Sämitigge ocá spesiaalvuávájeijee Interreg Aurora -ohjelm čäällimkoodán
Spesiaalvuávájeijee västid Interreg Aurora -ohjelm (2021–2027) sämmilâšsyergi ucâmuššáid sehe havváid lohtâseijee ravviimist, tieđeetmist, hahâčuávumist, ucâmušâi kieđâvušmist sehe oovdânpyehtimist haldâttâhkomitean.
Pargo lii uásiáigásâš, 50 % olespargoääigist (18 t 8 min/okko), já pargee sopâmuš lii Suomâ Sämitiigán. Pargo ana sistees mađhâšem hahâkuávlust já pargo lii máhđulâš porgâđ káidusin. Interreg Aurora-ohjelm ohjelmkielâ lii eŋgâlâskielâ.
Pargo álgá 7.1.2025 teikâ sopâmuš mield já pištá aalgâst 31.12.2025 räi. Lasetiäđuh Interreg Aurora-ohjelmist kávnojeh čujottâsâst https://www.interregaurora.eu/
Tohálâšvuotâvátámâššân lii hiäivulâš ollâškovlâtođhos. Lasseen váttoo sämikielâ táiđu (asâttâs 1727/95). Pargo miänástuvvee hoittám váátá šiev sämikulttuur já raajijd rastaldittee oovtâstpargo sehe haaldâtlij pargoi tubdâm, šiev viestâdemtááiđuid, kiärgusvuođâ jiečânâs porgâmân, naavcâid tiimipaargon já eromâš pyere eŋgâlâskielâ njálmálii já kirjálii mättim. Pargohárjánem sullâsijn pargoin sehe EU-lahâasâttem já haldâttuv tubdâm annoo occei hiättun.
Pälkki miärášuvá Sämitige pälkkivuáháduv vátávâšvuotâtääsi IV/II mield (olesáigásii pargokoskâvuođâ vuáđupälkki 2928,68 €/mp). Vuáđupäälhi lasseen máksojeh 24 % sämikuávlu lase sämikuávlust porgâdijn já pargohárjánem mield miärášuvvee hárjánemlaseh. Pargoost lii 4 mánuppaje keččâlemäigi.
Ucâmuš, ánsuluvâttâllâm já eres lahtosijd já tuođâštusâid kalga macâttiđ Sämitige čäällimkoodán 30.11.2024 räi taan uuccâmluámáttuv peht (lekkâs uđđâ laasân).
Lasetiäđuid pargoost addel haldâttâhhovdâ Pia Ruotsala-Kangasniemi, pia.ruotsala(at)samediggi.fi, puh. +358407262688.
Lasetiäđuid Interreg Aurora-ohjelmist addel ohjelmhovdâ Tina Nilsson, Norrbotten läänihaldâttâs tina.nilsson@lansstyrelsen.se puh. + 46 10 225 52 89
Anarist 31.10.2024
Sämitigge
