Sämitigge ocá ollâškovlâhárjuttellee
Sämitigge almoot uuccâmnáál ollâškovlâhárjuttellee saje. Pargo álgá sopâmuš mield kesimáánust 2025. Hárjuttâllâm pištá 3 mp. Pargoost lii máhđulâš porgâđ káidusin.
Ollâškovlâhárjuttellee válduášálâžžân pargon lii säminuorâi konferens vuávám, ornim, tieđettem sehe eres munevalmâštâlmeh sehe konferens loppâpargoh oovtâstpargoost Sämitige nuorâičällein já nuorâirađđijn. Säminuorâi konferens uárnejuvvoo porgemáánust 2025 Anarist Saijoosist já ton uárnejeijen lii Sämitige nuorâirääđi.
Hiäivulâš škovlim, sämikielâ táiđu já sämikulttuur tubdâm išedeh pargo miänástuvvee hoittáámist. Mij anneep áárvust naavcâid jiečânâs já huolâlii porgâmân sehe šiev oovtâstpargo- já vuáruvaikuttâstááiđuid. Pälkki miärášuvá Sämitige pälkkivuáháduv vátávâšvuotâtääsi V já tast II juávhu mield (vuáđupälkki 2432,19 eurod/mp). Vuáđupäälhi lasseen pargoost máksojeh 24 % sämikuávlu lase sämmilij päikkikuávlust porgâdijn já pargohárjánem mield miärášuvvee hárjánemlaseh. Vuosâsaajeest mij tuáivup occeid, kiäin lii oppâlájádâs toorjâ hárjuttâlmân. Meid eres occeeh váldojeh huámmášumán.
Rijjâhámásâš uuccâmreeivâ sehe máhđulâš ánsuluvâttâllâm já eres lahtosijd já uápputuođâštusâid kalga toimâttiđ Sämitige čäällimkoodán majemustáá 30.4.2025 taan uuccâmluámáttuv peht (lekkâs uđđâ laasân): Ooccâmlomakk
Lasetiäđuid pargoost addel nuorâičällee Elli-Marja Hetta, elli-marja.hetta@samediggi.fi sehe ollâškovlâhárjuttâlmân lohtâseijee aašijn pargoviehâhovdâ Ida Pirttijärvi, ida.pirttijarvi@samediggi.fi.
Sämitige tooimân puáhtá uápásmuđ nettičujottâsâst www.samediggi.fi já nuorâirääđi tooimân čujottâsâst www.nuor.fi
Anarist 16.4.2025
Sämitigge
