee vuáváá já olášut nuorâi astoääigi tooimâ sehe uárnee tooimâ sierâ päikkikuudijn säminuorâi tuoivui já táárbui vuáđuld oovtâstpargoost sämikuávlu kieldâiguin. Proojeektpargee västid haavâ keevâtlijn orniistâlmijn sehe olášutmist já raapoort rähtimist.

Pargo álgáččij 15.5.2024 tâi sopâmuš mield já pištá 31.12.2024 räi.

Tohálâšvuođâiähtun lii tooimâ vaattâm hiäivulâš škovlim já sämikielâ máttu (asâttâs 1727/95). Mij anneep áárvust naavcâid jiečânâs já huolâlii porgâmân, šiev oovtâstpargo- já vuáruvaikuttâstááiđuid sehe hárjánem proojeektpargoost. Proojeektpargee toimâsaje lii Säämi kulttuurkuávdáš Saijoosist, káiduspargo lii uásild máhđulâš. Pargo hoittám váátá mađhâšem sämikuávlust já vyeijimkoortâ/jieijâs auto kevttim.

Pälkki miärášuvá Sämitige pälkkivuáháduv vátávâšvuotâtääsi V/II mield (vuáđupälkki 2432,19 eurod / mp). Vuáđupäälhi lasseen pargoost máksojeh 24 % sämikuávlu lase sämikuávlust porgâdijn já pargohárjánem mield miärášuvvee hárjánemlaseh.

Rijjâhámásâš uuccâmreeivâ sehe máhđulâš ánsuluvâttâllâm já eres lahtosijd kalga toimâttiđ Sämitige čäällimkoodán majemustáá 7.5.2024 taan uuccâmluámáttuv peht (lekkâs uđđâ laasân).

Sämitige nuorâirääđi lii finnim nuorâipargo ovdedemhaahân 46 500 e ruttâdem Laapi kuávluhaldâttâhvirgáduvâst.

Lasetiäđuid pargoost addel nuorâičällee Elli-Marja Hetta, elli-marja.hetta(at)samediggi.fi já puh. 050 3825 179.

Sämitige tooimân puáhtá uápásmuđ nettičujottâsâst www.samediggi.fi já nuorâirääđi tooimân čujottâsâst www.nuor.fi

Anarist 23.4.2024
Sämitigge