Sääʹm parlameeʹnt 50-eeʹǩǩjuuʹhl programm lij õlmstõttum

Johlla liâ koččum sääʹm parlameeʹnt di Sääʹmteeʹǧǧ vuäzzla jeeʹres vaalpõõʹjin, sääʹmõhttsažkååʹdd vaaikteeʹj, Lääʹdd riikk da snäätnas õhttsažtuâjjkuõiʹmi eeʹttǩeeʹj di Sääʹmteeʹǧǧ tuâjjla.

Ouddâl juuʹhl kuõʹssin lij vueiʹtlvaž puʹhtted juʹhlltiõrvʼvuõđid Sääʹmtegga. Tiõrvvʼvuõđid väldd vuâstta Sääʹmteeʹǧǧ saaǥǥjååʹđteeʹjjkåʹdd parlameʹnttkueʹrnec Soljust čiâss 9-10.30.

Juʹhll lij koččum kueʹssid, leša juuʹhl peäss ǩiõččâd vuõigg vuõlttõõzz pääiʹǩ čiâss 11 ääʹljeeʹl addrõõzzâst: www.sajos.fi/live

Juʹhllpoodd programm:

Sääʹm parlameeʹnt 50-eeʹǩǩjuʹhll âlgg čiâss 11 Sääʹmkulttuurkõõskõs Sajoozzâst da poott nuʹt čiâss 15.30. Koččum kuõʹssid raaukât åårrad pääiʹǩ âʹlnn Sajoozz auditoriost čiâss 10.45.

Juuʹhl vuõssmõs vueʹzz äävad Aslak Anders J Gaino sääʹmteeʹǧǧ juõiǥin, koon mâŋŋa juʹhllsaaǥǥ âânn Sääʹmteeʹǧǧ saaǥǥjååʹđteeʹjj Tuomas Aslak Juuso. Lääʹdd riikk saaǥǥvuâr âânn vuõiggâdvuõttminister Leena Meri. Professor Veli-Pekka Lehtola âânn saakkvuâr sääʹm parlamentaarlaž tuâj 50-eeʹǩǩhistoriikkâst. Lââʹssen poodd vuõssmõs vueʹzzest tiõrvʼvuõđâs põʹhttre Taarr da Ruõcc sääʹmteeʹǧǧ di Saaʹmi siidsååbbar. Saaǥǥi kõõskâst kuulât äʹrbbvuõđlaž sääʹm-musiikk Ulla Pirttijärvi-Länsman, Erkki Lumisalmi da Petter Morottaja naaʹlin.

Juʹhllpooddâst lij kõhtt čiâss 12.30-14, koon poodd Sajoozz jõnnkääʹrdest liâ taʹrjjeemnalla uʹcc säʹlttviâru di käkk-kååʹff seäʹbrjem poodd.

Juuʹhl nuuʹbb vueʹzz altteet ääiʹjpoddsaž sääʹm vuäʹniǩjieʹllikaartin, koon mâŋŋa lij vuârast sääʹmparlamentniiʹǩǩi paneeʹlsaǥstõõllmõš. Saǥstõõllmõʹšše vuässâʹtte parlameʹnttneeʹǩǩ nuʹt sääʹm parlameeʹnt ǥu Sääʹmteeʹǧǧ jeeʹres põõʹjin: Pekka Aikio, Matti Morottaja, Juhani Nousuniemi, Klemetti Näkkäläjärvi, Tiina Sanila-Aikio da Anu Avaskari di nuõrisuåvtõõzz eeʹttǩeeʹjj Anni-Sofia Niittyvuopio. Paneeʹlsaǥstõõllmõõžž mâŋŋa jiijjâs saaǥǥvuârain juuʹhl ciʹsttje tååimteeʹjj da puäʒʒhoiʹddjeeʹjj Aslak Paltto di Sääʹmteeʹǧǧ nuõrisuåvtõõzz saaǥǥjååʹđteeʹjj Anni-Sofia Niittyvuopio. Juʹhllpodd loopptet Sääʹmsooǥǥ õhttsažlaullʼja.

Jeäʹǩǩes-šõddmõš Wilderness Hoteʹll Juutuast čiâss 21 ääʹljeeʹl, šõddmõõžžâst artiistân Ailu Valle. Jeäʹǩǩes-šõddmõš lij pukid äävas.

Lââʹssteâđ

Tuomas Aslak Juuso
Saaǥǥjååʹđteeʹjj
040 687 3394
tuomas.juuso@samediggi.fi

Pia Ruotsala-Kangasniemi
Vaaldâšmjååʹđteeʹjj
040 726 2688
pia.ruotsala@samediggi.fi

Saana Aikio
Ma. Projeʹktt-tuâjjlaž
saana.aikio@samediggi.fi
040 595 6377