Sämmilij parlament 50 ive juhle ohjelm lii almostum

Juuhlán láá puávdejum Säämi parlament sehe Sämitige jesâneh sierâ valjâpoojijn, sämisiärváduv vaigutteijeeh, Suomâ staatâ já sierâ oovtâstpargopeelij ovdâsteijeeh sehe Sämitige pargeeh.

Ovdil juhle kyesih pyehtih pyehtiđ juhletiervâttâsâid Sämitiigán. Tiervâttâsâid väldih vuástá Sämitige saavâjođetteijeeh parlamentsali Soljust tme 9-10.30.

Juhle lii povdejum kuossijd, mutâ tilálâšvuođâ piäsá čuávvuđ njuolgâ vuolgâttâs peht tme 11 rääjist čujottâsâst: www.sajos.fi/live 

Juhletilálâšvuođâ ohjelm

Sämmilij parlament 50 ive juhle álgá tme 11 Säämi kulttuurkuávdáš Sajosist já nohá suulân tme 15.30. Mij tuáivup, ete povdejum kyesih láá sajestis Sajos auditoriost tme 10.45.

Juhle vuossâmuu uási liäkká Anders J Gaino sämitige juáigusijn, mon maŋa Sämitige saavâjođetteijee Tuomas Aslak Juuso tuálá juhlesaavâ. Suomâ staatâ sahâvuáru tuálá riehtiminister Leena Meri. Professor Veli-Pekka Lehtola tuálá sahâvuáru sämmilij parlamentaarlii pargo 50 ive historiikist. Lasseen tilálâšvuođâ vuossâmuu uásist jieijâs tiervâttâs pyehtih Taažâ já Ruotâ sämitigeh sehe Nuorttâlij sijdâčuákkim. Saavâi kooskâst mij kuullâp ärbivuáválii muusik Ulla Pirttijärvi-Länsmanist, Erkki Lumisalmist já Petter Morottajast.

Juhletilálâšvuođâst lii puddâ suulân tme 12.30-14, kuás Sajos aulast lii fáállun uccâ sálttáás purrâmuš sehe kákkukähvi savâstâllâm paaldâst.

Juhle nube uási aalgât sämmilâš uánihisfilmâ, mon maŋa vuárust lii sämiparlamiänttárij paaneelsavâstâllâm. Savâstâlmân uásálisteh parlamiänttáreh sehe Säämi parlament já Sämitige sierâ poojijn; Pekka Aikio, Matti Morottaja, Juhani Nousuniemi, Klemetti Näkkäläjärvi, Tiina Sanila-Aikio já Anu Avaskari sehe nuorâirääđi ovdâsteijee Anni-Sofia Niittyvuopio. Paaneelsavâstâllâm maŋa jieijâs sahâvuároin juhle kunnijâttev toimâtteijee já puásuituállee Aslak Paltto sehe Sämitige nuorâirääđi saavâjođetteijee Anni-Sofia Niittyvuopio. Juhletilálâšvuotâ nohá Säämi suuvâ ohtsâšlavlui.

Eehidtábáhtus uárnejuvvoo Wilderness Hotel Juutuast tme 21 rääjist, tábáhtusâst láávdást Ailu Valle. Eehidtábáhtus lii ávus puohháid.

Lasetiäđuh

Tuomas Aslak Juuso
Saavâjođetteijee
040 687 3394
tuomas.juuso@samediggi.fi 

Pia Ruotsala-Kangasniemi
Haldâttâhhovdâ
010 839 3106 / 040 726 2688
pia.ruotsala@samediggi.fi

Saana Aikio
Má. Proojeektpargee
saana.aikio@samediggi.fi
040 595 6377