Davvi-Suoma prográmmas mielde Sámedikki evttohusas sámi ealáhusfoanda

Sámediggi háliida váldit vel aktiivvalut rolla sámeguovllu eallinfámu ovddideamis. Sámediggi lei mielde Davvi-Suoma prográmma ráđđádallangottis.

– Mii giittit oaiveministtar Orpo, go bovdii mielde Davvi-Suoma prográmma válmmaštallamii. Mii giittit maiddái ráđđádallangotti buriin ja ovddideaddji ságastallamiin davveguovllu vejolašvuođaid birra, dadjá Sámedikki ságajođiheaddji sadjásaš Tuomas Aslak Juuso.

Davvi-Suoma prográmma ulbmilin lea ovddidit Davvi-Suoma vejolašvuođaid ollislaš ávkkástallama ekonomalaš lassáneami, guvllolaš eallinfámu, investeremiid jođálmahttima, čehppodaga ovddideami ja bargofámu oažžuma viŋkiliin.

Ealáhusfoanda lea Sámedikki guhkesáigásaš ulbmil

Sámediggi lea máŋgga válgabajis ovddidan sámi ealáhusfoandda. Dat lea maiddái okta váldoulbmiliin Sámedikki doaibmaplánas 2025.

Sámediggi evttohii Davvi-Suoma prográmmii Sámedikki hálddašan ealáhusfoandda vuođđudeami sámegielat fitnodatdoaimma ja sámeguovllu eallinfámu ja maid sámekultuvrra ja árbevirolaš ealáhusaid ovddideami várás. Evttohus váldui vuostá miehtemielalaččat.

Sámiid árbevirolaš ealáhusat leat guolásteapmi, boazodoallu, meahcásteapmi, čoaggin ja sámeduodji ja daid dáláš ollašuhttinvuogit.

Ealáhusfoanda doarju davveguovllu doallama ássanguovlun

Ságajođiheaddji sadjásaš Juuso lea duđavaš dasa, ahte Sámedikki evttohus ealáhusfoanddas lea mielde Davvi-Suoma prográmmas.

Ealáhusfoandda konkrehtalaš ulbmilin lea doarjut sámi árbevirolaš ealáhusaid vuođul dahkkojuvvon innovašuvnnaid, ovddidit alla lasseárvvu buktagiid ja bálvalusaid ja vuođđudit bargosajiid.

– Ealáhusfoanda doarju davveguovllu doallama ássanguovlun. Dat easttašii oasistis eretfárrema, dorjjošii máhccama ja nannešii sámegiel- ja kulturservošiid, ságajođiheaddji sadjásaš Juuso dadjá.

Ealáhusfoanda atná ávkin gárvves ráhkadusaid

Ealáhusfoanda lea plánejuvvon vuođđuduvvot daid ráhkadusaid vuođul, mat gávdnojit juo. Foandda jahkebušeahttan evttohuvvo 860 000 euro, mas 800 000 euro manná ovddideapmái ja 60 000 euro hálddašeapmái. Sámediggi hálddaša foandda ja juohká mearreruđaid ovddalgihtii mearriduvvon kritearaid vuođul.

Álgga doarjala vuođđolága dáhkidan vuoigatvuođaide ovddidit sámegiela ja kultuvrra.

Dasa lassin prográmmas ovdanbukto čuovvovaš erenoamážit sámiid guoskevaš oasit:

• Suvdilis turismma ovddideamis galggašii vuhtiiváldit ja ovddidit luonddu máŋggahámatvuođa seailuma ja báikkálaškultuvrra, erenoamážit sámekultuvrra.
• Davveguovllu ovttasbarggus vuhtiiváldo Sámeeatnama leahkin ja sámi ealáhusaid ja eallinvugiid olaheapmi rájáid rastá ja dárbbut.

Loga lasi: Davvi-Suoma prográmma

Lassedieđut:

Tuomas Aslak Juuso
Ságajođiheaddji sadjásaš
040 687 3394
tuomas.juuso@samediggi.fi

Maria Valkeapää
Vs. ealáhusčálli
040 530 9513
maria.valkeapaa@samediggi.fi