Tave-Suomâ ohjelmist mieldi Sämitige iävtuttem sämmilij iäláttâsruttârááju

Sämitigge haalijd väldiđ ovdiist aktiivlub rooli sämikuávlu eellimvuáimálâšvuođâ oovdedmist. Sämitigge lâi mieldi Tave-Suomâ ohjelm ráđádâllâmkoddeest.

– Mij kijttep uáiviminister Orpo povdiittâsâst puáttiđ mieldi Tave-Suomâ ohjelm valmâštâlmân. Mij kijttep meid ráđádâllâmkode šiev já ovdedeijee savâstâlmijn tavekuávlu máhđulâšvuođâin, iätá Sämitige saavâjođetteijee sajasâš Tuomas Aslak Juuso.

Tave-Suomâ ohjelm ulmen lii ovdediđ Tave-Suomâ máhđulâšvuođâi olesmiärálii kevttim ekonomâlii ovdánem, kuávlulii eellimvyeimi, investistmij jođálmittem, mättim ovdedem já pargovyeimi finnim uáinust.

Iäláttâsruttârááju lii Sämitige kuhesáigásâš ulme

Sämitigge lii maaŋgâ valjâpaajeest ovdedâm sämmilij iäláttâsruttârááju. Tot lii meid ohtâ Sämitige toimâvuávám 2025 váldu-uulmijn.

Sämitigge iävtuttij Tave-Suomâ ohjelmân Sämitige haldâšem iäláttâsruttârááju vuáđudem sämmilij irâtteijeevuođâ já sämikuávlu eellimvuáimálâšvuođâ sehe sämikulttuur já ärbivuáválij iäláttâsâi oovdedmân. Iävtuttâs valdui vuástá positiivlávt.

Sämmilij ärbivuáváliih iäláttâsah láá miäcástem, kuálástem, nuurrâm, sämityeji, puásuituálu já tai modern häämih.

Iäláttâsruttârááju tuárju tavekuávlu toollâm assum kuávlun

Saavâjođetteijee sajasâš Juuso lii tuđâvâš toos, ete Sämitige iävtuttâs iäláttâsruttâráájust lii Tave-Suomâ ohjelmist.

Iäláttâsruttârááju konkreetliih ulmeh láá sämmilij ärbivuáválij iäláttâsâi vuáđuld tohhum innovaatioid tuárjum, ollâ laseáárvu pyevtittâsâi já palvâlusâi ovdedem sehe pargosoojij vuáđudem.

– Iäláttâsruttârááju tuárju tavekuávlu toollâm assum kuávlun. Tot iästáččij jieijâs uásild meddâlvarrim, tuárjuččij maasâdvarrim já nanodičij sämmilij kielâ- já kulttuursiärvusijd, saavâjođetteijee sajasâš Juuso iätá.

Iäláttâsruttârááju ana ävkkin jo orroo ráhtusijd

Iäláttâsruttârááju lii vuávájum vuáđudiđ jo orroo ráhtusij vuáđu oolâ. Ruttârááju ihebudjetin iävtuttuvvoo 860 000 eurod, mast 800 000 eurod čujottuvvojeh oovdedmân já 60 000 eurod haaldâšmân. Sämitigge haaldâš ruttârááju já juáhá meriruuđâid muuneeld miäruštâllum kriterij mield.

Aalgâ vuáđuduvá vuáđulaavâ tähidem vuoigâdvuođáid ovdediđ sämikielâ já -kulttuur.

Toos lasseen ohjelmist puáhtojeh oovdân čuávuvááh eromâšávt sämmiláid kyeskee ääših:

• Kilelis mađhâšem oovdedmist kolgâččij väldiđ huámmášumán já ovdediđ luándu maaŋgâhámásâšvuođâ siäilum já páihálii kulttuur, eromâšávt sämikulttuur,
• Tave oovtâstpargoost váldoo huámmášumán Sämieennâm eksistens sehe sämmilij iäláttâsâi já eellimvuovij ulâttem raajij rasta sehe meid toi táárbuh.

Luuvâ lase: Tave-Suomâ ohjelm

Lasetiäđuh:

Tuomas Aslak Juuso
Saavâjođetteijee sajasâš
040 687 3394
tuomas.juuso@samediggi.fi

Maria Valkeapää
Vs. iäláttâsčällee
040 530 9513
maria.valkeapaa@samediggi.fi