Ulâttâsmeeri sämmiliih Lane juuhlijn

Täsivääldi president Alexander Stubb povdij jieijâs vuossâmuid Lane juhlijd 6.12.2024 ulâttâsmere sämmilijd. Tuáváást lii eromâšávt president Stubb eennâmkoddemätki Njuárgámân, Ucjuuhân, Anarân já Avelân vyesimáánust 2024.

Sämitige saavâjođetteijee Pirita Näkkäläjärvi iätá, ete lii stuorrâ kunnee, ete president Alexander Stubb já suu pelikyeimi Suzanne Innes-Stubb halijdáin povdiđ Lane juhlijd návt ennuv sämmilijd.

–  Lane juhleh láá Suomâ enâmustáá čuovvum tábáhtusâi juávhust, já ton peht šadda kove tast, maggaar lii Suomâ. Mađe eenâb mij sämmiliih oinup juuhlijn, tađe pyerebeht šadda tuođâlâš kove Suomâst.

– Mun tuáivum, ete mij pyehtip kyeđđiđ positiivlii kove Säämist já sämmilâšvuođâst pyehtimáin oovdân sämikulttuur maaŋgâhámásâšvuođâ, eellimvuáimálâšvuođâ já osko puátteevuotân, iätá Sämitige saavâjođetteijee Pirita Näkkäläjärvi.

Lane juuhlij teeman lii taan ive Yhdessä (Oovtâst). Presidentlaanan láá puávdejum suulân 1 700 kyessid pirrâ Suomâ. Puávdejum kyessin láá eromâšávt ulmuuh, kiäh láá ovdedâm siärvuslâšvuođâ já nuurrâm sierâlágán tuáváin puáttee ulmuid oohtân.

Lane juhlijd láá puávdejum taan ive eromâš ennuv sämmiliih puásuituálleeh. Toos lasseen Lane juuhlij máávuh puátih tavveen já fáállun láá iärásij juávhust poccuupiärgu, riävská já myerjih.

– Lii suotâs, ete täsivääldi president lii taan ive adelâm huámmášume mii iäláttâsân já lii povdim jiečânâsvuođâpeeivi juuhlán puásuiulmuid, kiäid sun teivâdij Ucjuuvâst já Anarist. Puásuituálu lii ohtâ sämikuávlu tehálumosijn iäláttâsâin já ton ooleest pargee sämisiärváduvâi siste sämikielah já -kulttuur siäiluh eellimvuáimálâžžân, iätá puásuialmai Asko Länsman Kaalduáivi palgâsist.

Säämimuseo Siida ovdâsteijeeh láá puávdejum vuossâmuu tove täsivääldi president jiečânâsvuođâpeeivi vuástáväldimân. Säämimuseo Siida finnij taan ive Ive eurooplâš museo- já Ive museo -palhâšuumijd.

– Mij lep iloliih, ete president Alexander Stubb halijdij uápásmuđ Säämimuseo já luándukuávdáš Siidan já sämmilii kulttuuráárbán jieijâs Anarist kollim ooleest vyesimáánust, ettâv sämimuseosiättus stiivrâ saavâjođetteijee Veikko Feodoroff já museohovdâ Taina Máret Pieski.

Presidentlanneest mij uáinip Lane juuhlij ääigi meid Suomâ čuovâkovetaiđuu museo nuurrâm já ornim čuovâkovečáitálduv Yhdessä (Oovtâst). Čáitálduv tuojij čuovâkovvejeijein ohtâ lii sämmilâštaaiđâr Lada Suomenrinne.

– Sämmilâštaaiđâ lii tuođâi maaŋgâhámásâš já uáinojeijee pirrâ maailm. Munjin persovnlávt sämmilâštaiđuu tuoijum meerhâš rijjâvuođâ já máhđulâšvuođâid huksiđ muulsâiävtulijd maailmijd. Lii tehálâš čäittiđ, ete taiđust já kulttuurist lii merhâšume, iätá taaiđâr Lada Suomenrinne.

Täsivääldi president lii mieđettâm Sämitige saavâjođetteijee Pirita Näkkäläjärvin Suomâ Leijona I luoka riitaarmeerhâ peivimeerijn 6. juovlâmáánu 2024. Suomâ aalmugjesânáid jiečânâsvuođâpeeivi mieđettum kunneemeerhâi finnejeijeid almostittii juovlâmáánu 3. peeivi.

Lane juhlijd láá puávdejum eereeb iärrás:

Pirita Näkkäläjärvi, saavâjođetteijee, Suomâ Sämitigge, Aanaar

Vesa Länsman, puásui-iššeed, Kaalduáivi paalgâs já pelikyeimi Marja Länsman, Ucjuuhâ

Asko Länsman, puásuialmai, Kaalduáivi paalgâs já pelikyeimi Anna Näkkäläjärvi-Länsman, Njuárgám

Niila Laiti, puásuialmai, Kaalduáivi paalgâs já pelikyeimi Kati Eriksen, Ucjuuhâ

Tiina Salonen, irâtteijee, Aurora Holidays, já pelikyeimi Mika Länsman, irâtteijee, Aurora Holidays Ucjuuhâ

Leo Aikio, väripuásui-iššeed, Mudusjäävri paalgâs já pelikyeimi Tiina Sanila-Aikio, Aanaar

Wille Feodoroff, puásui-iššeed, Njiävđám paalgâs já pelikyeimi Anni Koivisto, Čevetjävri

Laura Niittyvuopio-Valle, rehtor já pelikyeimi Tuomas Valle, Kärigâsnjargâ

Veikko Feodoroff, sämimuseosiättus stiivrâ saavâjođetteijee, Säämimuseo Siida já pelikyeimi Satu Tuominen, Čevetjävri

Taina Máret Pieski, museohovdâ, toimâttâshovdâ, Säämimuseo Siida, Aanaar

Teija Kaartokallio, saavâjođetteijee, Suomâ Säminuorah rs (SSN), Ruávinjargâ

Gáddjá Haarla Pieski, tanssâtaaiđâr, Ucjuuhâ

Biret Haarla Pieski, tanssâtaaiđâr, Ucjuuhâ

Suvi West, elleekovestivrejeijee já pelikyeimi Anssi Kömi, Kärigâsnjargâ

Lasetiäđuh:

Pirita Näkkäläjärvi, saavâjođetteijee, Sämitigge, 044 753 3766, pirita.nakkalajarvi@samediggi.fi

Asko Länsman, puásuituállee, Kaalduáivi paalgâs, +358400385898, asko@lumiporo.fi

Veikko Feodoroff, stiivrâ saavâjođetteijee, Sämimuseosiäđus, 0400 204 861

Taina Máret Pieski, museohovdâ, Säämimuseo Siida, 050 535 1574, taina.pieski@samimuseum.fi

Lada Suomenrinne, taaiđâr, lada.suomenrinne@gmail.com