Ucjuv kieldâ já Sämitigge ráđádâleh máttááttâsminister Adlercreutzijn sämikielâi káidusmáttááttâs fastâdmist
Ucjuv kieldâ já Sämitigge iävtutteh máttááttâsminister Adlercreutzân fastâ ruttâdem mieđettem káidusohtâvuođâid kevttee máttááttâsân já máttááttâs sierrim tievâsmittee máttááttâsân kyeskee njuolgâdusâin. Puátteevuođâst máttááttâs ličij fáállun eenikielâ já kirjálâšvuođâ sehe kuhes já uánihis kielâ oppâmeerijn, tego sämmilij päikkikuávlust.
Sämikielâi káidusmáttááttâs piiloothaavâ pargeeh čokkânii porgemáánust Sajosân vuáváđ luuhâmive. Kove: Sämikielâi káidusmáttááttâs piiloothaahâ
Máttááttâs- já kulttuurministeriö ruttâdem já čohčuv 2018 álgám haahân lii mieđettum ruttâdem kiđđâluuhâmpaje 2026 räi. Koskoho 27.11. toollâmnáál ráđádâlmijn lii-uv tárguttâs savâstâllâđ máttááttâsminister Adlercreutzijn tast, maggaar sämikielâi káidusmáttááttâs puátteevuotâ oro lemin.
Haavâ čiččâd luuhâmive káidusmáttááttâsâst láá paijeel 210 ovdâ- já vuáđumáttááttâs uápped já luvâttâhuápped. Haavâ ääigi uáppei meeri lii šoddâm neeljikiärdásâžžân.
– Uáppeemere šoddâm muštâl tast, ete káidusmáttááttâsân lii eromâš stuorrâ tárbu sämmilij päikkikuávlu ulguubeln. Tobbeenhân ääsih jo paijeel 70 % Suomâ sämipárnáin já -nuorâin. Mii árvuštâlmij mield uáppeemeeri šadda aldaiivij ääigi 300 uáppei, muštâl hahâhovdâ Hanna Helander.
Sämmilij päikkikuávlu ulguubeln sämimáttááttâs hástusijd toovât tot, ete máttááttâs nuávdit vuáđumáttááttâs já luvâttâhškovlim tievâsmittee máttááttâsvuávám.
– Tievâsmittee sämimáttááttâs máttááttâsvuávám čuávu eenikielâ máttááttâsvuávám. Iänááš uási sämmilij päikkikuávlu ulguubeln ässee párnáin já nuorâin iä sáárnu sämikielâ jieijâs eenikiellân. Tondiet mij tarbâšep máttááttâsvuávám, mon vuolgâsaijeen lii, ete uáppee ij vala määti sämikielâ, muštâl Máren-Elle Länsman, kote máttát haavâst tavesämikielâ.
– Sämikuávlu ulguubeln ässee sämipárnái já -nuorâi finnim sämikielâi máttááttâs olán lii tehálâš puoh Suomâst sarnum sämikielâi iäláskittem já puátteevuođâ tááhust. Tot, ete tievâsmittee máttááttâs kulá vuáđumáttááttâslaavâ teikâ luvâttâhlaavâ olán, lii epičielgâs já toos kyeskee miärádâsah paijeentuálih epivisesvuođâ máttááttâs jotkuuvâšvuođâst, kommentist škovlimčällee Bigga-Helena Magga.
Lasetiäđuh:
Hanna Helander, hahâhovdâ, +358407012094, hanna.helander@edu.utsjoki.fi, Ucjuv kieldâ
Anne Olli, hahâkoordinaattor, +358406875989, anne.olli@samediggi.fi, Sämitigge
Liiŋkah:
