Uđđâ digimateriaal anarâškielâ viereskielân máttááttâsân
Škovlim- já oppâmaterialtoimâttâh almostit uđđâ digimaterialijd anarâškielâ viereskielân máttááttâsân Hitruu 1 Ááhu kuuvl! já Hitruu 2 Pennuu seibi. Kiirjij teevstâid lii čáállám Teija Linnanmäki já kuuvijd lii sárgum Riitta Ahonen.
Hitruu 1 Ááhu kuuvl! lii uáivildum vuáđuškoovlâ kuálmád luoka já Hitruu 2 Pennuu seibi niäljád luoka materialin, mut taid puáhtá pyereest kevttiđ meid puárásub uáppei já rävisulmui viereskielân máttááttâsâst. Kiirjij suotâs mainâseh suápih luuhâm- já kuldâlemnáál meid eenikielâmáttááttâsân. Kirjeh láá jo almostum printtejum kirjen. Kuohtuid kiirjijd labdas meid hárjuttâskirje.
