Ohcejoga gielda ja Sámediggi ráđđádallet oahpahusministtar Adlercreutziin sámegielaid gáiddusoahpahusa sajáiduhttimis
Ohcejoga gielda ja Sámediggi evttoheaba oahpahusministtar Adlercreutzii bissovaš ruhtadeami mieđiheami sámegielaid gáiddusoahpahussii ja oahpahusa luvvema dievasmahtti oahpahusa guoskevaš njuolggadusain. Boahttevuođas oahpahus fállojuvvošii eatnigiela ja girjjálašvuođa sihke guhkes ja oanehis giela oahppomeriin, dego sámeguovllus.
Sámegielaid gáiddusoahpahusfitnu bargit čoahkkánedje borgemánus Sajosii plánet boahttevaš lohkanjagi. Govva: Sámegielaid gáiddusoahpahusfidnu
Oahpahus- ja kulturministeriija ruhtadahttán, čakčat 2018 álgán sámegielaid gáiddusoahpahusfidnui lea mieđihuvvon ruhtadeapmi giđđalohkanbaji 2026 radjái. Gaskavahko 27.11. ráđđádallamiin leage dárkkuhus ságastallat oahpahusministtar Adlercreutziin das, makkár lea sámegielaid gáiddusoahpahusa boahttevuohta.
Fitnu čihččet lohkanjagis gáiddusoahpahusas leat mielde badjel 210 ovda- ja vuođđooahpahusa oahppi ja logahatstudeantta. Fitnu áigge ohppiidlohku lea nelinkertaistunut.
– Ohppiidlogu stuorrun muitala das, ahte gáiddusoahpahussii lea hirbmat dárbu sámiid ruoktoguovllu olggobealde. Orruhan doppe jo badjel 70 % Suoma sámemánáin ja -nuorain. Min árvalusaid mielde lagaš jagiid áigge lohku loktá 300 oahppái, muitala sámegielaid gáiddusoahpahusfitnu fidnohoavda Hanna Helander.
Sámiid ruoktoguovllu olggobealde sámegielaid oahpahusas hástalusaid dagaha dat, ahte oahpahus čuovvu vuođđooahpahusa ja logahatskuvlejumi dievasmahtti oahppoplána.
– Dievasmahtti sámegielaid oahpahusa oahppoplána sulastahttá eatnigiela oahppoplána. Stuorámus oassi sámeguovllu olggobealát mánáin ja nuorain ii huma sámegiela eatnigiellan. Danin mii dárbbašit oahppoplána, man vuolggasadjin lea ahte oahppi ii vel máhte sámegiela, muitala Máren-Elle Länsman, guhte oahpaha fitnus davvisámegiela.
– Sámeguovllu olggobealde ássi sámemánáid ja -nuoraid oažžun sámegielaid oahpahussii lea dehálaš visot Suomas hubmojuvvon sámegielaid ealáskahttima ja boahtevuođa dáfus. Dievasmahtti oahpahusa gullan vuođđooahpahuslága dahje logahatlága vuollái lea eahppečielggas, ja dasa guoskki mearrádusat bajásdollet eahppesihkkarvuođa oahpahusa bissovašvuođas, kommentere sámedikki skuvlenčálli Bigga-Helena Magga.
Lassedieđut:
Hanna Helander, fidnohoavda, +358407012094, hanna.helander@edu.utsjoki.fi, Ohcejoga gielda
Anne Olli, fidnokoordináhtor, +358406875989, anne.olli@samediggi.fi, Sámediggi
Liŋkkat:
