Tââʹv prograammâst mieʹldd Sääʹmteeʹǧǧ eʹtǩǩeem säʹmmlai jieʹllemvueʹǩǩfondd

Sääʹmteʹǧǧ haaʹlad väʹldded õõuʹdbuužž aktiivlab rool sääʹmvuuʹd jieʹllemviõǥǥ õõuʹdummšest. Sääʹmteʹǧǧ leäi mieʹldd Tââʹv prograamm saǥstõõllâmkååʹddest.

– Späʹssbõõššâp väʹlddminister Orpo kååččast vueʹlǧǧed mieʹldd Tââʹv prograamm valmštõõllma. Späʹssbõõššâp še saǥstõõllâmkååʹdd šiõǥǥ da õõudårra ǩiõčči saǥstõõllmõõžži õõudâst tââʹv vueiʹttemvuõđin, särnn Sääʹmteeʹǧǧ saaǥǥjååʹđteei sâjjsaž Tuomas Aslak Juuso.

Pohjoisen ohjelma tääʹvtõsân lij õõuʹdeed Lääʹddjânnam vueiʹttemvuõđi tiuddmeärrsaž äuʹǩǩummuž, tällõõzzlaž šorrnummuž, vooudlaž jieʹllemviõǥǥ, investâsttmõõžžid hoodd ouddmõš tââʹvest, siltteem õõuʹdummuž da reâuggviõǥǥ vuäǯǯamvuõđ ǩiõččâmkuuʹlmin.

Jieʹllemvueʹǩǩfondd lij Sääʹmteeʹǧǧ kuʹǩesääiʹj täävtõs

Sääʹmteʹǧǧ lij määŋg vaalpââʹjest vuejjam säʹmmlai jieʹllemvueʹǩǩfoond. Tõt lij še õhttân Sääʹmteeʹǧǧ toiʹmmjemplaan 2025 väʹlddtäävtõsân.

Sääʹmteʹǧǧ eʹtǩǩii Tââʹv prograʹmme Sääʹmteeʹǧǧ vaaldšem jieʹllemvueʹǩǩfoond vuâđđummuž säʹmmlai põõrǥâsvuõđ da sääʹmvuuʹd jieʹllemviõǥǥ di sääʹmkulttuur da äʹrbbvuõđlaž jieʹllemvuõʹjji õõuʹdeem diõtt. Eʹtǩǩõõzz vaʹlddeš vuâstta miõđlânji.

Säʹmmlai äʹrbbvuõđlaž jieʹllemvueʹjj lie meäccstummuš, kueʹllšeellmõš, uussmõš da noorrmõš, sääʹmǩiõtt-tuâjj, puäʒʒhåidd di täi ânnʼjõžäiggsaž haʹrjjtemnääʹl.

Jieʹllemvueʹǩǩfondd tuärjjad tââʹv jälstum âânnmõõžž

Saaǥǥjååʹđteei sâjjsaž Juuso lij toođvaž tõõzz, što Sääʹmteeʹǧǧ eʹtǩǩõs jieʹllemvueʹǩǩfoondâst kooll Tââʹv prograʹmme.

Jieʹllemvueʹǩǩfoond konkreettlaž tääʹvtõsân ij tuärjjeed säʹmmlai äʹrbbvuõđlaž jieʹllemvuõʹjji vuâđald rajjum innovaatioid, õõuʹdeed õll lââʹssäärv ouddsid da kääzzkõõzzid di šõddeed tuâjjpaaiʹǩid.

– Jieʹllemvueʹǩǩfondd tuärjjad tââʹv jälstum âânnmõõžž. Tõt cõõggči peäʹlstes meäddaserddmõõžž, tuärjjeʹči mååustserddmõõžž da nââneʹči sääʹmǩiõll- da kulttuurõutstõõzzid, saaǥǥjååʹđteei sâjjsaž Juuso ceälkk.

Jieʹllemvueʹǩǩfondd äuʹǩǩad juʹn vaalmâš raajõõzzid

Jieʹllemvueʹǩǩfondd lij plaanum vuâđđeemnalla juʹn viõǥǥâst vaalmâš raajõõzzi vuõđđu. Foond eeʹǩǩbudjeʹtten eʹtǩǩeet 860 000 euʹrred, koʹst 800 000 euʹrred juuʹrdet õõuʹdummša da 60 000 euʹrred vaaldšma. Sääʹmteʹǧǧ vaaldaš foond da juâkk mieʹrrtieʹǧǧid õuddǩiõʹtte meäʹrtum kriteeʹri meâldlânji.

Alttõs nuäjjad vuâđđlääʹjj staanâm vuõiggâdvuõđid õõuʹdeed sääʹmǩiõl da kulttuur.

Lââʹssen prograammâst puuʹtet kueʹsttma täid jeäʹrben säʹmmlaid kuõskki aaʹššid:

• Ǩeâllʼjeei turiism õõudummšest õõlǥči väʹldded lokku da õõuʹdeed luâđ määŋghämmsažvuõđ seillmõõžž da pääiklaž kulttuur, jeäʹrben sääʹmkulttuur,
• Tââʹv õhttsažtuâjast vääʹldet lokku Sääʹmjânnam di sääʹm jieʹllemvuõʹjji da jieʹllemnaaʹli rââst raaji vuällmõõžž da taarbid.

Looǥǥ lââʹzz: Pohjoisen Suomen ohjelma

Lââʹssteâđ:

Tuomas Aslak Juuso
Saaǥǥjååʹđteei sâjjsaž
040 687 3394
tuomas.juuso@samediggi.fi

Maria Valkeapää
Vs. jieʹllemvueʹǩǩpiisar
040 530 9513
maria.valkeapaa@samediggi.fi