Stuárráámus suovvum puásuilovoh -pargojuávkku ij iävtut puásuilovoi čuoppâm
Eennâm- já meccituáluministeriö lii almostittâm onne stuárráámus suovvum puásuilovoh -pargojuávhu loppâraapoort. Raportist pahuduvvoo, ete palgâskuáhtásáid elettempuásuilovvoid iä iävtut nubástus, mutâ jieškote-uv paalgâs kenigittoo oovdânpyehtiđ kyevti tooimâ kuátumij killeelvuođâ visásmitmân. Sämitigge ana eromâš pyerrin pargojuávhu iävtuttâs, ete palgâskuáhtásáid puásuilovvoid iä iävtut nubástus.
Sämitige saavâjođetteijee Tiina Sanila-Aikio uásálist 25.11.2019 stuárráámus suovvum puásuilovoh -pargojuávhu iävtuttâs almostittemtilálâšvuotân. ”Sämmilii puásuituálu hárjuttemhinái já eellimvuáimálâšvuođâ tááhust lii eromâš tehálâš, ete pargojuávkku ij iävtut puásuilovoi čuoppâm”, Sanila-Aikio paahud.
Eennâm- já meccituáluministeriö asâttij 12.10.2018 stuárráámus suovvum puásuilovoh -pargojuávhu valmâštâllâđ iävtuttâs poccui tälvikuátumij kilelis pyevtittemnaavcâ miäldásii elettempuásuimeereest ivvijd 2020-2030. Sämitige ovdâsteijen pargojuávhust lii toimâm Asko Länsman. Pargojuávhu loppâraapoort lii valmâštum, ijge stuárráámus suovvum puásuilovvoid iävtuttuu čuoppâm.
Pargojuávkku oovdânpuáhtá loppâraportistis, ete poccui tälvikuátumij kilelis kevttim visásmitmân já luándu maaŋgâhámásâšvuođâ ovdedeijee puásuikuáttum optimi juksâm tiet ráhtojeh kenigittee palgâskuáhtásiih puásuikuátumij tipšo- já kiävttuvuáváámeh. Pargojuávkku iävtut, ete paalgâs väljee čuávuváást kyevti tooimâ kuátumij killeelvuođâ visásmitmân: 1) Ucemustáá 7 % elettempuásuimere kepidem stuárráámuu suovvum elettempuásuimere háárán, 2) tooleeb njuovvâm 1.6.-15.11., 3) jävilkuátumij tile pyeredem, 4) kesikuáttumjuurrâm ovdedem, 5) palgâsij ovtâstittem.
Sämitige já eennâm- já meccituáluministeriö koskâsâš sämitiggelaavâ 9 § miäldásâš ráđádâllâm pargojuávhu loppâraportist já iävtuttâsâst lâi 14.11.2019. Ráđádâlmist kieđâvuššui eereeb iärásij tooláá njuovvâm tooimâ já toos lohtâseijee hástuseh. Sämitigge puovtij oovdân, ete maaŋgâin sämmilij päikkikuávlu palgâsijn njuovvâm olášuttem lii kiddâ luándutiilijn já tooleeb njuovvâm ij veltihánnáá lah máhđulâš olášuttiđ 15.11. räi, ko poccui čokkim pygályssáid váátá jieŋâ já muottuu. Hástusin puáhtá leđe meid tot, ete palgâseh iä finnii piärgukaavpijd meriääigi räi. Te Sämitigge iävtuttij, ete sämmilij päikkikuávlu uásild palgâsijd kenigitteh oovdânpyehtiđ oovtâ tooimâ kuátumij killeelvuođâ visásmitmân. Ráđádâlmijn meridii, ete eennâm- já meccituáluministeriö asâttem puátteevuotâpargojuávkku árvuštâl Sämitige avžuuttâsâst 15.11 peivimere paaldâst monnjârääji ”já/tâi ovdil tälvikuátumáid sirdâšum” ko čuávdih kiävttu- já tipšovuávám olášuttem.
Puásuituálulaavâ 21 § mield eennâm- já meccituáluministeriö meerrid love ihán häävild, kalle elettempoccuu paalgâs uážžu ihásávt toollâđ já kalle taggaar poccuu palgâs uásálâš uážžu enâmustáá omâstiđ.
Lasetiäđuh:
Saavâjođetteijee Tiina Sanila-Aikio puh. 050 300 1780, tiina.sanila-aikio(at)samediggi.fi
Iäláttâsčällee Sarita Kämäräinen puh. 040 186 7258, sarita.kamarainen(at)samediggi.fi
Kove: Tomi Guttorm / Sámediggi
