Sámiid parlameantta 50- jagi ávvudeami prográmma lea almmustahtton

Ávvudeapmái leat bovdejuvvon Sámi parlameantta ja Sámedikki lahtut sierra válgabajiin, sámeservoša váikkuheaddjit, Suoma stáhta ja iešguđet oktasašbargoorgánaid ovddasteaddjit ja maiddái Sámedikki bargit.

Ovdal ávvudeami gussiin lea máŧolašvuohta buktit ávvudearvvahusaid Sámediggái. Dearvvahusaid vuostáiváldet Sámedikki ságajođiheaddjit parlameantasále Soljjus dmu 9-10.30.

Ávvudeapmi lea bovdejuvvon gussiide, muhto dilálašvuođa beassá čuovvut njuolggo sáddaga bokte dmu 11 rájes čujuhusas www.sajos.fi/live

Ávvudilálašvuođa prográmma

Sámiid parlameantta 50-jagi ávvudeapmi álgá dmu 11 Sámekulturguovddáš Sajosis ja nohká sullii dmu 15.30. Bivdojuvvo, ahte bovdejuvvon guossit leat báikki alde Sajosa auditorias dmu 10.45.

Ávvudeami vuosttas oasi rahpá Aslak Anders J Gaino sámedikki juigosiin, man maŋŋá ávvusága doallá Sámedikki ságajođiheaddji Tuomas Aslak Juuso. Suoma stáhta sáhkavuoru doallá vuoigatvuođaministtar Leena Meri. Professor Veli-Pekka Lehtola doallá sága sámiid parlamentáralaš barggu 50-jagi historihkas. Dasa lassin dilálašvuođa vuosttas oasis dearvvahusaid buktet Norgga ja Ruoŧa sámedikkit sihke Nuortalaččaid siidačoahkkin. Sáhkavuoruid gaskkas gullat árbevirolaš sámemusihka, maid loaiddastit Ulla Pirttijärvi-Länsman, Erkki Lumisalmi ja Petter Morottaja.

Ávvudilálašvuođas lea boddu sullii dmu 12.30-14 ja dalle Sajosa boađafeaskáris leat fállun sáltesnohposat ja dan lassin guossohuvvo káffe ja gáhkku servvoštallama olis.

Ávvudeami nubbi oassi álggahuvvo áigeguovdilis sámi oanehisfilmmain, man maŋŋá lea vuorus sámeparlamentarihkkáriid panelaságastallan. Ságastallamii oassálastet parlamentarihkkarat sihke Sámi parlameantta ja Sámedikki sierra doaibmabajiin; Pekka Aikio, Matti Morottaja, Juhani Nousuniemi, Klemetti Näkkäläjärvi, Tiina Sanila-Aikio ja Anu Avaskari ja maiddái nuoraidráđi ovddasteaddji Anni-Sofia Niittyvuopio. Panelaságastallama maŋŋá iežas sáhkavuoruin ávvudeami gudnejahttet doaimmaheaddji ja boazodoalli Aslak Paltto ja maiddái Sámedikki nuoraidráđi ságajođiheaddji Anni-Sofia Niittyvuopio. Ávvudilálašvuohta loahpahuvvo Sámi soga lávlaga ovttas lávlumii.

Eahketdoalut ordnejuvvojit Wilderness Hotel Juutuas dmu 21 rájes, dáhpáhusas loaiddasta Ailu Valle. Eahketdilálašvuohta lea buohkaide rabas.

Lassidieđut

Tuomas Aslak Juuso
Ságajođiheaddji
040 687 3394
tuomas.juuso@samediggi.fi 

Pia Ruotsala-Kangasniemi
Hálddahushoavda
040 726 2688
pia.ruotsala@samediggi.fi

Saana Aikio
Má. prošeaktabargi
saana.aikio@samediggi.fi
040 595 6377